لكل من تحب هذا المنتدى

السلام عليكم


لكل العضوات اللي يحبون هالمنتدى وفادهم كثير حبيت ألفت انتباههم لنقطة :27:

حلو اننا نتجمع ونسولف سوا ونفضفض ونفيد بعض بالنصايح ، وربي يجازي كل وحدة قدمت نصيحة من القلب ويعين كل وحدة بمشكلة ويسهل لها امورها

في نقطة نضر بعض فيها واحتمال نضر انفسنا ، وهي بالغالب مو بالقصد لكن في مجرى الحديث ماننتبه ونسويها ،

مثلا : كلنا طبعا شايفين الفرق بين هالجيل وأيام أول ، كان كل زوج وزوجة مقتنعين ببعض والحياة ماشية والامور تمام لكن بعد الفضائيات والحريم اللي كل وحدة طالعة تعرض نفسها ( عسى ربي يهديهم ولايبلانا ) كثرت مشاكل بالبيوت لان كل شخص صار يناظر لبره ومايقتنع باللي عنده ويبي اللي عند غيره صح؟

اعذروني عالتشبيه بس حبيت اوضح قصدي

نجي للقصد:

لما نجلس نشارك بعض احداث صارت بحياتنا او نجي نسولف ونحط مواقف ، كثيييير مننا تتحمس وتحكي وش كثر هي سعيدة و اش كثر زوجها رومنسي ومهنيها ، والثانية اش كثر يموت فيها ومايتنفس بلاها ، و... و.... و .....
وهذا شي طيب وربي يهنيها يارب ، لكن الوحدة كذا تأذي غيرها ولو كان بدون قصد .

لما تشوف وحدة من العضوات خواتنا اشلون انه فلانة وفلانة وفلانه ازواجهم رومانسيين ، واشلون هذي يعرف زوجها للكلام الحلو ، واشلون ... واشلون ...
هنا ممكن تكون هذي العضوة مقتنعة وراضية بحياتها ، وممكن كانت حاطة ببالها اغلب رجالنا كذا طبعهم ومايعرفون يعبرون عن مشاعرهم لان الرجال عندنا غالبا متعود عالكتمان ، لكن فجاة تحس فرق السما والارض بين زوجها وبقية الرجال ، وتشوف ان مو قلة من الرجال اللي يعرف يعامل الزوجة ويحسسها بالحب ، وتحس ان زوجها هو بس اللي مايعرف يرضي غرورها وحاجتها للكلام الحلو والاهتمام . وممكن لاسمح الله توصل ان الوحدة تفكر لا اجل اكيد مايحبني .

عشان كذا ودنا ناخذ بالنا من هالنقطة :27: ،، ما اقول انه الوحدة تنكر هالشي او تقول زوجي معذبني لاااااا ، ( وأما بنعمة ربك فحدث ) . لكن تكتفي انها تقول الحمد لله مرتاحة مع زوجي ويفهم علي ، او لما نحط الافكار الرومانسية وغيره ممكن نقول ايه حسيت تجاوب من زوجي وعجبه هالشي و سوت أثر حلو بعلاقتنا ، لكن لاتزيدون بالتفاصيل ربي يجزاكم خير واحتسبوا عند الله ان حرصكم على كذا لجل ما تأذون اخواتكم العضوات بدون قصد او تدخلون الحزن بقلوبهم . فبكذا كل مرة تتكلمين فيها عن حياتك وتحرصين وتنوين بقلبك انك ماتزيدين بالتفاصيل لجل تراعين غيرك ربي يأجرك على هالشي .

وتقبلوا ملاحظتي بصدر رحب ^_^