حبيت أجمعلكم وأعرضلكم مذكراتي الخاصه ومواضيعي في الغربه وجمعتها من أرشيفي في عالم حواء من عام 2002 وسامحوني لو الكتابه عاميه والتدقيق النحوي ماشي حاله لاني علمي ومالي في الكتابه بس كانت فضفضه تخفف عن الضيق والهم ألي واجهته في غربت:(:44::icon33:ي وياريت الكل يقرأ ويستفيد منها بالأخص المغتربات الجدد وأن شاء الله تعجبكم:39:
ملاحظه: كنت في كل نهايه موضوع أكتب ودمتم سالمين لانو بنتي كانت تحب تتفرج على برنامج دم دم دمتم سالمين أفتكرتوه:)
في البدايه كنت أحاول أساوي صداقات وبدأت بالبحث عن صديقات في الغربه والله يابنات الطفش كل سنة بيزيد ما بينقص والساعات بتطول والوقت مملل فياليت في شات أو دردشة خاصة لملتقى الأحبة المغتربين وخاصة للمغتربات الي بأمريكا لأنهم أبعد شي ودمت سالمين ..
والله يا اختي هوم مش مشكلة لو كل المغتربات بس انا احس انو الي في أمريكا حالتهم صعبة لانو جدا جدا بعيدين عن اهلهم يعني زي كل سنة اروح لاهلي بس بعد سفر لمدة36 ساعة متواصلة جدا تعب وامكن خصيت الي في أمريكا لاني في منطقة نائية في أمريكا الشمالية لسع ما اكتشفها العالم مافيها مسجد ولا بقالة عربية وعدد المسلمين40 مسلم منهم 9 سعودين فقط وفي الغربة هنا الصداقة معدومة وأن وجدت فمصيرها تنقرض لانو اكبر كذبة ألي يقول في بالفعل صداقة صادقة في الغربة لذلك اتمنى لو في دردشة خاصة للمغتربين.بدو البنات ينصحوني من الدردشات الكتابية والصوتيه لانو منها تجي مشاكل ولبش..
خلاص بطلت ورجعت في كلامي (الباب ألي يجيك منو الريح سده وأستريح) ..
لالالالا أنا الغربة علمتني ماأتهور في أي شي إلا ألي أنا ضمنتة مية بالمية
بس حبيت نكون دائما على اتصال ونكون قريبين من بعض ونقرب المسافات ونهونها على بعض و الله يمضيها الأيام دية على خير وستر وعافية وسلامه و بلاش يأأختي من الدردشة خلينا بالملتقى أحسن وأأمن وأريح دمتم سالمين...
بعدين صرت أكتب عن .. صداقة الزوج في الغربة
سلام يابنات الغربة..
ياريت تستمروا وتتواصلوا معايا في معنى الصداقة في الغربة ؟
وهذة المرة أحب أتكلم عن صداقة الزوج في الغربة
الزوج مو صديق كافي في الغربة وذلك لاسباب كثيرة أنا عانيت منها مثلاً:
1)شغل الزوج في الغربة أو دراستة تأخذة منك طوال اليوم وما يكون في وقت تدردشو مع بعض أو تفضفضوا لبعض ولو كان في إجازات يادوب تروح في النوم والخرجات أو السفر وأن فضفضتوا أو دردشتوا طبعا حتكون كل المواضيع عن بناء المستقبل لما ترجعوا بلدكم أن شاء الله بالسلامه (البيت,الفرش,السيارة,الخدامة,ا لعيشة ).
2)الزوج في الغربة ما يصدق تجي أجازة ولافرصة يخرج ويتقابل مع أصحابة .
3)الزوج في الغربة يحب يقعد ساكت مايتكلم الا في الضرورة ولما يتكلم تسحبي الكلام منو تسحيب والوحدة تحب لما تفضفض لأحد يرد عليها ويفضفضلها ايضاً.
4)الزوج في الغربة يحب معاملة الأحترام والألتزام بالرد الجميل والمهذب والعذب لكن احياناً الزوجة تشتهي تمزحي بالكلام لو انهامزحت مع صديقتها تبلعها وممكن تردلك المزحة ولكن الزوج مو كل مرة تسلم الجرة ويبلعها ويمشيها لكن ممكن يكبر الموضوع وتوصل من مزحة لزعلة وغالباً ماتنتهي الزعلة بصلحة وترضية من الزوجة وأعتذار منها وطبعا ًفي الغربة دائماً الرجل يحب يغلط وماينغلط علية يطنشك ومايمشيها لو طنشتية أو نسيتة بالغلط.
