لكل محرومه لاتيأسي

*خواتي الحبيبات* صباحكم رضا وطاعه_
أول شيئ أنا جديده ع المنتدى فوجودي لكني متابعه لكن من خلف الكواليس وصراحه الي شدني لكم هو حبكن لبعض وشدة ترابطكن ومساعدة الواحده منكن للأخريات وتعاملكن مع بعضكن البعض كأخوات صادقات ناصحات أسأل الله أن يجعل هذا في ميزان حسناتكن
جايتكم اليوم ومعاي بريق أمل عشته أنا فذاتي لحد مافرجها ربي علي وهم يقولون فاقد الشي لايعطيه وأنا اقول فاقد الشي يجده عندالله ومثل مايقولون ومن وجد الله فماذا فقد وأنا ماراح اطول عليكم وبعطيكم هالأمل بس ابيكم تربطونه فالتفاؤل أختكم ومحاكيتكم عاشت نفس معاناتكم ولسالفتي الميك عشان تفهموني اكثر
أنا اختكم فالله نخطبت لولد عمي وفرحت زي ماتفرح اي بنت ولد عمي كان وحيد أهله ماكو صبيان غيره تم كل شي ع خير وتزوجنا وبعد شهور من الزواج بدت تلميحات الاهل الي ماتخفاكم طبعآ "متى بيأتي اللافي متى بينور بيتنا المزيون"
وأنا وربي كنت اقول إن شاءلله ع خير وأنا مبتسمه وفخاطري ادري انه تو الناس سوينا تحاليل عشان نرضي الأهل والحمدلله كانت النتيجه سليمه من الطرفين
بس مرت سنه وسنتين وثلاث وو و وسبع...والله ماكتب وطبعآ الحكي كان يزيد فكل فتره جرعات مجرحه وداميه وأنا لازال عندي أمل فالله ثم بفضل أمي الي كانت تحثني عالصبر والرضا بما قسمه الله زرت مستشفيات كثيره فالكويت وبرى الكويت وهم الله ماراد خذتني الوالده من كثر حكي النسوان للحريم اربع وخمس ويمكن عشر وكلهم يأخذون المطلوب ويوصفون اعشاب وخرابيط ومواعيد وبالأخير الله المستعان ع كل حال
ماودي أوصف لكم حالتي عشان لاحطمكم وأنا راجيتكم بالتفاؤل
بس استغفرالله فعلآ كنت خلاص بفقد الأمل وكنت بيأس لكن زوجي الله لايحرمني إياه كان دايمآ يذكرني بقصص الانبياء والصالحين وعظمة صبرهم وتحملهم وأنا أستقوي منه مع إني عارفه شكثر أهو يحب الاطفال وإذا جو اعوال خواتي اوخواته يبوسهم ويضمهم ويأخذهم فأحضانه ويدلعهم ويشتريلهم عاطفته جياشه ناحية الاطفال أه يابنات ياكم تمنيت اسعده واحقق له حلم الأبوه رغم حبه للاطفال بس عمره ماجرحني ولاأمتن علي بهالشي ولاقال بتزوج وأجرب نصيبي مع ان أمه الله يسامحها وانتم أدرى فحكي النسوان كانت دايم تدق فالحكي وتقط علي نغزات وعليه هوبعد متى بشوف اعوالك يعني بتحرمني هذا وأنت وحيدي والشرع حلل اربع وكان رد حبيبي عليها الله كريم يمه وسمعتها كم مره وربي من غير قصد وأخر مره كانت تقوله بخطب لك من ال فلان وإلا ال فلان وإلاحدد اي بنت بالديره وبخطبها لك ألمهم تزوج وكان رده مافي بنت عمي ردى ولاقصور عشان اطق بيبان خلق الله جان تقوله هذي شمسويتلك ساحرتك كان يرد استغفري يمه لاتبلين المسلمه فلانه تخاف الله وماتعرف هالسوالف فترد تخاف الله ماقلنا شي لكن تقطع نصيبك واهي ماتييب عيال هذي الي ماأرضاها كان يرد لاتكفين يالغاليه لاتقولين هالكلمه ويستجيبها ربي علي وإنت ماتدرين العيب فيني وإلافيها وإلا يبلا وحده من خواتي وتحسفين لاتقولين كذا يايمه ماعلا ربش مستحيل،
أكيد بتسألوني عن حالي
( واهي ماتييب عيال) هالكلمه يابنات ذبحت فداخلي كل أمل كنت اتصبر عشانه ونزلت دموعي غصب عني رحت صوب داري وفرشت سجادتي وصليت ركعتين كان دعائي فيهم دموع ماقدرت أنطق كلمه وحده بس كانت دموعي متواصله صدقوني يابنات أن أعظم جرح إنك تجرح انسان فشيء صار له من غير ذنب سواه
