لكل ام يعاني طفلها من الكحه والكتمة والترجيع ( تجربتي مع اوراق الجوافه)

السلام عليكم ورحمة الله وبركاته

كح كح كح كحححح كح كح كح كحححح وتستفرغ

هذه حال بنتي من يوم هي مولوده فيها كتمة وتكح لما تستفرغ

صرت انام وانا قلبي معها وطاستي عند راسها لانها عذبتني بالترجيع

المهم مافي نوع مموسع شعب الا وجربناه والاكسجين دايم تاخذه يريحها كم ساعه وبعدين ترجع لنفس حالتها وادويه الكحه ومضادات الهستامين ماتنفع معها
المهم مالكم بالطويله العام قريت عن اوراق الجوافه
وفايدتها للكحه وماصدقت خبر رحت لاقرب عطار وشريت اوراق جوافه مجففه وطريقتها

طبعا تاخذين تقريبا ملعقتين كبار ورق وتحطينه بكوب وتصبين عليه مويه مغليه وتتركين لين يصير حرارته مقبوله لطفلك صفيه وعطيه يشرب

طبعا بنتي ماتحبه الا اذا حليته فاحط فيه سكر وتشربه بالرضاعه وبديت اعطيها من عمرها سنه والحمد لله الليله اللي تشربه تنام مرتاحه لاكحه ولا كتمة ولا ترجيع

حبيت افيدكم اخواتي لان من جد جاب مفعول معها ماشاء الله وارتاحت معاه واتمنى يفيدكم هالموضوع

وبالاخير ادعو لي ربي يرزقني بالحمل عاجلا غير اجل ويهدي اطفالي ويخلي لي زوجي