مراميرو المصرية @mramyro_almsry
عضوة جديدة
لقمة القاضي المقرمشة الهشة من مراميرو
تلت كوب دقيق سيمولينا
1 و تلتين كوب دقيق عادي
2 م ك سكر
1 م ك خميرة فورية او بيرة بحجم عين الجمل
2 م ك زيت
2 م ك زبادي
1 م ك حليب بودرة
2 م ك بودرة كسترد او نشا
1م ك خل
ذرة ملح
1 بطاطس متوسطة مسلوقة
تقريبا كوب و نص ماء فاتر
ملحوظات علي المكونات
مهم دقيق السيمولينا الي هو دقيق البسبوسة عشان ما تشربش زيت
مهم الزيت و الخل عشان القرمشة
و الكسترد عشان القرمشة و اللون الدهبي
الحليب البودرة و الزبادي كنوع من انواع المحسنات و اثراء الطعم و اعطاء الطراوة الداخلية
مهم البطاطس عشان تكون مقرمشة بس خدي بالك لازم تكون بطاطس حلوة بتقرمش و تبقي دهبي مش بتتلسوع و بتحمر بسرعة
اوعي تكتري السكر عشان النتيجة هتكون انها بتتحمر بسرعة
جدا و تاخد لون من غير ما تستوي من جوا
انا حبيت اقول اهمية كل مكون علي حدي عشان كنت الاول بضيف حاجات و بشيل حاجات و انا غشيمة معرفش ايه الوظيفة
بتاعت كل مكون و ايه اللي هيحصل لو كنسلت حاجة
اولا هنضيف
البطاطس المسلوقة بتقريبا ربع كوب مية
في دورق الخلاط و هنضيف كل المكونات مع جزء من الدقيق و لكن مش الدقيق كله
و نلف الخلاط لفتين نتركها لتخمر
و هنا العجينة بتم علي مرحلتين تخمير مبدأي
و تخمير نهائي
هننقلها لإناء آخر و نضيف الدقيق و نضرب بالمضرب اليدوي
و خدي بالك سمك العجينة بيكون تقيل نوعا ما زي الكيك تقريبا
و لازم يكون عندك sense
بمعني انه مش هعرف اديكي مقدار المية صح الا اذا اتفقت معاكي علي نوع الدقيق و يكون نفس نوع دقيقي
لأنه معيار المية بيختلف من دقيق للتاني
حسب نسبة الجلوتين الموجودة فيه
تمام
و ال sense
انك لو لقيت العجينة تقيلة اوي خفيها بسنة مية بس بشويش
لو لقيتي العجينة خفيفة منه زيدي دقيق مع سيمولينا
شايفين سمك العجينة بقي عامل ازاي ؟
خدي بالك تكة مهمة جدا عشان تعرفي انك شغالة صح
لو العجنية تقيلة معاكي هتلاقيها معجنة من جوه و تحسيها مكتومة
لو خفيفة معاكي هتلقيها تفرش و تشرب زيت و تبقي مش ظريفة
مش عيب تعملي test
و تختبريها
و انتي حكم نفسك يا قمر
و نبدأ مرحلة القلي
هنحتاج زيت غزير و مش لازم كيلو زيت
لا انتي ممكن تجيبي حلة صغيرة عندي و تحطي كوباية زيت هتلاقيها بقت زيت غزير و يستحب يكون اول استخدام عشان ما تشربش زيت
و هنحتاج كمان معلقة صغيرة و طبق صغير فيه زيت
و الفكرة انك هتمسكي العجينة بايدك اليسار و هتطلعي جزء صغير منه من بين السبابة و الابهام
مع الابقاء علي وضعية قبض اليد
و باليد اليمني تكوني ماسكة المعلقة الصغيرة و تكوني وضعتيها من قبل في الطبق الصغير اللي فيه زيت عشان ده هيسر نزول قطعة العجين الصغيرة
الزيت
و اه من الزيت هنا بقي يكمن سر القرمشة و الخرفشة و الحرمشة
و بتتحكمي في مستوي القرمشة
ازاي بقي يا سكر
هقولك
بس صلي علي الحبيب 5 مرات
اولا الزيت يكون سخن
و بعدين تهدي لحد ما تملي الطاسة
وبعدين لو عاوزاها مقرمشة اوي تخلي النار هااااااااااااااااادية
و تقلبيها لحد ما تاخد اللون الدهبي
عاوزاها متوسطة القرمشة ارفعي النار الي متوسطة
و انتي بتنشليها من الزيت لازم النار تكون علي اعلي مستوياتها
ليه؟
اقولك ليه عشان تترك كل الزيت اللي شربته
و بعدين من القلاية علي مصفة سلك تحتها طبق الزيت الصغير فاكراها ابو معلقة نونو
و تمسكي المصفة بايدك و تحاولي تطلعيها و تنزليها بخفة في محاولة لتنزيل اي زيت موجود في اللقيمات
تمام
نيجي بقي للفنشينج
ممكن تقدميها بالسكر البودرة
و عليها رشة قرفة صغيرة جدا و جوز هند
و السلام عليكن و رحمة الله و بركاته
احبكن في الله
18
8K
يلزم عليك تسجيل الدخول أولًا لكتابة تعليق.
الصفحة الأخيرة
تسلم الأيادي