لكل اصحاب المخزون الضعيف يجمعوا هنا،،،

السلام عليكم
مبدايا كدة انا بعد ما الدكتورة شخصت حالتي من سنة اني سن ياس مبكر وضروري حقن مجهري و فورا، بقيت دلوقت زي الفل وهحمل طبيعي باذن الله
من سنة amh =0.64 ودلوقت amh=1.44
يعني الهرمون بيزيد يا جماعة واللي يقول مبيزدش يبقي مبيفهمش
الهرمون بيدل علي جودة البويضات مش عددها بس
يعني لو عندك بويضة واحدة بسسسسسسس جودتها تمام التمام هتحملي طبيعي
انا بسبب كلمة سن ياس مبكر دي قلت لزوجي اتجوز، وفضلت ف اكتئاب وفقدان ثقة ف النفس وبلاوي نفسية بسبب التشخيص دا وبسبب ان دا ملوش علاج غير حقن مجهري ويا ينجح يا مينجحش
يا اخواتي اصحاب المخزون الضعيف متزعليش انتي زي الفل والله بس الدكاترة بيسوقو للعمليات عشان الفلوس بس
انا انهاردة روحت للدكتورة بالتحاليل الجديدة واندهشت وقالتلي حاسة اني ببص لتحاليل واحدة تانية غيرك

وقالتلي انتي عملتي ايه ف السنة دي يخلي التحاليل تتغير كدة
ف بصو بقي
الاول كان عندي كيس وظيفي ودا كان مخلي التحاليل القديمة ضايعة
ف اول حاجة ساعدت ان التحاليل تظبط هو اني شلت الكيس بعملية منظار
ثانيا غيرت نظام الاكل تماما
باختصار منعت السكر والدقيق من اكلي
اي حاجة فيها سكر او دقيق ابيض منعته
ومنعت اي حاجة مصنعة بالذات الدهون المهدرجة والمكررة
وبقيت اجيب السمن البلدي من الفلاحين
واللحوم بقيت اجيب الفراخ بلدي واللحمة بلدي من جزار انا واثقة فيه
وبقيت اكل بيض بغباء ويستحسن بلدي
ويوميا باخد فيتامينات (سي ريتارد /اوكتوزنك/فيتامين e/فوليك اسيد و دا مهم جدا) وطبعا في فيتامينا مهمة جدا ممكن تجيبيها او تاكلي الاكل اللي موجود فيها زي اوميجا 3 و رويال جيلي وكدة
وحاجة بقي مهمة انا لو كنت عملتها من الاول كان ممكن الهرمونات تظبط في شهرين تلاتة بدل سنة
وهي خلطة عسل نحل حبة البركة
الخلطة دي اعتقد هتفرق جااااامد ف تنظيم الهرمونات ورفع الخصوبة عندنا
انا جبت كيلو عسل نحل حبة البركة وعليهم 50 جرام طلع نخيل و 50 جرام حبوب لقاح و 10 جرام غذاء ملكات النحل
وبقيت استعمل دبس التمر للتحلية او معلقة كل يوم لانه بيحتوي علي فيتامينات جبارة للصحة العامة
انا بقالي اسبوعين بس بستعمل الخلطة دي مع الاستمرار اعتقد اني هبقي احسن واحسن كمان.
انا عارفة احساس ان الواحدة تبقي سن ياس مبكر وخصوبتها ف الارض ولازملها حقن مجهري، لكن ارجوكم متسلموش نفسكم للدكاترة لانهم شايفينا فلوس مش مرضي، هيسيبونا بنعاني عشان نضطر لعمليات وبالتالي يدخلهم فلوس،
تفاااااااءلو خيرا واصبروا لحد ما ربنا يفرجها ويشفينا
انا لسة محملتش بس هصبر وادعي ربنا لحد ما يكرمني بحمل طبيعي ان شاااااء الله انا وكل مشتاقة للذرية الصالحة
كل دا اخذ بالاسباب يا جماعة انما الدواء الحقيقي هو القرب من الله والدعاء واننا نؤمن اننا ضعفاء فقراء وربنا هو القوي الغني، احنا امرنا ف ايده لو اراد هنحمل ولو لم يرد مش هنحمل
بس لازم ناخد بالاسباب لانها سنة النبي وهو اللي علمنا نتوكل مش نتواكل، مينفعش نقعد مستنيين ربنا يشفينا كدة لا لازم اخذ بالاسباب (وآتيناه من كل شئ سببا فأتبع سببا)
بإذن واحد أحد ربنا لو كتبلي احمل هاجي ابشركم هنا....
هطلب منكم تاني بلاش تزعلو، انتو كويسين والله وتمام خدوا بس بالاسباب وقربو من ربنا واعرفو ان دا اختبار ولازم تنجحي فيه و توري ربنا افضل ما عندك من ايمان وصبر وثبات
الادعية والقران والذكر وكدة مفيش حاجة محددة للحمل السريع والكلام دا، قربي من ربنا وبس
قربي بصيام بصلاة بتلاوة قران بحفظ قران بدعاء بصدقة
زي ما ربنا يفتح عليكي قربي اهم حاجة نية صادقة
دعواتكم ليا ربنا يتم شفاه عليا واجي ابشركم بالحمل عن قريب ان شاء الله