للامهات لاتدعين ابدا ابدا على عيالك

   تقول صاحبة انا متزوجه وربي رزقني بثلاثه اولاد وهالكلام قبل كم سنه في يوم كان بيجوني ضيوف وولدي الكبير كان سنه ثالث ابتدائي وهو الله يصلحه متعبني مع اخوانه طول الوقت هواش وذاك اليوم كنت مشغوله حدي وولدي مستلم اخوه اللي بعده طاخ وطيخ وانا ماغير اصايح عليهم وفي حزة المغرب بين الاذان والاقامه قام ضربه باللعبه على راسه ويقوم الثاني دمه يطشر في كل مكان وقمت ادعي ع الكبير قلت الله يبلاك ان شاء الله ورددتها طول ما انا امسح راس الصغير واضمد جرحه وبعد صلاة العشاء دخل ولدي الكبير وهو يعرج من رجوله ويقول امي شوفي رجولي تعورني مرررره ناظرت فيها صعقت انهبلت انفجعت وش ذا ياولدي وش جاك قال مدري كنت اناظر للتلفزيون واحس فيها الم اه يابنات ماتتصورون كيف شكلها كانت من تحت الركبه الى اسفل القدم منفوووخه متورمه ولونها احمر على زراق كأنه متحبس الدم فيها طبعا معد قدر يوقف من الالم والانتفاخ كلمت ضيوفي واعتذرت لهم كانوا بيجون سهره وكلمت اخويه لان زوجي مسافر وجا اخوي ووديته المستشفى اول ماشافوه الممرضات انهبلوا يحسبونه انحرقت رجوله كان اخوي شايله وحطوه ع الكرسي ودخلونا على طول وجا الدكتور ونادى الاستشاري وقام يسأل اسئله كثيررره واخذوا منه تحاليل كثيير وطلعت النتيجه جاني الدكتور وقال ولدك عنده مرض نادر اسمه التهاب الشعيرات الدمويه والحين هو في مرحلته الاولى وباذن الله مايتطور واصلا قليل جدا انه يتطور عند المريض طبعا ما اوصف لكم حالتي تذكرت دعوتي عليه انه ربي استجاب لي فعلا... المهم نوموه وجلس عندهم كم يوم مابين ابر كرتزون ومضادات والحمدلله راح الورم ولما جينا نطلع طمني الدكتور وقال نادر جدا يتطور المرض ولو حتى تطور مايتطور الا بعد سنين بين كل مرحله ومرحله قال بس ابعطيك ملاحظات لو شفتيها عليه جيبيه فورا للطوارئ قال مثلا لو جاه مغص بين فترات ويشتد ويخف وبعدها استفرغ دم على طول جيبيه هذا التطور الاول للمرض اما التطور الثاني اذا لاحظتي دم في البول مع الم في الكليتين واصفرار في الوجه لانه يسبب فشل كلوي حاد على طول جيبيه وباذن الله مايصير هذا كله قلت ان شاء الله... طلعنا البيت وانا في حزن وغبنه وحرقة قلب مايعلمها غير ربي كيف ادعي على ولدي واتسبب له في الامراض وهالبلاوي وقمت ادعي ربي في كل وقت انه يشفيه ويعافيه....يتبع .
..: الجزء الثاني 
بعد اسبوعين كنا ايام برد وجاني من المدرسه وكان يشتكي من مغص توقعت انه برد وقمت اشربه سوايل دافيه وادهن رجوله بفكس وجلسنا يومين كذا والساعه ثنتين بالليل كنا نايمين وقام يبكي ويصيح من بطنه ويقول وديني الحمام وديته للحمام واتفاجأ ولدي استفرغ دم قمت ابكي بدون شعور مصدومه مو مصدقه لانه الدكتور يقول تطورات المرض ان حصلت فتحصل بين سنوات وهذا ماكمل اسبوعين واصحي ابوه ووديناه الطوارئ دخلوه على طول لانه يصاحب الاعراض حراره شديده وسووا له اشاعه وللاسف لقى جدار المعده متقيح ومنتفخ وكمان كثفوا عليه الكرتزون كم يوم وطلعنا وقال الدكتور لزوجي انه لازم تتابعونه كويس لان المرحله الاخيره خطيره جدا وممكن تسبب وفاه واعطاه توصيات وطلعنا وانا مستمره على قيام الليل والاستغفار والدعاء والصدقه وجلست دائما اسئله تحس بألم هنا وأشر له على الكلى وهو يقول لا وكنت اتابع لون البول وانتوا بكرامه الى تقريبا بعد شهر حسيت لون البول تغير وصار غامق وديته ع الطوارئ وسووا له تحاليل قال عنده التهاب شديد وعنده نسبة الزلال عاليه واعطانا ادويه وكتب لنا موعد طلبت من زوجي نروح عمره ودي اروح بيت الله اطلب منه العفو والسماح والمغفره وادعيه يعافي ولدي يووووه احساس صعب لما تكونين السبب في مرض ولدك او موته لاسمح الله..#يتبع
..: الجزء الثالث 
ورحنا مكه وطلبت من زوجي يخليني لحالي طبعا زوجي مايدري اني السبب في كل اللي صار وجلست في مكان صاده شوي عن الناس وصليت طول الليل وادعي ادعي ادعي وابكي بكاء الأم المحروق قلبها والله لدرجة اني معد قدرت اتنفس من كثر ما اشاهق وتمر من عندي وحده الله يجزاها خير وتضمني بقوه تبغاني اهدأ وكانت تردد الله غفورا رحيم الظاهر انها تركيه المهم صليت الفجر ورجعنا الفندق ونمنا ومشينا الرياض وكان عند ولدي موعد ورحنا له وسووا له تحاليل قالوا ماشاء الله سليم مافيه الا العافيه طرنا من الفرحه وقلت لزوجي بأذن الله ربي استجاب لنا قال الدكتور راح نسوي له متابعه كل اسبوعين وبعدها كل شهر وكل مره نروح لهم كان سليم الحمد لله ويمددون المراجعه الى ان صارت كل سنه بعدين صارت كل سنتين والحين الحمد لله حمدا كثيرا طيبا مباركا ولدي بثالث متوسط ومن ذيك الايام ماعاد جاه الا كل خير وابشركم امس ختم حفظ جزء عم واشترك في مسابقة حفظ الاربعين حديث نصيحه من كل قلبي للامهات لاتدعين ابدا ابدا على عيالك الا بالصلاح والهدايه طبعا علمت زوجي بعد ماتعافى ولدي وقال لو انك دعيتي له بالصلاح والهدايه في ذاك الوقت كان احسن وافيد له لكن الحمد لله والشكر كان هذا اختبار من الله.. اسأل الله ان لايوريكم مكروه في غالي..