صباح ومساء الخير للكل
مدري طقت براسي انزل لكم موضوع وان شاء الله يعجبكم وتستفيدون منه ..
ام ليان عندها 4 عيال بنتين وولدين
معزومه للإستراحه جالسه ومعها فرشاة الشعر
الأم :فجر تعالي اسرح لك شعرك
فجر : ماما خلي ليان اول
الأم: لا انتي اول عشان شعرك حلو وناعم بسرعه بيتمشط
ليآن : تطالع في امها .. ماما انا مشطيني
الأم : انتي شعرك ليفة قدوريبغالها ساعه كريم
وتمشيط خلي اختك اووول ..
ليآن : <~ راحت تبكي
ام امل راحت عند جاراتها واخذت بناتها معها اكبر بناتها امل في صف رابع ابتدائي ..
جالسه تتقهوى مع جاراتها وبنت جارتها بسمه عند بنتها امل يسولفون بصوت عالي عن المدرسه ..
ام امل : تطالع بنتها امل ياحليلها تحب تسولف ياماما وشرايك تروحين هناك عند خواتك انتي وبسمه ..
امل : يمه بزارين مايريحونا <~ مسويه عمرها كبيره خخخ ..
ام امل : ايه بزارين وانتي الكبيره انتي وبسمه اذا رحتي عندهم انا بطمن عليهم لأني ادري انكم بطلات وعاقلات ..
امل : طيب ياماما <وراحت تركض مستانسه ومعها بسمه
من خلال قرائتي عن بعض المواضيع عن الأطفال طفلي ضعيف الشخصيه او طفلي يتبول في فراشه طفلي خجول .. طفلي عدواني مع اخوانه ..
قررت انزل الموضوع لأن التربيه وزرع الثقه تبدأ من الصغر .. فـ إذا اهنتي طفلك امام أي شخص كان
او ضربتيه قدام احد .. او عايرتيه يالأسمر .. يالدب .. يالغبي .. ....... الخ .. او ميزتي احد اخوانه وماعدلتي في المعامله .. فلا تلومين الا نفسك ..
لاتجعلين ضغوطاتك النفسيه والتعب البدني متنفس لك لتدمير نفسيات اطفالك ..
تأكدي وثقي ان الطفل الذي بين يديك فهو امانه في عنقك فحافظي على الأمانه التى وهبك الله إياها واحمديه واشكريه على نعمه ..
نصآئح هامه ..
ابعدي طفلك عن البلايستيشن وافلام الكرتون
ابعدي طفلك عن الأطفال الفاظهم غير لآئقه
ابعدي طفلك عن مسلسلاتك لا تجعليه يتابع معاك
ابعدي طفلك عن مشاكلك الشخصيه مع والده حتى لا تتأثر نفسيته وإحساسه بعدم الإستقرار
همسه في اذن كل ام : عودي طفلك على احترامك وتقديرك واحترام والده ..
عودي طفلك على مساعدته لك في المنزل وشكره وثنائه ...
عودي طفلك على قراءة الأذكار معاك ونظافة اسنانه
عودي طفلك على النظافه والإستحمام وخصصي له عطر خاص وفرشاه خاصه وبآودر خاص وعوديه من الصغر ..
عودي طفلك على حفظ بعض السور القصيره وبعض الاذكار
لقبي طفلك بلقب يعزز مهاراته .. دكتور_ طيار _ ضابط _ رسام ..
عودي طفلك على الإعتذار والبوح لك بما يشعر فيه
عاملي طفلك بأنه شخص بالغ واحترميه وشجعيه
عودي طفلك على حب اخوانه ومعاملتهم معامله
حنونه فيها الحب والإحترام والدفئ
اشتري لطفلك كتب للتلوين وقصص مصوره
واشرطه افلام كرتون اسلاميه تعوده على مبادئ الأمانه واحترام حقوق الجار _ _ وإزالة الأذى عن الطريق _ والصدق _وبر الوالدين
واخيراَ :
كوني قد الأمانه و مربيه ناجحه وام صالحه
وحققي لأمتك اهدافاَ ساميه وجيل صالح ..
اذا اعجبك موضوعي ادعي لي باالتوفيق والسداد .. اذا استحق الشكر فأضغطي على الأيقونه :)
الموضوع جهد شخصي فأذكري المصدر اخيتي عند نقله وفقك الله ..
اختكم : ورود الفرح
يعطيك الـع ــآفيه
شهد الجهني