لكل مطلقه قصة قريبتي

مساكم الله بالخير
سالفتي هي لكل مطلقه مازال الحزن يكسر قلبها واغلقت حياتها واوقفت كلللللل شي وقعدت تندب حظها ما انزه نفسي إني بكون الانسانه القويه اللي مايكسرني شي لا والله يمكن انا اضعف منكم لكن نستمد القوه من تجارب ناس قبلنا ونشوفهم كيف ما استسلموا وكملو حياتهم وخلو هالعثره اللي صادفتهم هي قوه لهم
مابطول عليكم
قريبتي هذي متزوجه قريب زوجي البنت لهلووووبه وتحب اللبس والرقص وتهتم في نفسها بشككككل لايوصف ماشاء الله تبارك الله وجريئه زوجها عكسسسها تماما باختصار يحب الحرمه اللي نظام حريم أول مالها في شي
طبعا لاتقولون ايش عرفك كلام امه لانها تجي عند اهل زوجي
جابت ثلاث اطفال منه زي بين اي زوجين مشاكل عاديه
في يوم حصل الطلاق انجننننننت انهبببببلت تبكي وتبكي وتبكي وحطت بنفسها شي وخذا زوجها العيال وماشافتهم يمكن ثلاث شهور
بعدها نفضضصت نفسها وقامت وكملت دراستها
سنه بالضبط وتزوجت قبل طليقها 😅
وسوت عرس ولبست فستان وطرحه وانزفت ورقصت وعااااااشت جووووها ماشاء الله تبارك وسافرت شهر عسل
وشرطت على زوجها الثاني قالت عيالك في بيت وانا في بيت مالي دخل فيهم وفعلا نفذ لها طلبها
انقلبت حياتها ٣٦٠ درجه قالت الله وين كنت وكيف صرت زوجها الثاني طيييييييب ولا يقولها لا
وجابت منه اثنين وكملت الجامعه والحين نبارك لها بالوظيفه
بصراحه كنت ادعي لها من كل قلبي لاني رحمتها لما تطللقت
واحس انجازاتها هي بجرائتها ماخلت شي يوقف بطريقها ولا استسلمت للحزن ولا حبست نفسها بالعكس تحضر الزواجات العزايم تروح لبناتها في المدرسه تسأل عنهم
مع ان ابوها واااقف بوجها هي وامها وطلق امها بعد ماتطلقت بنته بس ماشاء الله كانت انسانه قويه مع ان سنها صغير
اتمنى من كل قلبي لكل اخت مطلقه لاتقفلين على نفسك لاتندبين حظك والله اني احزن لما اشوف مطلقه كذا
زي وحده اعرفها مطلقه من سبع سنوات وعااااايشه على ذكرى طليقها راااااح عمرها وهو تزوج ولا هو داري عنها
اقولها يافلانه تزوجي العمر راااح وانشغلي في بيت وعيال وانفضي غبار الماضي وطلعي نفسك من دائرة الحزن
بس عرفت ان النفوس كللل مو زي بعض في ناس قويه وتنسى وتعيش،وفي ناس ماتقدر
أسال الله العظيم لي ولكم الحياه الهنيئه السعيده المرييحه
ورااااحة البال