لكل وحده مالها حظ ولا فيه اي حاجه تتيسر لها ، هنا السبب والحل :)

السلام عليكم ،،
حبيباتي سمعت عن سالفه وحبيت افيدكم دنيا واخره ( حب لاخيك ماتحبه لنفسك ) . اتمنى تقرون الموضوع كامل .

كم وحده هنا دايم تشكي وتقول مالي حظ بشي ؟ كل ماسويت شي يصير عكس اللي ابي ؟ كم وحده تأخر زواجها ؟ كم وحده لها كم سنه تدور وظيفه ولا حصلت ؟ كم وحده ماتسهلت عليها دراستها او اي حاجه ثانيه ؟ تدرون وش السبب ؟


( الصلاة ) ايه نعم الصلاة ، تقولين انا الحمدلله اصلي بس مافيه شي يتيسر لي ؟ اصلي وادعي بس ربي ماقبل دعائي ؟

امس بالكليه بالمحاضره الدكتوره قالت لنا سالفة وحده ، ماشاءالله تبارك الله حياتها من اجمل مايكون و كل شي يتيسر ويتسهل لها ، قبل كم سنه فكرت تحج نهاية شهر ذو القعده ، تعرفون الناس يحجزون بالحملات من رمضان او قبل بعد ، هي فكرت باخر ذو القعده و حجزت بحمله بتاريخ 4 ذو الحجه ، مع حمله فاضيه و مو معروفه ، بس سبحان الله رجعت من الحج وهي مبسوطه وتقول بكل شي تيسر لنا ، سالفه طويله واشياء كثيره بس اختصرت وجبت حاجه وحده ، تعرفون ليه ؟ اول ما يأذن تقوم تصلي و صلاتها بكل خشوع و طمأنينه ، حنا وش نسوي ؟ مثلاً صلاة العشاء نتساهل بموضوع انو نصلي على طول لانه قدامك وقت ماتفوتك على طول ،

مااخفي عليكم ، صحيح انا الحمدلله اصلي ، بس احياناً اكون نايمه ومتى ماصحيت صليت ، نومي ثقيل واهلي مايصحوني ، تدرون كيف حياتي ؟ مافيه شي متسهل لي ، لا دراسه لا راحه لا زواج ولا شي ابد ، لاني ااخر صلاتي ،
حسيت بقشعريره فضيعه من كلام الدكتوره الله يسعدها و يوفقها وين ماكانت خلتني اصحى على نفسي ،

كل ما اخرتي صلاتك كل ما اخر ربي اعمالك و حاجاتك

الصلاة مثل ( السراج ) ينور لك دربك و ماتتخبطين بشي ،

مثلي ، لاني ااخر صلاتي حياتي مو مضبوطه ، دايم اتخبط باشياء كثيره ،

( اقم صلاتك تستقميم حياتك )

بنات كل وحده تشوف كيف صلاتها و تشوف كيف حياتها ، خلونها نوعد بعض هنا اننا نصلي كل صلاة بوقتها ، و راح تشوفون كيف الراحه و كيف تتغير حياتكم و تتسهل اموركم ، انا من امس اصلي اول ما يأذن ماتعرفون قد ايش مرتااااحه بيومي مع انه ماتغير شي من روتين حياتي ، الا اني مرتاحه و مااطفش ويضيق خلقي مثل قبل ،

فكروا بالموضوع زين و بتصحون على انفسكم مثلي

معليش مااعرف اعبر بس اكيد وصلت لكم الفكره

والله يجعلنا مقيمين الصلاة بوقتها يااارب ،

اللي تطبق اللي قلته و تلاحظ التغيير اللي صار بحياتها ، ماتنساني من دعوه بظهر الغيب و لاتنسون ولكم بالمثل :)

الله يسعدكم جميعاً سعاده ابديه ،
( استغفر الله العظيم و اتوب اليه )