دش حبيبي الدار مبتسم كعادته وكان حاس فيني فلانه شفيش عسى ماشر عيونش متفخه وخشمش احمر كنش فلبينيه"وكان من طبعه المزح الي يخفف علي همومي فديته" طبعآ مارديت مارديت نطرته ليما يجلس وأول ماجلس طحت عند رجوله وبست رجله وأنا ابكي وقلت تكفى ياولد عمي أنا طالبتك خذا إيدي وقال قدرش عالعين والرأس يابنت عمي وابشري بسعدش بس هذا مهوفمكانش تعالي فحذاي وقولي مطلوبش قلت والله مابعد أتحرك ليما تحقق مطلبي خذفأيدي وقال يافلانه تعوذي من الشيطان وادحري ابليس ولاعاش من ينزل دمعتش وأنا حي لوكان أنا فرديت لوكنت أنت قال لوكنت أنا فقلت أنت الي مزعلني ومنزل دمعتي قال افا ياذا العلم وشني مسوي والله أخبر اني طيب وحبوب وما آذي أحد قلت وإن جينا فالجد قال عيوني لش قلت ماتبي اعوال قال لا قلت احنا قلنا جد فقال اي وأنا احكي جد مابيهم إلا منش فقلت وأنا ابكي وأنا ماجيب فصرخ علي استغفري فرديت عليه بصراخ يخالطه بكاء>>لايفوتكم التعبير
وهذا الصدق 7سنوات زواج ولاحتى حمل كاذب ولاطرح ولا أعراض حاول إنه يتمالك نفسه وقالي يافلانه هالشي من ربش لافيدي ولافيدش أحنا ربش يحبنا لانه مبتلينا والله إذا حب عبد أبتلاه رديت 7سنوات رد بصبر وأكثر واكثر يافلانه قلت بس أنا ماراح أتحمل وأنت لازم تتزوج وياتيك اعوال رد بتطنز أي صح أهي مخبيتهم وياها وأنتي ناطلتهم وش الي يضمن لش ان بيأتي لي اعوال فرديت الله كريم فقال وماتعلمين نفسش 7سنين وأنا أكذب ع نفسي وكل يوم اقول بكره احلا بس طفح الكيل فرد استغفري ربش ولاتعترضين ع حكمته لحظتها حسيت انه بارد ماعنده احساس مع إن الصدق أنا الي ماعندي احساس فلحظتها وصرخت فوجهه وقلت لوماتزوجت بتطلق قال ومن قال إني بطلق قلت ماراح تجبرني علا العيشه كذا (أنا بعد بتزوج وأشوف نصيبي وابي ضنا) لحد يقسا علي يابنات لأني لحظتها كنت وربي اكذب ابيه يتزوج بأي طريقه ماتتخيلون شكثر كلمتي جرحته وتغير وجهه وبان عليه الضيق
وخذا غترته وطلع وتركني اتصلت عليه اكثر من مره مارد علي انشغل بالي وخفت عليه وجلست أحاتيه ومارتحت ليما وصلني مسج منه أنا فالمسجد بنطر صلاة الفجر نامي ولاتحاتين
رد بعد صلاة الفجر وكان وجهه ينور وغير عن حاله لما طلع خذا مصحفه وأول مافتحه نطيت عنده وحطيت إيده عالمصحف وقلت احلفلك بالله والي فيدك أعظم أياته تزوج يافلان تزوج
سكت وبعدين رد وقال كل هذا ميته ع فراقي وتبين تزوجين غيري يافلانه
كابرت وقلت من حقي أصير أم وانت من حقك يكون عندك عيال قال فقلة حيله ماكو حل ثاني فرديت إذا عندك قول فرد الله المستعاان بس زواج ماراح أتزوج فرديت وأنا جلوس ماراح أجلس عندك راح أخذ عفشي وأروح بيت هلي فرد وليش كل هالعذاب قلت عشانك ماراح تزوج ولاتبي عيال فرد وأنتي فقلت عيالك عيالي وفرحتك هي فرحتي فقال أنا شاريش ولابي بعادك قلت وأنا مقدر أتحمل اشوفك فحضن وحده ثانيه وأنا ع ذمتك فقال تحبيني وتبيني أتزوج فقلت الي يحب يدور سعادة محبوبه والحب هوالتضيحه ومايصير حب وأنانيه لازم واحد فينا يضحي نزل رأسه وهذي أول مره أشوف دمعته غير لماتوفى أبيه الله يرحمه وقلت تبكي يافلان وأنت الي دايمآ أتقولي دمعتش لاتنزلينها إلا علا