" للحين بدون شغالة ؟! " ... تعالي فضفضي :(

السلام عليكم و رحمة الله وبركاته ...


الله راد و قدرني اني استغني عن الشغالات .. ولله الحمد لأن الظرووف مساعدتني .. عيالي الحمدلله شايلين نفسهم و بيتي صغير .. غرفنا على قدنا ..

مرت علي ايام الله يعلم اشلون مرت .. سبحان الله التساهيل تجي من رب العالمين ..
كنت دايما ادعي ربي ان يقويني و يقدرني على شغل البيت ورعاية اسرتي بدون ما احتاج للشغالة ..

والحمدلله ربي ماقصر معاااي .. عطاني على قد نيتي .. و هالمنتدى الغالي ماقصر
كان تقريبا المحفز الاول لاستمراري بدون شغالة .. يعني حسيت انو في ناس مثلي يشجعوني من دون ما يعرفوني ومن غير ما يحسسوني اني انسانة جاية من المريخ او من القمر

عيل اشلون وحده من هالعصر ومن الخليج بالذااات و كويتيه على الاخص وعايشة من دوون شغالة




بالبداية عانيت وايد ولكني اخذت الموضوع تحدي .. و الحمدلله للحين صامدة و مدبرة أموري بإلي اقدر عليه
و بكل الطرق الممكنة الي تساعد على توفير الوقت و الجهد وتختصر لي الشغل

سويت لي جداول و نظمت لي شغلي علقت لي اوراق ميمو بالمطبخ .. حطيت لي اجندة .. سويت بكل نصايحكم



ولازلت اقول ربي لك الحمد .. سبحانه الله يعطي الانسان على قد نيته ..



لكن بالمقااابل


في ناس ما يعجبهااا الرضا ولا القناعة ,,, ولا حتى يتركون الناس في حالهم

يعني مافي مناسبة ما انسال هالسؤال " انتي للحين عايشة بدون شغالة " >> كأني مسوية شي خارق أو عيب أو راكبة راسي بشي غلط !!

والقهر ان هالناس يا خوات يا حريم اخوان .. يعني شنو بكل زيارة اسبوعية انسأل هالسؤال؟ !

طيب اذا الله اكرمك بشغالة او بشغالتين أو اربع .. ليش تنقهرين اذا عرفتي فلانة من الناااس مستغنية عن الشغالات و قدرت تعيش بليّـــاهم ؟!


والله عمري ماقارنت نفسي بوحدة من خواتي .. ولا بحريم اخواني انا عايشة حياتي بقناعتي .. و برضا ولله الحمد .. احب اكون ربة بيت اهتم بزوجي و بعيالي وبأكلهم و أحب اطبخ لهم ..

حتى عيالي اناا ربيتهم و كانوا تحت عيني حتى لما كان عندي شغالة ...

حتى ساعات لما اشتكي من شغل البيت و وو يجيني رد طايررر وبسيط .. " جيبي شغالة "
ما أذكر مرة وحده منهم قالت تحبين اساعدج بشي .. تبين شغالتي تساعدج .. طبعا هالاشيااء ما فكرت فيها ولا احد منهم خطر في باله هالشي ..


الي مضايقيني حييل .. ليش زعلانين اني ماعندي شغالة ..
لا عمري قصرت بزياراتي ولا التزاماتي العائلية .. عايشة حياتي الحمدلله طبيعي ...

وان دخلت ومعاي صحن حلو او موالح شغل يدي والله يضيق خلقهم .. لسان حالهم يقول متى امداك تسوينه ؟

كل وحدة فيهم بصوب و الطبخ بصووب ثاني ..


لي درجة انهم يمسكون عيالي و يحققون معاهم اشلون تساعدون أمكم بالبيت ؟ شنو تشتغلون ؟ ماتجيكم شغالة؟


والله قمت أستثقل زيارتناااا الاسبوعية .. ..




انتوا مثلي ؟
يصير معاكم جذي ؟

:44: