لكثرة التقارير المصوره إلى أندنوسيا أعددت تقرير لسفرتي بالتفاصيل ..

السلام عليكم ورحمة الله وبركاته
الحمدلله وبفضل من الله وفقنا لسفره الى اندنوسيا لمدة 12 يوم وطبعا لكثرة التقارير انا قررت مااسوي تقرير فيه صور كالعاده لكن فيه كلام لأعطيكم النبذه المختصره والمفيده ان شاءالله ..

كانت سفرتنا في 19 مايو 2014 بتاريخ هجري 20 رجب 1435
طبعا الجو كان حار رطب حتى في بونشاك ماتوقعت الجو كذا لدرجة اننا صرنا ندور فندق به تكييف لأن اكثر فنادق بونشاك للأسف لايوجد بها تكييف لقينا فنادق يوجد فيها اعلمكم عنها في التقرير .. وطبعا كان فيه اجازه للأندنوسيين صارت الاماكن زحمه مررره طبعا بهالوقت اختبارات طلاب السعوديه
تكلفة تذاكر السفر 4350 انا وزوجي وطفلي بدون مقعد لأنه لم يتعدى السنتين طبعا التذاكر على الضيافه التشجيعي والمقصود بذلك التذاكر غير مسترده عادي جلوسك على مقاعد الضيافه لكن السعر مخفض وغير مسترد ..
وعلى فكره في العوده صار فيه كثير مقاعد فاضيه حطينا ولدي فيها

نتكلم عن الطفل في السفر

وعلى فكره السفر مع طفل بعمر ولدي متعببببببب جداااااا لأنه يتحرك كثيييييير ممكن لو كان صغير مايتحرك احس كذا مافيه مشاكل منه وتندمت اني اخذته صراحه لانه يحوسنا بكل شي وتعب علينا وصار يستفرغ بكل مكان حتى لما نطلع منتزه او اي مكان لازم ناخذ احتياطات لنا كلنا لأنه مره استفرغ على ابوه وتبهذلنا صراحه معه غير كذا اللي مصممه تأخذ طفل معها لازم تأخذ له غيارات كثيييييره تحسبا لأي ظرف انا غلطت مااخذت له لبس كثير ماتوقعت بيمشي ويستفرغ وغير كذا قلت بأشتري من هناك لكن للأسف احس ملابس الاطفال عندهم مو مره وصرت اغسل ملابس لطفلي وانشرهم بالغرفه اجي نهاية اليوم كأني ماسويت شي لأن الجو حار ورطب يجلسون يومين ثلاثه ماينشفن وبعض الفنادق للأسف مافيهم مغسله ملابس فمن جد توهقت
ولازم ايضا عربية الطفل من الاساسيات طبعا تصير معك لاخر لحظه قبل ركوب الطياره يعني اذا جيتوا تدخلون العفش علموهم انو معاكم عربيه للطفل علشان يعطونكم كرت يلزق عليها وخلاص تصير معكم الى ركوب الطياره ويأخذونها منكم قبل ماتدخلون الطياره يحطونها بعفش الطوارئ واول مايطلع من العفش العربيات الحمدلله انا اخذت معي عربيه بالذات اللي مقابضها زي المعلاق مريحه مره تعلقين فيها الحوسه اللي معك او اذا رحتي منتزه سوق تعلقين فيها شنطة القهوه او اغراضك

طبعا الطفل لاتنسين ادويته تحاميل فيفادول مضاد وكل حوسته لاتستهينين فيهم لا حطيهم بشنطه صغيره تصير معك بالطياره
واكياس الطفل اللي تجي من مذركير او سنتر بوينت تفك ازمه اذا بتغيرين لولدك او معك زباله وحوسه له تحطين بالكيس وتخلينه معك الين توصلين وتحطينه بالزباله

خلصنا من الطفل في السفر نجي للزبده

نجي للخطوط الناقله
كانت الخطوط السعوديه انا اول مره اجرب الخطوط السعوديه خارجيا سمعت كثير يشتكون منها لكن الحمدلله توفقنا بالطيارات في الذهاب والعوده حيث كانت الطائرات جديده وبها شاشات والاكل كان حلو والحمدلله مااشتكينا من شي والاهم يذكرون دعاء السفر في كل رحلاتهم



طبعا حنا وصلنا جاكرتا الساعه 1 ونصف ظهرا استقبلنا مطار جاكرتا اللي لايوجد به مكيفات بالحر والرطوبه القاتله عكس لما تخرج من جاكرتا المطار مكيف وحلو وكافيات ومحلات ..
المهم خلصننا امورنا اللي هي دفع الفيزا 25 دولار لكل شخص حتى الطفل وحنا كنا صارفين الدولارات من مطار السعوديه وخلصنا الكرت اللي تعبين فيه المعلومات وتحتفظين بالباقي للعوده لازم مايضيع وترى الكروت افصليها عن بعض لأنها تلزق في بعض حنا اثناء العوده نحسب ان الكروت ضاعت ماشفنا الا واحد الا يوم شيكنا زين لقيناهم متلاصقين الظاهر من الحر
طبعا عانينا شوي في المطار لأن كان حر وولدي كان تعبااان جدااا والطيران السعودي وفر لنا دكتور لولدي اول ماوصلنا المطار لأنه تعب علينا في الطياره
فحنا مابين نخلص الاوراق ومابين ولدي التعبان والعفش انحسنا صراحه وماصدقنا نطلع من المطار بس وقبل مانطلع شفنا صرافين صرفنا وكان الصرف نازل شويه في المطار المفروض صارفين قبل بس حنا لما كنا بمطار السعوديه نحسب فيه صرف للروبيه صار مافيه بس صرفنا دولارات فقط
كان سعر الصرف في المطار الريال = 2900 روبيه وخارج المطار الريال =3040 روبيه ..

اتجهنا على طول الى بونشاك على كلام اكثر الناس لكن انا شفت انو فيه شي غلط المفروض ننزل في بوقور لأنها قبل بونشاك اولا وثانيا لان اكثر فنادقها موجوده في مواقع الحجز مثل بوكينق واجودا وطبعا فنادقها فيها مكيفات مو مثل بونشاك ومن بكرا الواحد يطلع على بونشاك ومهم ان الواحد يكون حاجز قبل علشان يكون مرتاح مو مثلنا الفنادق اللي نبيهم في بونشاك مو موجودات في مواقع الحجز فما حجزنا شي رحنا هناك على عمانا الحمدلله لقينا غرفه لكن مطلها على الشارع وتسمع ازعاج الدبابات هناك

طبعا مثل ماقلت المفروض نسكن في بوقور ومن بكرا نتمشى في حديقة كيبون رايا وممكن تروحون ملاهي مائيه اذا عندكم اطفال بيسبحون بس حنا رحنا وقت اجازة الاندنوسيين ودفعنا فلوس على الفاضي على طول طلعنا لأنها فل من الاندنوسيين وفيه ملاهي جنقل كبيره بس العابه مو كثيره ولاهي خطيره السواق كان يقولنا فيه ملاهي بعيده بس مارحنا لها وفيه قبال الحديقه سوق فخم وكبير فيه مطاعم وكفيهات اذا بتتغدون او تتقهون وبعدين قبل المغرب روحوا لبونشاك اللي قريبه جدا من بوقور واسكنوا فيها

أولا / الذهاب إلى بونشاك :
نبذه عنها مدينه مرتفعه تذكرني بالطايف طرقها تخوف واحس تطلعين تطلعين الين توصلين للسماء يعني مررره عاليه وكلما طلعتي فوق برد الجو احسن .. مدينه احسها وسخه وحوسه فيها اماكن حلوه لكن فيها مزابل يعني مناظر ينبسط الواحد لما يشوفها ومناظر تسد النفس