غالي قال وأنتي غاليه يابنت عمي وأنا معاهد نفسي طول فترة 7سنوات ماجرحش فكلمه من ناحية هالموضوع ولاأشغل فكرش فيه مسحت دمعته وبسته ع رأسه وقلت إذا أنتي تغليني مره فأنا أغليك مليون ألف مره لكن أنا ابي اسعدك وتكفى لاتردني فقال خلاص بس عندي شرط قلت موافقه من غير لاتقول حسيت انه حز فخاطره إني ابي فراقه لكنه واصل كلامه وقال أجلي هالموضوع لحد مانأتي من العمره ومابيش تخبرين فيه اي مخلوق وجهزي نفسش لانا بنروح العمره بعد باجر فقلت إن شاءلله
فثاني يوم كان موعد الزواره وجمعة حمولتي وكنا جالسين فجتني بنت حماتي الصغيره وباستني وأنا بستها وخذيتها فحضني فقالتلي بهمس خاله أنا أحبك بس وفجأه سكتت فقلت بس شنو حياتي فقالت أمي العوده تقول انك ماتجيبين بزران صدق انتي ليش ماعندك بزران فكابرت والدمعه فعيني وأبتسمت وقلت الله كريم ياعمري وبعد ماذن أنا دشيت عشان أصلي فرضي ولما رديت كانت عندنا وحده هذي معروفه باستجابة دعواتها ماشاءلله عليها فأنا كنت توبدش إلا خالتي تقول ميدها بيروحون العمره أدعي ياآم فلان عساهم الحادث الي مايسلم منه إلا وليدي ويطيعني وأزوجه واشوف ضناه فردت عليها المره اذكري ربش يامره واستغفري بلاه من الشيطان تدعين علا المسلمه عشان شي مهو فيدها إلاقولي يالله يارب فعزتك وقدرتك ماترجع من بيت الله الاوربش مفرحآ قلبها فالحمال ورديت أمين فخاطري قلتها من كل قلبي وكابرت وضغطت ع نفسي ودشيت وسلمت وضحكت وجاملت وووو وكل هذا وأنا فداخلي يشهد الله مجروحه...
(وكل ماقلت هانت زادت علي الناس جروحي
إلاياقدر متى بتشعل بالأمل ضوي
سكنت حزنك بين صدري وأقصى معاليق روحي
وعيشتني فجوآ ماكان للأسف جوي
ألايارب المخاليق يالي تسمع دعاي ونوحي
فحكي عبادك وش ردي ويش اسوي
القلب لوسهى وتغاضى فالأذن توحي
والعين من سكايب دمعها تهيض وتروي)
بعد مارحت داري حاولت اكون طبيعيه ولا أخلي حبيبي يحس بشيء يكفيه الي فيه ورتبت اغراضنا وجهزت الجناط عأساس بكره أن شاءلله العزم للعمره
ومن بكره فعلآ مشينا العمره والحمدلله كانت عمرتنا ميسره وسهله عسى الله ييسرها لكم يابنات ولكل مسلم ومسلمه خذينا يومين كانت من اروع مايكون هدت النفوس وصفت الخواطر سبحان الله صدق وهوالقائل في محكم تنزيله"آلابذكرالله تطمئن القلوب"دعيت لنفسي ولكل محرومه بأن الله يرزقنا وألحيت فالدعاء
وإحنا فالطريق معودين قالي زوجي بنروح عند عمتي فالوادي نسلم عليها وهذي طبعآ ديرتنا اسمها وادي العجمان>>حياكم بنات سيروا علينا
وفعلآ رحنا الوادي وجلسنا هناك يومين وكنا مقررين نمشي باجر وفالليل كنا جالسين سهره عائليه نفس مايقولون فحكت عمتي عن وحده كانت من جيرانهم وشدوا فكان لها 30سنه متزوجه وماحملت وسبحان الله تو مبشرينهم جابت ولد أنا حسيت السالفه ميدي واسمعي ياجاره وقلت فخاطري مافيه سلامه حتى اهني دق فالحكي زوجي شده الحكي وقال ماشاءلله وماتدرون شلون حملت فقالوا بلى إنها تعالجت عند وحده هني مره ماشاءلله عليها مصليه ومسميه وتخاف الله فرد الله يسترعليها ويرزق المسلمين وحسيت فنظرته حكي وده يقوله لما رحنا نرقد قال ماشاءلله سمعتي سالفة جارتهم فقلت اي ماشاءلله فرد شرأيش فقلت رأي فأيش فقال نجرب نصيبنا فقلت لا وألف لا خلاص الي شفناه وسويناه كافي وهذي اكيد