5)غالباً مو دائماً الحمدالله الزوج في الغربة ما يصدق غلطة من الزوجة علشان يفش غلة فيها ويطلع كل هموم الغربة والدراسة أو الوظيفة والزوجة في الغربة ماتصدق تنسى الهموم والغربة مو دائماً يجي الزوج ويفكرها بيها .
6)الزوج في الغربة يكون أكثر حزن ووحدة من الزوجة والأولاد لانو دائماً سرحان وبيفكر فيهم في الغربة ومتى الرجعة للبلد وأيش ساوى للمستقبل وطبعاً دائماً معصب وأخلاقة في خشمة ويضارب ذبان وجه وما يصدق يوصل البيت للراحة والسكوت والسكون والتفكير.
ولهذة الأسباب وأكثر الزوج مو صديق كافي في الغربة ..
وترقبوا مني المزيد أن شاء الله في (معنى الصداقة في الغربة ؟)
والله يهونها علينا وعلى كل المسلين ويرزقنا برزقهم ويد كل واحد مننا على قد نيتة..
صداقة الزوج في الغربة (الجزء الثاني) لايفوتكم يابنات
سلام على كل المغتربيت مثلي..
حبيت أكمل كلامي في صداقة الزوج في الغربة وأوأكد أنو الزوج مش صديق كافي ومتوفر في أي وقت أحتاجة كصديق في الغربة إذا كان هناك موضوع خطير لازم تتكلمو مع بعض لابد من أخد ميتنغ معاه أي موعد مع الزوج في الغربة للفضفضة والدردشة وللأستشارة في أي وقت وذلك فقط خاص في بلاد الغربة وذلك لسبيبن أما لوظيفة أولدراستة وركزو على التاني لانو خطير :
1)إذا كان الزوج في وظيفة في بلاد الغربة فهذة مش مشكلة لانو كل همومة ومشاكلة المتعلقة بالشغل تنتهي بإنتهاء الدوام وما يبعد وينشغل عنك إلا في وقت الدوام ولما يرجع البيت يبغى ينسى كل الهموم ويغير في تفكيرة بأمور أخرى لاتتعلق بالشغل وممكن يفضى لك للصداقة أو لي أي حاجة أخرى مثلاً للمساعدة في شغل البيت لانو مو مقيد فكره وعقلة بشي من وظفيفتة في بيته .
2)إذا كان الزوج بيدرس وما أدراكي ما درارسة الزوج في الغربة سواء كان موجود أو غير موجود فوجودة وعدمه واحد لانة نادر ما يكون موجود في البيت بالفعل يكون موجود معاكي كزوج وصديق وفاضي لك صدق الي قال : (التعليم في الكبر كالنقش على الحجر)
الزوج ألي بيدرس في بلاد الغربة في قمة الدلع زي الطفل تماماً يبغ الي يأكلة ويشربة ويلبسة ويوفرله جميع أنواع الراحة وذللك لأنو مو فاضي دائماً المشاكل والهموم والافكار والتفكيرمسكين يقطع قلبي معاه دائما سواء كان في الجامعة أو البيت أو الحمام الله يكرمكم لانو الي بيدس بيدرس في أي مكان وفي أي وقت ماليه وقت ولا مكان محدد للدراسة وما لية مواعيد ثابتة فجأة يطلعه ميتنغ أي موعد في الجامعة مع دكتور أو زميل فجأة تتلغي محاضرة فجاة يطلعلة هوم ورك صعب أي واجب ماينحل إلا بالجامعة لانو مش كل مواقع الدكاترة تتفتح في أي وقت او تكون بفلوس ماتنفتح إلا بالجامعة وما أدراكي عن دلعة وتوترة لو كان عنده أختبار يقلب البيت وألي في البيت فوق تحت ألين لما ربك يمرر داك الأختبار وألخ ألخ ..
مان أي رجل المفروض أقول ومون أي مرأة بس الوحدة في الغربة تتساوى مع الرجل في الكلام معليش خبلنكم بس من عاشر قوم أصبح مثلهم سرت أتكلم زية لازم أصحح لغتي وأثبت لي على لغة لانو لو رجعت بلدي أن شاء الله وأنا كدا كلجة الكل حيترق علية ..
المهم ربي يعننا على غربتا ويهونها ويسهلها علينا ويمررها بسرعة من غير هموم ومشاكل أن شاء الله الكل يقول أمين ..
وباأطلب طلب من الجميع يدعولي من كل قلبهم بدوام راحة البال والعافية والستر والإيمان والنعمة لانو هي هذة أهم حاجة في الدنيا..