الفنادق في بونشاك

الافضل حجز الفنادق لأننا تعبنا من التنقلات وكان اكثر الفنادق فل او سرير منفصل او او يعني شوي تعذبنا
بذكر كل الفناق اللي شفناهم ومميزاتهم وعيوبهم
اول فندق سكنا فيه
اسمه ذا جراند هيل فندق فخم ولكن يعيبه عدم وجود مكيف وثلاجه حنا اخذنا اقل غرفه .. فيه الاعلى سعر لكن ماادري هل يتوفر فيها ثلاجه ومكيف او لا وفيه غرف لايوجد فيها مطل اي بلكونه لكن ماحطوها بالموقع موجوده عندهم وهي اقل سعر وللفندق موقع ممكن تشوفون الصور والاسعار طبعا الموقع انجليزي ترجموه عن طريق نسخ الرابط ثم افتحوا ترجمة قوقل والصقوا الرابط واضغطوا على ترجمه يفتح لكم الموقع مترجم
طبعا الفندق في مطل على الشارع ومطل على الغابات وحنا جربنا السكن في الاثنين عيب اللي على الشارع ازعاج الدبابات انا ماكان يهمني لأني اجي داااايخه انام مااحس لكن زوجي تنرفز من الاصوات لكن الازعاج ترى مو مرره يعني عاادي ويقل منتصف الليل خلاص الناس تهجد
وعيب اللي مطل على الغابات ازعاج الحشرات في حشرات لها اصوات غريبه وكمان ممكن يدخل عليك شي حنا لقينا في الغرفه ضاطور ونمل صغييير والشمس تطل وتصير قويييه طبعا وحااره
انا مارتحت للفندق على انه فخم وبغض النظر عن العيوب يعتبر جميييل بس لأن البلكونه تخوف بالذات اللي معهم طفل انا بس على اعصابي علشان ولدي كثير الحركه الله يهديه
طبعا فطورهم حلو ونظيف ومتنوع ومكان الفطور حلو

الفندق الثاني
سفاري موجود بمواقع الحجز اضطرينا ناخذ غرفه بسعر اعلى لأن فيها مكيف لأن فيه غرف بدون مكيف واحنا صراحه ملينا من الحر الفندق حليوو ماعليه لكن ماحبيته مدري ليه سمعت ان اللي يسكنه يقدر ياخذ تخفيض على ملاهي سفاري لكن حنا ماسألنا عن هالشي لأننا رحنا لسفاري وخلصنا
الفطور عندهم مااعجبني الذبان كبير ويوقف عند الاكل حنا اكثر شي ناخذه البيض لأنه يسويه قدامك وبس

الفندق الثالث
مجمع بابوف موقعه قريب عند مطعم كمننا على ان السواق ماعرفه ويسأل عنه ولا يعرفونه وحده مدحته هنا بالمنتدى وصرنا ندوره شكينا انه مو موجود لكن اخر شي شفناه بالصدفه
الفندق حلو ماعليه مافيه مكيف فيه ثلاجه فيه بلكونه تطل على المسبح البلكونه مكشوفه بس اكثر امان من حقت جراند هيل طبعا سكنا وماكان فيه احد فما شلنا هم يعيبه قربه من الشارع العام ازعااج الدبابات اكثر من جراند هيل
الفطور عندهم تطلبينه يعني مو بوفيه يسألونك وش تبين بس حلو فطورهم ونظيف

الفندق الرابع
فندق ياسمين اضطرينا عليه لأن اكثر الفنادق فل والا هو بعيد مرره يمكن اخر شي في بونشاك
ماحبيته مره فيه غرف فيها مكيفات وثلاجه على ان الفندق شكله فخم بس الغرف تحسين مو مره فيه بلكونه بس مطلها على بيوت وورش بس ماعليه وهادي مرره وفطورهم فيه كل شي بس ماعجبني احسه مو نظيف
المسبح حقهم حللو مرره اللي عندهم اطفال او زوجها يحب السباحه مره حلو المسبح