وحده نصابه نفس الي قبلها وأنا تعبت من سوالف الحريم وخرابيطهم فرد بيأس وشلون نصابه وجارتهم حملت طيب وإذا قلت لك عشان خاطري فرديت خاطرك ع عيني ورأسي بس أنا تعبت ارحمني وبعدين انت تبي عيال وإذا ردينا بتزوج وإن شاءلله بياتونك ليش تعذبني وتسويني حقل تجارب عشان سعادتك فرد وأنا سعادتي معك جربي هالمره ماراح نخسر شي نجلس يومين زياده وبقول لعمتي توديش لها فقلت طيب بستخير وإذا مارتحت ماتجبرني فأستانس حيل وقال خلاص اتفقنا وفعلآ يابنات استخرت قبل لانام الفجر وحسيت براحه عجيبه واستخرت بعد ماصحيت وجاني حلم حلو ولما صحيت حسيت بسعاده عمري ماحسيت فيها وحمدت ربي ان هداني للخير وفعلآ قلت ميد زوجي اني موافقه أروح للمره وهوماصدق خبر ع طول قال ميد عمتي وعمتي رحبت بالفكره وفعلآ رحنا للمره المذكوره ورب البيت يابنات من أول مادشيت بيتها حسيت فراحه عجيبه وكانت مره طيوبه وحبوبه ورحبت فينا وأعجبتني فكلامها لما قالت يابنتي أنا ماني فربك والرازق هوالله لكن أنا من بعدالله سبب من الاسباب وعسى الله يوفقني ويسعدني ويكتب ع يدي سعادتك وبسعادتك ودعواتك يرزقنا الجنه أرتحت لها حيل وخذيت دواها من دون اي تردد مع إني كارهه خرابيط الحريم ورديت لزوجي الحبيب الي كان ناطرني ع احر من الجمر ولما ردينا ديرتنا وبالتحديد بيتنا وبعد يومين لملمت أغراضي ورحت بيت هلي>>ولحد يزعل مني نفسيتي أوكي ومابي شي يخربها وأتفقت مع زوجي بعد شهر برد منها نفكر فموضوعنا بشكل اكبر ومنها أستخدم العلاج الي خذته من المره
وبعد شهر سمعت من الناس إن خالتي تدور عروس لزوجي ماخفيكم شكثر حز فخاطري حركتهم وتضايقت بس كنت متحمله وأقول نفس ماأنا ابي الضنا فهي ام واكيد تبي الضنا حق ولدها وبتفرح فعياله أتصلت عليه ورحب فيني وكان حيل مشتاق لي وماخلا كلام حلو ماقاله وأنا كان ردي فبرود وعادي بس طلبت منه أرجع بيتنا عشان فداخل نفسي قررت أصير قويه وماترك حقي وحبيبي وولد عمي حق وحده ثانيه تأخذه مني فقالي حياج البيت بيتج وفعلآ جاء وخذاني وجلسنا شهر ع هالحال أنا اتحاشا خالتي وأهي أتحن علا ريلي من تحت لتحت فطلبت منه طلب ولباه وكان طلبي إنا نروح حق المره الي فالسعوديه عشان أعطيها باقي فلوسها حرام لاتصير فذمتي قال إن شاءلله هاليومين وفعلآ رحنا وأول مادشينا طحت ع ريلها وبستها وبجيت وقلت لها من كل قلبي ياعسى ربي لايحرمج الجنه مثل مافرحتي قلبي بالحمال ريلي كان واقف وراي أول ماسمع كلامي جان يطيح ع رأسها ويبوسه وتنزل دموعه وطبعآ هي مره كبيره فالسن وماستغربت لأنها تقول دايمآ تصير وياها وردة فعلنا طبيعه وربي انها كانت تبجي معانا أي وربي ياعسى ربي مايحرمها الجنه وجان تفرش لنا السياده وتقول يالله اسجدوا شكر لربكم ترا هوالرازق ياعيالي موأنا طبعآ أنا كنت محلله بس حبيت افاجأ زوجي وأعيشه الفرحه وألحين أنا أكتب لكم وبنتي عمرها سنتين وإذا رحنا الوادي تقول ميدها جده وأهي تموت فيها أدعوا ربي يخليها لي ويبرني فيها ويجزا المره عني خير الجزى وهم بنت عمي راحت لها وألحين حامل بالخامس حبيت أنقل لكم قصتي عشان تعرفون أن الصبر مفتاح الفرج وان الله مايعسره شي وإن الواحد يرزق علانياته وأي وحده فيكم تبي أدلها ع المره تراني حاضره وممنونه ومابي الادعواتكم لي فالجنه..