للعبرة

السلام عليكم يا بنات

للأمانه القصة منقولة لكن حبيت بس افيديكم بالعبرة وتسمحلي صاحبة الموضوع للنقل لأني أريد الاجر في البنات لا أكثر ولا أقل :icon33:


أدري أغلبكم بيدخل فضول وأنا هذا اللي أبيه

بقولكم قصتي عشان تصير درس يمكن بعض البنات مثلي وما وصلوا للمرحلة اللي انا وصلتلها

انا تزوجت صغيرة أول ما تخرجت من الثانوية خذيت ولد عمي ووقفت دراسة وحشى لله كلمة الحق تنقال كان حاطني فوق السما ما يقصر علي بشي لا سفرات ولا طلعات ومصروووف وفلووس وهدايا كنت بخير

لكن المشكلة أني كنت بين بيئة ( لبيسه ) يعني حمواتي كشيخات وانا وحده احب الكشخة واحب اللبس وشي طبيعي كان اللي ماكلها زوجي

مرات كنت اطلب منه فلوس وادري انه على الحديدة بس اقلب الدنيا واعصب اذا قال ما عندي وهو المسكين فعلا ما عنده بس انا وحده مابي اصير اقل من غيري وكنت بنت صغيرة غارتني الدنيا

كانت كل مشاكلنا على اللبس والمصاريف واكون انا السبب وادري انه غلط الحين لما اتذكر اقول كنت خبله ومدري شلون صبر علي بس سبحان الله حزتها كنت اعاند واكابر

تميت عنده سنتين ما جبت منه شي بعدها الله رزقني وحملت ... وانا بالنفاس كنت بعد اسحب منه فلوس حق صوالين وملابس وسوقه وصار الهم همين همي وهم ولدي وانا ابي اكسر عيون الناس فكل شي لازم يطق فوووووق مو من سوقه شعبية ومحلات عادية لانه حمواتي جذي نظامهم لكن هم موظفات كان المفروض ما اقارن نفسي فيهم

المهم اخر يوم بنفاسي كانت خالتي مسويه حفلة استقبال وكانت مبلغتني قبلها بمدة قصيرة ففستاني يدووب بعد الموت قدرت اقنع المره تطلعه لي يوم الاستقبال

جا زوجي ياخذني من اهلي وقلتله اول قطني بالصالون عشان اسوي شعري واتمكيج وبعدين بمر المشغل باخذ بدلتي قاال اوكي وعطااني فلوس للصالون حزتها المسكين ما كان عامل حسابه يمكن فاللي بقى معاه بس 60 دينار بجيبه

خلصت من الصالون ورحنا على طول للمشغل قالي لا تنزلين كنت متمكيجه ومسويه شعري وجذي فنزل هو بروحه وما اسألني جم سعر الفستان وانا ما قلتله

شوي جاني معصب جان يقول شلون تحرجيني وليش ما قلتي جم سعره انا ما معاي فلوس احرجتيني قدام الناس ومن هالحجي ( للعلم كان سعر فستاني فوق الــ 300 ) المهم دش بينا الشيطان حزتها وكبرت السالفة وتهاوشنا وحنا بالسيارة جان يطلقني يمكن كان بلحضة غضب بس انا ما الومه الحين

رجعني بيت اهلي على طول وكنت معصبه وبنفس الوقت منصدمه .. شقول لامي واهلي كلش الموقف بااايخ

وعلى شنو بعد على فستااااان ؟

بعد يومين مو اكثر جت ورقة طلاقي السالفة ما كانت على فستان بس السالفة من قبل كان شايل بقلبه مني لاني اصرف بالهبل ولا عامله حساب لشي

نطرت بعد الطلاق يمكن يجي يشوف ولده على الاقل لان ادري طايب خاطره مني بس للاسف ما جا ولا سال

امه لما تجينا تعطي امي مصروف ومو مقصرين من ناحية الفلوس والمصاريف على الولد بس هو ما جا شاف ولده كلش

تزوج الحين وخلصت السالفة بس الهم والجرح اللي بقلبي ما برا

احس انا كنت الذنب بكل شي انا خربت على نفسي انا مو كفو نعمه ولا قد مسئوليه

امي ما قصرت من اول عرسنا وتقولي الرجال ما يصرف عليج مثل ابوج خذي بالج يابنت اللي تسوينه غلط وانا معطتها طااااف واهم شي علي لبسي وكشختي الحين ما فادتني المظاهر بشي

حملت لقب مطلقة وانا ما كملت الواحد والعشرين ليلحين

مابي منكم شي لانه مشكلتي ما لها حل خلصت بس حبيت افضفض





منقوووووووووووووووووووووووووولة للعبرة :icon33: