للامهات المطلقات الي يربون اولادهم بلحاهم احتاجكم ضروري

السلام عليكم باعزيزاتي


اتمنى تشاركوني خبرتكم وحكمتكم في تربية الاولاد لان زي ما انتم عارفين ان تربيتهم بالنسبة للمطلقة شي مرة صعب خاصة اذا ماكنو عايشين عندك وماتشوفينهم الا ويكند
خلوني ادخل بالتفاصيل
عندي ولد بالابتدائي على وجة بلوغ الله يهدية عايش عند جدتة ام ابوه لانها مربيته من ولادته
المهم انا ما اقصر عليه لا بلبس ولا باي شي يطلبة ان كان سوني ولا فلوس ولا شحن ولا جولات احدث موديل
الي صاير ان ولدي فيه صفة تزعل وتكسر القلب وهي انو يكون اخلاق اذا جا عندي وبس يرجع بيت جدته يتحول لشخص جحود ووقح
فيبداء سيل من الاستفزاز والشتائم على الوتس وبدون اي سبب او مقدمات
ولاني بشر وعانيت كثيير مع ابوه يجيني احساس انه راح يكون مثلة مجرد استنزاف لطاقتي ونفسيتي
فمثلا لما يبي يشتري جهاز جديد ولا يبي يشحن حسابة عشان يشتري الالعاب من الابل ستور يتحول لقمة الادب بس تخلص حاجته يوريك وجة بارد ووقح مع اني ما اطلبة اي شي
انا ادري اني ام والمفروض اصبر بس انا اعرف ان فيه امهات بمكاني وعارفين احساسي
خاصة الي طلعة من زواجة فاشلة حطيتي فيها من قلبك وجيبك بس عشان تمشي والحركة الدنيئة الي سواها فيني ابوه عصرني مادياً


وما افتكيت منه الا لين خلعت نفسي بالمهر كامل والعيال ويالله افتكيت
جدتة حيل متعلقة فيه وهي مو موظفة بس قاعده بالبيت بس ماشفت زود تربية الا بالعكس اول من يشتم هي واشعر انها تكبر قلبة علي ومن الاخر اشعر انها راح تصنع منه اكبر فاشل وهذا شي ممكن بسهولة اتنباء فيه لاني شفت اثر تربيتها على ولدها قبل حفيدها
ساعات افكر اتقدم بالحياة واطلع استقر نهائي برا ولا امشي بموضوع زواجي بس كل اموري معلقة لاني اخاف ابعد عنه ويقسى قلبي عليه وتنقطع العلاقة بينا
وفي نفس الوقت اشعر اني بشر وماني ملاك احس نفس المعاناة ونفس الوضاعه الي عشتها مع ابوه يكررها معي
وابوه بس يحرشه على واقول بنفسي خليه يشبع به والتفتي لحياتك هو صار الحين رجال ماعاده صغير شوي الا يخط شاربة وانتي ماقصرتي عليه
وفكري في شيبتك ومن بيسندك واغسلي يدك منه مافي الا ادعي له وهذا الي علي
الي يضاعف مرارتي ان فشكلك بزواجك ما يكسر ظهرك لانو بالنهاية انتي تنفصلين عن ولد الناس وينتهي الموضوع
لكن اذا طلع من دمك ولحمك الي يسئ لك فهذي كارثة
اتقبل كل الحلول الا حل خذي حضانته لاني اعرف قدراتي وانا حقيقة ما اقدر على هالخيار