لكل أم تحب مولودها نصائح عن كل شيء وتجربتي بالكامل

بسم الله الرحمن الرحيم

متبارك عليكم الشهر الكريم ,,,,


كل يوم أقول بكتب لكم تجربتي من ولدت والتربية وكل مايختص بها


وعندي نصائح ذهبية أتمنى تفيدكم علشان لاتقعون في كل غلط وقعت فيه في طريقة اهتمامي بولدي

ومابذكرها لكم الا من محبتي لكم ,, طبعا أنا أم جديدة وماكان عندي خبرة في الأطفال ابدا الحين ولدي قريب عمره يصير 5 شهور الله يخليه لي ويحفظة


بس لو الزمن يعود لوراء امور كثيرة تجنبتها وصححتها


أنا بتكلم لكم عن ( المغص, الامساك , الامراض والأدوية , وأمور مهمه لكل طفل )



أنا ولدت في نص شهري التاسع في النص بالضبط

جبت ولد وكان وزنة 2400 وحجمه مره صغير وكان معاه صفار شديد
وولدته السبت ولا أخذته الا الخميس كان يخضع لعلاج الصفار تحت الاشعاع
ولما اخذته حاولت ارضعة طبيعي بس كان رافضه بشدة لأنه ولامره رضعته وهو في المشفى

واستمرت محاولاتي الكثيرة بس ماتقبله ورفضة واستخدمت له حليب صناعي


وهنا بدأت المعاناة ,,, لما اخذته من المشفى عطوني كم غرشة حليب بيبلاك مع انهم في الحضانة كانوا يعطونه اس 26 عادي شربه ولدي بس كان معاه امساك شديد اكتشفته من اول يوم

كان يصيح صياح ويرفع رجله ووجهه صار احمر وانا على بالي مغص وكان مسكين يخرج وانتم بكرامه

وكان برازه خشن مره وقليل ,, قلت يمكن من الحليب واخذت له حليب اس 26 وماتقبلة ورفض يشربه

والامساك طبعا ماراح رحت للدكتور اليوم الثالث من اخذته من المشفى لاحظوا اول يوم حليب بيبلاك ثاني يوم اس 26

عطاني تحاميل جلسرين وقال لي اخذ حليب سيميلاك او نان


واخذت حليب سيميلاك وبس يشرب شوي ولدي يصير مثل الطير يرفرف من قوه المغص ويصرخ


وكل وحده تجي زيارة لي تفتي على كيفها كل وحده تشتت وكل وحده تقول سوي له كذا وكذا وووو

بعدها بيومين من رحت للدكتور الاول رحت لواحد ثاني استشاري الناس تمدحه


وشرحت له الوضع ورفض استخدم تحاميل وقال مضره للطفل وشرح لي ليه مضره

قال نخليها هي الخيار الاخير ,, قال استخدمي حليب نوفالاك عن الامساك وعطيه شراب التمر


وعن المغص وصف لي دواء اسمه دنيتوكس


واستخدمت الحليب والحمدلله حصل تحسن بس سالفه المغص تعبت ولدي حتى الادويه ماكانت تفيد معاه


حتى شاي الاعشاب مايجيب نتيجة ,,, وارجع واقول كل وحده تجي تقول عطيه عن الامساك كذا وسوي له عن المغص كذا


وفجأة ولدي صار يصيح واحسه جوعان ويبي يشرب حليب بس من احط الرضعه في فمه يصيح ولايشرب حليب


ومن يشرب شوي مباشرة يرجعه مثل النافورة ,,, قلت يمكن من الحليب مع انه قبل ضابط معه


واخذت له حليب نوفالاك العادي ونفس الشيء واخذت له حليب ابتاميل ونفس الشيء يصرخ جوعان وبنفس الوقت احسه مو قادر يشرب


واخذته للدكتور وقال فمه مليان فطريات واللسانه يحرقه علشان كذا مايقدر يشرب ويرجع

وعطاني ادويه والحمدلله تحسن عليها وصرت اعطيه حليب ابتاميل وارتاح له

بس سالفة هالفطريات كان ترجع ماتختفي طفشتني

والترجيع صار يخف يوم ويوم ثاني يرجع وانا اعطيه في الادويه عن الترجيع وغيره


بس بشكل عام شرب ولدي للحليب قليل جدا وكنت كل مره اروح الدكتورة اقول له نفس الكلام