الفنادق اللي شفناهم
- بونشاك باس شكلله حلللو وموقعه حلو ومطله رائع لكن للاسف فل
- بلاس هوتيل حلو شكله لكن لما شفناهم يبيعون الخمور بأشكالها طلعنا
- ذا مونت روزا حلو والله لكن يعيبه عدم وجود اصنصير لقينا غرفه بالدور الثالث رفضنا السكن فيها لان صعبه علينا نطلع وننزل ومعنا طفل
- مجمع ألفا حلو وفيه مطبخ صغير في سيب صغير للي يبي يطبخ وحديقه والعاب حلو بس احس انه داخل شوي يعني مو على الشارع وعلى فكره هالمجمع كان قبل للشباب لكن ألحين للعوائل فقط لأني سألت عنه قبل في منتدى وذكروا انه مجمع شباب لكن مثل ماقلت سابقا كان للشباب والحين عوااائل
- سيروني ااه والله شكله روعه ومطله حلوووو مررره بس فل
- شفنا فلل بعضها حلو وبعضها مخيس لكن انا ماحبيت لأني خوااافه
الفنادق الثلاث الاولى من اللي شفناهم موجوده بمواقع الحجز

الاماكن الحلوه في بونشاك اللي لازم ماتفوتها
- حديقة سفاري روووعه طبعا هي اول تدخلون على الحيوانات بالسياره ثم تنزلون تلاقون العاب وتلفريك وعرووووض واهم شي ماتفوتون عرض الكوبوي رووووووعه والله مااوفيه حقه جميييييل للغاااايه
سعر الدخول للشخص 250 الف روبيه بس يستاهل

- حديقة الزهور حلوووووه مرررره فيها العاب بسيطه ومناظر حلووووه فيها قطار بسيط بس ممتع يدخلك شلالات بسيطه حلو عموما ، خذوا قهوتكم وانبسطوا بالحديقه لانها تستحق

- حديقة تشيبوداس روووعه اجلسوا تحت احدى الاشجار او عند بحيره صغيره خذوا معكم قهوه او شيبسات فيها شلالات بس اكتفينا بالجلوس وفيه واحد يأجر خيل ركبنا ولدي وانبسط

- شلالات شليمبر رووعه المكان لما تطلعوا فوق تلاقوا فيها استراحات بما ان الطريق متعب شويه وتلاقون كشكات يبيعون المويا واكل وشباشب بلاستيك اللي يبي يروح الشلال وكان لابس جزمه يشتري منهم

~ فيه اماكن مازرتها زي بحيرة الالوان والليدو وبحيرة كوتا بونقا لأنا انشغلنا ندور سكن وفيه اماكن اذا بتلعبون فيها والا مو لازم تروحون لها زي البراشوت وحديقة الفراوله اذا ماتحبون الفراوله ماله داعي تروحونها وحديقة متهاري اكثر العابها تنفع للأطفال اللي بعمر 7 سنوات تقريبا يعني مو مره هالمنتزه ..


ثانيا / الذهاب الى باندونق :
طلعنا من بونشاك صباحا والطريق طبعا ماتحسون فيه لأنه ممتع خضار رحنا الى لمبانق على طول وهي قريه في باندونق جوهاا حللللو وعليل وبالليل صراحه باارده
اخذنا منتجع روووعه قليله في حقه


الفنادق في باندونق
- المنتجع اللي قلت انه رووعه جادول فيلاج طبعا لهم موقع بالانترنت ونفس الصور بالضبط اخذنا فله ديلوكس بمسبح بس تراه ماهو ضروري المسبح اللي مايعرف يسبح لأنه باارد و فيه بانيو كبير وروعه يكفي السباحه فيه مثل حالتنا طبينا فيه كلنا لان المسبح كان باارد
فطورهم كان امريكي يسوونه لك من دون بوفيه
كانت الليله ب 850 ريال حجزناه عن طريق اجودا

- فندق سينسا رووووعه هالفندق من جمييع النوحي
بس باب الحمام سحب ومايتقفل اللي عندها ولد شقي الله يعيينها وحمام شطاف داخلي اكثر الفنادق في اندنوسيا كذا
بس انا اشوف الشطاف الداخلي حلو يغني عن اللي برا
بنفس الفندق سوق وفيه اغلب المطاعم رووعه وفيه خلفه شارع الجينز تقدرون تطولونه على رجلينكم
فطور الفندق رووووعه ونظيييف وفيه زيتون اهم شي فرحت لما شفت زيتون هههههه

