لكل أم تشتكي من شعر بنتهه الخشن و المجعد

السلام عليكن يا حلوات....إشلونكم....

لكل أم تشتكي من شعر بنتهه, ولدهه,الخشن و الصعب,

أسهل شي, وطريقة سهله و مضمونه إن شاء الله لتنعيم الشعر...

1-إخلطي بنسب متساويه من زيت اللوز وزيت السمسم و زيت براشوت اللي ينباعون في السوبرماركت صوب زيوت الطبخ...
2- أول إسبوع, فرقي شعر بنتج ودهنيه لهه, عجفي لهه عجفتين...خليهه تنام فيه.
3- ثاني يوم, فتحيه لهه ونسليه شوي ..( قللي من نسالج لشعرهه), وردي عجفيه لهه
4- ثالث يوم غسليه بشامبو بانتين, ومسحيه بفاشكول الناريل أو اللوز, وكت اللي إنتي تفركين جسمهه, وبعدين غسلي شعرهه.
5- قبل لا ينشف شعرهه, خذي (شوييييية ) من زيت اللوز وفركي فيه شعرهه شوي شوي, ربطيه بأستيكه ولفيه كعكه, ومن جدام لبسيهه إشارب حلو ملون وربطي الربطه تحت الكعكه... شكلهه بيطلع حلو و مرتب.
6- ثاني يوم إذا تبين تنسلين شعرهه , بعد مسحيه بزيت اللوز و سرحيه نفس الشي...
7-إذا غسلتي شعرهه يوم الجمعه, إبتدي يوم الأثنين وحطي الخلطه مثل ما بديناهه, تجلس يومين بالشعر(الثلاثاء والأربعاء)
8-الخميس تغسلينه وتسوين لهه نفس التسريحه.
9-الأحد تردين تحطين الخلطه...وهكذا...
يعني 3 أيام الشعر بس يتزيت بزيت اللوز الخفيف, و رابع يوم الخلطه, وتجلس فيهه يومين كاملين, واليوم الثالث تنغسل... إلى إن تشوفين شعرهه بإذن الله لان و طول وصار إشحلاته....بس أهم شي تتبعين الأمور هذي:

1- سمي بإسم الله دايماً على راس بنتج...
2- لا تغسلينه كثير.
3- لا تحنينه, لين تشوفين شعرهه لاااااان من الزيوت, و إذا حابه تحنينه بعد على الأقل 3 كورسات, حطي لهه روب في الحنه
4- إشتري مشط من الزين و أسنانه عريضه علشان ما يألمهه شعرهه و إنتي تنسلينه
5- لا تنسلين شعرهه كثير
6- واضبي على هالخلطه , ولا تغيرينهه,خاصة إذا لاحظتي إن شعر بنتج تحسن معاهه, والنتيجه إن شاء الله من أول 5 خطوات بتلاحظينهه, وبيتحسن مع الوكت, ولا تنجرفين ورا زيت جديد سمعتي عنه وناسب غيرج...وخاصه للبنات الصغار الواحد ما يخربط بشهورهن, وخلج على الزيوت المعروفه , وإاللي متوفره كل وكت إن شاء الله إذا إحتاجيناههه.
7- لا تكرهين بنتج بريحة الزيت, وبيني لهه إن شعرهه بصير ( إجنن) بهالخلطه.
8- تحملي أحد يقص عليج و يقول لج ملسي شعر بنتج, أو ريلاكس, أو تمليس خفيف, أول شي البنت عينهه بتقوه, وثاني شي بيحترق شعرهه, خليهه عى برائتهه, وإستخدمي الزيوت لهه, وإن شاء الله بتنفعهه أكثر من الكيماويات اللي بتحرق فروة راسهه وشعرهه بعيد الشر..
9- وأهم شي, رفعي معنويات بنتج, وحسسيهه إن شعرهه بالأصل حلو, علشان ما تتعقد البنيه...

وسوري إني طولت عليكن...

وإن شاء الله تستفيدون...

والسلام....