يقول دام وزنه يزيد عادي مافيه مشكلة


ولما ولدي صار عمره 3 شهور لاحظت عليه رخو ومايوقف رجله وراسه مو ثابت وجسمه ماشد


ورحت للدكتور وطلع ولدي رخو بسبب نقص فيتامين ( د) وكالسيوم لأنه مايشرب حليب كفاية

وقال لي استخدم له فيتامين د نقط وعلمني تمارين اسويها له


والحمدلله الحين تحسن بس بعده ماشد مره بس تحسن


بعدين قلت للدكتور ابي اغير حليب ابتاميل ورفض قال شركه معروفه وحليب ممتاز خليك عليه

وأنا كنت ابي اغيره لأني قلت ممكن شربه قليل للحليب مااعجبه مع انه مرتاح له


وسمعت من وحده عن تحاميل عن الترجيع تقول استخدمتها لولدها وارتاحت

وقلت للدكتور اب ياستخدمها ورفض قال ولدك صغير وبتعالجين شيء وبتسببين شيء ثاني وهو الاسهال

وان التحاميل راح تجيب له اسهال



وقدر الله وشاء نسافر انا وزوجي لنيوزلندا


ولما جيت هنا مافيه حليب ابتاميل واخذت له حليب اس 26 وبعدين اخذت له نوع ثاني وخبطت بطنه مره استخدم اس ومره الثاني لانه مو مرتاح على الاثنين

والمشكلة هنا مافيه انواع كثيرة للحليب


المهم اخذته كم مره لكذا دكتور علشان المفروض يتطعم حق 4 شهور وللحين ماتطعم وقريب يصير عمره 5 شهور

والسبب انه مريض كحه وبلغم وزكام وكان اسهال وبرازه اخضر زيتي


كل اللي رحتهم رفضوا يصرفون ادويه وقالوا هذا فايروس وبيروح من نفسه


الحين هو تحسن بس الكحه بعدها موجودة مع انها خفت عن اول بكثير وصدره فيه خرخره


حتى رحت لدكتورة عربية هنا معروفه وقالت لي نصيحة مني لك


الأدوية خطيرة على طفل ماتعدى السنتين تقول خطيرررررررة كلها مواد كيماويه وتضر الطفل

كثرة المضاد تأثر على مناعة الطفل والطفل مناعتة ضعيفة

وكلهم قالوا لي نفس الكلام ,,, بس نقدر نستخدم لهم خافض الحرارة ومسكن الألم


وعلى الترجيع قالت كل طفل يرجع لأنه معدته لسى مااكتملت وبعده ماتكون عندهم الصمام

ونحكم على الطفل اذا كان التجريع يحتاج الى دواء من ناحيتي


الاولى اذا كان ترجيع الطفل مسبب له ضعف ونقص بالوزن

والثانية اذا تعدى 6 شهور وبعده يرجع



المهم خلاصه كلامي كله بحطها لكم نصائح :


1- اذا جيتون تجهزون ملابس للطفل لاتسوون مثلي كنت اقرأ الطفل بسرعه يكبر وناخذ من 0 -3
وبعدين تورطت ولاشيء يجي قد ولدي لانه صغير مره حتى النيو بورن ماهو قده واضطريت اشتري جديد للخدج

يعني بالفصيح اذا ماكنتي وش طبيعة الوزن والحجم اللي راح تجبيه لاتكثرين ملابس



2- لاتعطووووووون الطفل شيء غير الحليب والماي بعد الحليب علشان لايتجمع له الحليب في فمه ويسبب له فطريات ,, واذا بتستخدمون اعشاب اخذوا اللي بالصيدليه المختص بالطفل


3- لاتسمعون كلام فلانه وعلانه وتشتتون البال وتتتعبون


4- كل طفل يعاني من المغص يعني لاتحسبون الامر شيء مو طبيعي ولاتكثرون من ادويه للمغص

5- الأدوية ابتعدوا عنها قد ماتقدرون ترى اطفال كثير ماتوا والسبب ادويه الطفل مايتحمل

6- لاحظوا الطفل الأم هي الوحيدة اللي المفروض تقدر تلاحظ على طفلها أي تغير أو اي شيء فيه
مثلا : حسيته رخو مثل ماحسيت لولدي لاتهملينه من البداية علشان لايصعب بعدين العلاج


7 - لاتسوون سواتي وتتعبون طفلكم من كثرة تغيير نوع الحليب

8 - لاتعطون الطفل أكل وهو ماخلص 6 شهووووووور انا كنت متشوقه ولدي يصير 4 شهور واعطيه

بس مسكين تعبته وهو اساسا رفض الأكل ,, وحصلت لي تهزيء من كم دكتور

وارجع واقول الطفل معدته مااكتملت وتتعب بس احنا مانحس




والحين ولدي يصيح اذا تذكرت شيء كتبته لكم


مع التحية
أصيلة