- فندق جاليري سيمبلويت
حللللو هالفندق لأنه رخيص وبنظام الشقه ينفع للي عندهم اولاد وبنفس الفندق بعد اللوبي فيه بقاله وعندهم مغسلة ملابس
فطورهم عادي بس صرنا نشتري من البقاله ونفطر

الاماكن الحلوه في باندونق وتستحق الزياره
- ملاهي ترانس استوديو روووووعه هالملاهي سعة صدر وعروض هو ملاهي مسكر من فوق , مكيييف ومررره حلللو وفيه جنبه سوق فخممم وفندق رووووعه شكله . موجود في مواقع الحجز اسمه ذا ترانس لوكسري روووعه شكله بس للأمانه ماسكنا فيه
وعلى فكره دخول الملاهي للكبار والاطفال حتى لو عمره سنه 250 الف روبيه للشخص احسه ظلم بحق الطفل لأن مافيه العاب للاطفال الا حضانه او ركن صغير حق اطفال صغار مره

- بركان تانكوبان براهو حللو المكان وله هيبه ولما تطلع فوق فيه ناس تبيع تذكارات وشنط وذره وتشوف منظر البركان من فوق وممكن ينزلونك للبركان ويخلونك تسلق بيض وتحط قناع على رجولك من طين البركان ووو حنا مادخلنا بس بعدين ندمنا انا مادخلناه وتقدرون تخلون السواق ينتظركم عند البوابه تحت

- شلالات ماربيا قبل البركان وتراهم يقعون في لمبانق للاسف مادخلناه كان مغلق

- مطعم كامبونج داون شكله روعه دخلناه وطلعنا بنفس الوقت لأنه كان زحممه وحنا ماكنا جوعانين بالمره

وفيه اماكن اشوف انها عاديه مثل
- منطقة تشيبودي تبعد عن باندونق يمكن ساعه ونص فيها بحيرة الضباب وفنفس البحيره جزيرة الحب المكان عادي بس كان الجو حلوو جلسنا في الجزيره ومعنا قهوتنا
- ومنتزه ساري اتر او شياتر للمياه الحاره البركانيه جيناه وكان فل من الاندنوسيين يتروشون بكل مكان فيه غرف خاصه بس مااخذنا والا اختي راحت له بوقت دراستهم تقول حلو انبسطنا

- منتزه كامبونج جاجاه قريب من مطعم كامبونج داون في لمبانق المنتزه عادي ومالعبنا فيه كثير اكثر هالمنتزه العاب سيارات ودبابات وفيه 4d يعني شوفوا الالعاب اللي بتلعبوها وادفعوا لأنو فيه دفع يشمل العاب احس ماتستحق اللعب فيها

اخر شي ذهبنا من باندونق الى جاكرتا بالقطار بس تجربه مااعجبتني على انو كثيييييير مدحوه بس ماادري احس مو قد المدح وحتى تفشلت من زوجي لأني اصريت انا نركب القطاار وصار يقول هذا القطار اللي تمدحينه
اقولكم ليه مااعجبني اول شي ماهو مريح ازعاج ورجه قطار قديم وحنا ماخذين الدرجه الاولى بعد
ثاني شي مثل ماقالنا السواق مافيه مكان لشناطنا يعني تخيلوا شناطنا جنبنا في القطار مالهم مكان مخصص
ثالث شي باندونق تبعد عن جاكرتا 150 كيلو بالطريق السريع ممكن ساعه ونصف الى ساعتين بالقطار 3 ساعات
الشي الزين بالقطار انو مرينا باماكن خضار وطبيعه حلوه فقط


