cute moon @cute_moon_1
محررة ذهبية
للامهات ... هل تنبهتي لهذه النقطة ؟؟ فأنتبهي ..( الكل يدخل )
السلام عليكم ورحمة الله وبركاته
الحين بنلاحظ كثير امهات يجيها طفلها الي عمره سنه أو سنتين ، ويضربها او يتفل عليها ..
في امهات تضحك له ، لأنو على بالها ده طفل صغير ...
بس ده مره مره خطأ وكبير أيضا ...
كثير مرات لما اكون مع امي بمكان في حريم ونشوف طفل يضرب امه وهي تضحك وهو يكمل ضرب ..
امي على طوول تكلمها انها تمنعه ..
ليه ؟؟
لازم انك تربي طفلك وطفلتك من طفولتهم ، انهم يحترموكي ..
في وحده اتنبهت على ده الشئ متأخر وحكت قصتها لأمي ..
كانت تخلي اطفالها يضربوها ، وهي تضحك لهم ..
لما كبرت ماصارت شئ مهم بعينهم ، وعاقين ويردو عليها ويرفعو أصواتهم عليها .. بإختصار ، مايحسبو لها اي ذرة حساب ..
فبالطبع ، لأنهم تربو على عدم احترامها ، او بالاصح لم تزرعه في قلبهم ..
وللأسف انها لما كبرت حطوها بدار العجزة :( ...
ومنجد بنات ، انا كبنت احس اني احسب لأمي الف حساب اكتر من أبوي ..
مش لأانها قوية او عصبيه ، بالعكس انها باردة ..
فسألتها بعد ماسمعت القصة انو ايش كنتي تعملي لما كنت اضربك وأنا طفلة ، فتقولي ، كنت أبين لك انو هذا غلط وأرسم على شكلي ملامح انها زعلانه مني وغاضبة وتضربني بس على خفيف على يدي ..
فـ نعم نكون حنونين مع أطفالنا دائما ، بس لما يتفلو علينا او يضربو ، هنا لازم نمنعم لحتى يترسخ في مخهم الاحترام والتقدير لنا ...
وترا نفس الشئ يتطبق على شنطتك (حقيبتك) الي تشيليها بكل مكان ..
في امهات تعطيها لطفلها ليتسلى فيها لحتى مايبكي ، وهو يجلس يفتش ، بس هل انتي تبغي بنتك تفتش فيها لما تكبر باي وقت هي تبغاه وبدون احترام انو هذه حقيبتك الشخصية
فالحل انو في كل مكان تروحيه خذي لعبه او لعبتين بس انتبهي تعطي شنطتك يلعب فيها لانو بكذا حيترسخ بباله انو عادي أفتح شنطتها بأي وقت أبغاه وحيستمر ده الشئ لحتى يكبر ..
وبالنسبة لامي : فيوووه ، مستحيل افتح شنطتها ولو أبغا شئ أعطيها شنطتها وهي تعطيني هو ..
وهذا الشئ يعالج الظاهره الي سمعناها بقصص كتيره لما طالب في الروضه او بأولى ابتدائي بيوزع بالمئات على الطلاب ويكون أخذها من محفظة أبوه ..
فطبعا كلامي ينطلق عليكي انتي الام وعلى الأب ايضا :)
فأتمنى من كل ام بحواء تأخذ بالها من دي النقطة ، والله يهدينا ويهدي المسلمين
22
2K
يلزم عليك تسجيل الدخول أولًا لكتابة تعليق.
الله يرفع من قدرك ويحفظك المولى
والله من جد كلامك هو عين الصواب
والله أنهم مسؤليه ربي يقدرناعلى تربيتهم كمايحب ويرضى
لاأله إلاالله وحده لاشريك له له الملك وله الحمدوهوعلى كل شي قدير
والله من جد كلامك هو عين الصواب
والله أنهم مسؤليه ربي يقدرناعلى تربيتهم كمايحب ويرضى
لاأله إلاالله وحده لاشريك له له الملك وله الحمدوهوعلى كل شي قدير
الصفحة الأخيرة
ماشاء الله عليكي كلامك جدا صحيح ..
وأنا معاكي ان ولدي استهبل على طول ارسم على ورقه وجهه زعلان واعقد حواجبي عشان يعرف انو دا غلط !!
الاطفال أغلبهم بصريين ( يعني يفهمو المحسوس الي في يدهم و يفهمو الي تشوفو عينهم ! )
.. اي شي تبغي تشرحيه .. ارسمي على ورقه مهما كان الموضوع صعب .
الله يحفظك لشبابك :)