ثالثا / الذهاب إلى جاكرتا
جاكرتا حرررر ورطوووبه فظيعه وماكانت زحمه مره لأن وقت اجازتهم فأكثرهم رايحين للمدن الثانيه
طبعا اول ماوصلنا لمحطة القطار حصلت لنا سالفة نصب حنا حاجزين فندق قريب من محطة القطار لما ركبنا تاكسي بلو بيرد اللي افضل وارخص تاكسي عندهم اول ماعرفوا انو حنا بنروح لهذا الفندق صاروا مايبون يودونا لأن عندهم نظام العداد في التاكسي فمايبون منطقه قريبه لأنهم ماراح يستفيدون من المبلغ ركبنا مع واحد ويالله مشى فينا صار يسوي نفسه مايعرف الفندق وكل شوي يوقف ويسأل وهو كذاب اولا لأن الفندق عند سوق معروف وثانيا اكيد السواقين يعرفون كل شي وانا كنت مركبه برنامج خرائط ومعي نت وواضح موقع الفندق عندي قريب مره وهو يستهبل علينا اقوله لف هنا ويسوي نفسه مايسمع لف بنا جاكرتا حسبي الله عليه الين دخنا كل هذا علشان ياخذ فلوس زياده اخر شي يوم درا انا كاشفينه قام يحلف ويقسم انه مايدل المكان وهو كذااااب بس يالله حسبي الله عليه وبس

الفنادق في جاكرتا
لومير فندق عااادي الاستقبال حلو لكن من جوا عادي تقريبا قديم شوي حنا ماحجزناه الا علشان موقعه بالوسط وجنب سوق الاتريوم

الاماكن في جاكرتا
- منطقة انشول كانت زحممممه وحرررر ورطوووبه فظيعه لدرجة اننا دفعنا دخول للملاهي كان الشخص ب 250 الف روبيه ولا استفدنا لعبت لعبه وحده انا وولدي وزحممممممه يالله خلص السرا وطلعنا
دخلنا الاكواتريوم المكان مكيف وحلو ماعليه
دخلنا مطعم بندر جاكرتا للأسف كاان زحمممممه وحررر وماأكلنا منه


الأسواق في أندنوسيا بشكل عاام :
- أحسن الاسواق اسواق باندونق الفاكتوري اوت لت وهي الماركات بسعر مخفض المحلات فيها بضاايع حلوه ..
- سوق ملاصق لفندق سينسا الظاهر اسمه شيمبلاس وولك حلو فيه محلات حلوه و مطااااعم بيتزاهت وكنتاكي مليان مطااعم وكفيهات فيه بريد تولك وjco
وخلف السوق شارع الجنز صح عادي بس فيه شنط حلوه للطلعات الخفييفه وتندمت اني مااخذت منه زياده على بالي بلقى في جاكرتا بس للأسف مالقيت اللي بهالشارع احلى .
- سوق ملاصق لترانس استوديو في باندونق فخم وفيه الماركات زي مذركير وفيه العالميه زي فيرزاتشي وغيره حلو السوق بالذات لما تخلصي من الملاهي تروحون على السوق تمشية وتتعشون فيه فيه عدة مطاعم ومن اهمها بيتزاهت بس تراه بعيد عن المطاعم شويه عند احدى البوابات تلاقونه
- رحنا لمصنع الشنط في بوقور وفي باندونق عادي فيه ماركه للجزم حلللوه مررره بس لقيناها بالاسواق نفس السعر يعني ماله داعي تروحون له
- سوق في بوقور مقابل لحديقة كيبون رايا حلو فيه مطاعم وكفيهات
- سوق شيمباكاماس في جاكرتا حليو يعني تلاقون اشياء تنفع هدايا ورخيصه بس مافيها جوده مره
- سوق منقادوا itc فيه شنط رخيييييصه مررره بس جودتها ضعيفه فيه جزم وابواك وحاجات ماعليهاا بس مو مره
- سوق منقادوا سكوير احسه يوسع الصدر فيه كارفور وكنتاكي و باسكن روبنز وفيه محل فاكتوري او لت نسيت اسمه بس
الظاهر انه des او مقارب لهالاسم
وفيه فندق نوفوتيل بنفس السوق وفندق اماريس على مااعتقد ..
- سوق الأتريوم في جاكرتا حلو فيه محلاات كثيره فيها اشياء حلوه بس تقريبا اسعارهم زي اسعارنا وفيه مطااعم كنتاكي وبرجر كنج ومطااعم كثيره وكفيهات من ضمنها ستار بوكس وفيه سوبر ماركت وفيه بيتزاهت مقابل السوق عند البوابه وفيه العاب اطفال بسيطه وفيه محل ماماروتي او بابا روتي ماتفرق المهم يازين خبزتهم احبها وارخص من عندنا يمكن ب 3 ريال تقريبا وعندنا ب11 ريال

المطاعم العربيه اللي جربناها في اندنوسيا :
- مطعم الجزيره في بونشاك فخمم وكبير واكلهم حلو وجلساتهم رووعه وخصوصا انه فيه بالوسط العاب للاطفال وانت بمكانك تقدر تشوفهم
- مطعم كمننا في بونشاك حلو اكلهم بس الجزيره احلى
- مطعم ابو نواس في جاكرتا حلو اكلهم بس عيبهم الجلسات كلها مع بعض سواء للشباب او للعوائل هو عادي عندي مادام احنا بغرفه لنا بس زوجي ماحب كذا
وعلى فكره افتتحوا مطعم ياهلا الثاني فيه اخر بونشاك لأن المنطقه هناك مافيها مطاعم عربيه تقريبا عند فندق الياسمين وبالاس هوتيل يعني اقصد المنطقه البعيده ااااخر بونشاك تقريبا

- بعض المعلومات ممكن تفيدكم :
كل الفنادق اللي دخلنا فيهم يكون في اتجاه القبله ، والمساجد هناك متوفره بكثره وتسمع الاذان والصلاة بكل مكان وكذلك بكل منتزه يوجد مصلى يعني من هالناحيه رااحه

- افضل شي انكم لما توصولون هناك تشترون شريحه جوال اندنوسيه مثل ماسويت شريحة ب 100 الف معها نت وارتحت مررره انا اخذت الشريحه وزوجي معه رقمه السعودي الدولي .. اذا بغى يتصل داخل اندنوسيا ياخذ جوالي استفدت من النت ارسل بالواتس اب للأهل واذا احتجت النت بأي مكان يكون عندي وشي مهم انا في جوالي برنامج الخرائط استفدت مننننه كثثثثثير بأننا نعرف بعض المواقع وتقدرون تحفظون الموقع بنفس البرنامج بحيث انه يصير واضح المكان اللي تبونه وبعد نشوف كم باقي نوصل للديره الثانيه ووين موقعنا بالضبط صراااحه برناامج فادناا كثير وفيه كشفنا كذبة السواق اللي قلت لكم عليه في جاكرتا انصح الكل يكون عنده هالبرنامج ..

- الافياش اكثررررها 220 واللي يكون راسين مو الثلاثه

- في بقالاتهم اسكريم اسمه ماجنيوم روووعه لاتفوته عموما ايسكريماتهم حلوه بس هذا يجننننن
بعض عصيراتهم ثقيله تقريبا متوفر كل شي عندهم وشيبس شيتوس نفس اللي عندنا وبرنجلز

- متوفر هناك مطااعم عربيه كثييره فما له داعي تاخذون حوسة اكل كثيره الا اذا كنتوا كثاار وبتأخذون فله

- شنط السفر خذوا شنطة للأكل كنت حاطه فيها قدر كهربائي استفدت منه اسوي القهوه فيه ومره مالقينا مطعم وسويت فيه مكرونه بالتونه طبعا داخل الفندق عااادي
وشنطه للملابس ويفضل الشنط اللي تكون مغلفه ببلاستيك اللي تقدرين تفكينه انا اخذت وحده مغلفه والثانيه لا ، لكن عند العوده الى السعوديه صار فيه لخبطة بالمطار وتداخلت الشنط مع بعض وتأخرت واخر شي جت الشنط اللي مغلفه سليمه والثانيه مقطوعه من تحت وفقدت كاميرتي اتوقع انها طاحت من الشق اللي موجود في الشنطه .
واللي معاهم اطفال شنطه فيها كل احتياجات الطفل من ملابس وبربتوزات وشيبسات وعلاجات تحسبا لأي ظرف في داخل الطيااره وحاولوا تأخذوا كوايه صغيره في شنطة السفر لأني احتجتها من جد لما مالقينا مغسلة ملابس ماتندموا ان شاءالله لما تحطوها في الشنطه ..

وأخيرا.. أتمنى لكم رحله موفقه بأذن الله .. واتمنى دعواتكم لأبي بالشفاء العاجل .. في أمان الله