ودمتم سالمين على قول بنتي..
وبدأت أخبل لوحدي ياريت الكل يفسر الحالة الي وصلتلها..
والله ياريت تقول لولي يابنات ليش اخر الليل الافكار تكتر وبس أبغ أقعد على النت وبالاخص أكتب في هذا المنتدى يمكن حبيتكم أو يمكن عرفت أفضفض لمين أو يمكن أو يمكن أو يمكن ما ادري ايش الي بيصير فيا صرت ابغ اشوف المنتدى اكتر من المطبخ معجزة وحصلت سبحانة
بس من جد انا مبسوطة للردودكم وعوضتنوي عن أشياء كثيرة عزيزة على قلبي وعلى حياتي ودنيتي فقدتها بالتدريج هنا في غربتي وكربتي وقدري ومكتوبي..
على قول دينا حايك(كتبتلك على دموع عيوني أشتقتلك ....) كملو الباقي من زمان عن الأغاني الغربة مشتني على الصراط المستقيم عقبالكم زي تخففوا من الاغاني بس اخاف ما اوصل بلدي ان شاء الله وارجع اسمع الاغاني الجديدة وأعيش فيها وتخيل نفسي البطلة ..
على قول المثل(ياليت الشباب يعود يوماً)طبعاً مش علشان مشتاقة للأغاني...
على قول المثل (من خرج من داره قل مقداره)لكن علشان مشتاقة لأهلي..
على قول ستي الله يرحمها (لو أشرلي الطير ما كان طيرت)
يعني لو كنت أدري أنو الغربة مرة وماتنبلع والغربة تغير الوحدة من جسم وأخلاق وشكل ماكان تغربت وبعدت عن بلدي وأهلي ..
على قول محمد عبده(ياحمامة روحي ووصلي للغايب سلامة )
والله كل نفس اتنفسة اتمنة يوصل لاهلي ويوصلهم سلامي وحبي وشوقي لهم..
بس أن شاء الله في هذا خير لي وعسى أن تكرهوا شياءً وهو خير لكم ..
بس من جد الغربة تلين القلوب وتكسر وتفتفت الحجر..
وسلامتكم من الغربة (والله غريبه الناس تقول سلامتكم من الحرب أو من الشر أومن المرض أو ألخ.. وأنا أختم كلامي وسلامتكم من الغربة لانها كانت أصعب حاجه فيهم كلهم)
على قول جاراتي هنا (صح الله لسانكم)
وحاولت أرجع زي ماكنت قبل الغربه بشوشه ومرحه وأسعد ألي حواليا أن شاء الله بنكته
بس ليش مانستفيد ونفيد بعضنا من كثر قعدتنا على هد الملتقى كلنا نحكي عن تجاربنا ومقالبنا ..
وكل شي صار في الغربة علشان نفيد بعضنا ونستفيد ..
والشي الحلو الي لقيتة في الكتابة في المنتديات أنو أنا بااكتب من غير ما اعرف الموجودين هما مين بالضبطأو حتى هما يعرفوا انا مين يعنى انا ممكن اكتب وتقراء كتاباتي وترد علية أختي أو قريبتي وما تعرف أنا مين بالمنتدى والقارئين يعني بالمفتشر أخد راحتي في الكلام ..
طبعاً هدا اريح واسلم من انك تفضفضي لصديقة معينة مصيرها مع الايام تتقلب وتتغير وتنقلب عليكي وممكن تزعل وتحسس وتغار وتحقد وتحسد وكل لما قعدتو مع بعض كل وحدة ترمي تلقيحات وتعليقات للثانية وتراقبوا كلام بعض وتدقوقوا على التصرفات وتزعلوا بااستمرار..
والله المفروض مايصير كدا في الغربة بس على قول ستي الله يرحمها(الشيء لوزاد عن حده انقلب ضده ) يعني ممكن تكوني صد اقة قوية في الغربة بس مع مرور الايام وكثر الفضفضة تنقلب عليكي ..
علشان كدا خدوها مني نصيحة لو اتغربتي كوني صداقات لكن لاتتدخل مرة معاها لانة مافي شي يدوم على حاله ..
فلدلك انصح لو فينا حاجة ومحتاجين نفضفضها نكتب في دفتر او في المنتديات يكون افضل واريح واسلم..
فاهميني وهل ياترى بدأتو تستوعبوا أنا أيش أقصد..
شوفوا يابنات أيش صارلي قبل ما أتزوج وأجي أمريكا ..
كان يامكان في قديم الزمان كنا معزومين عند خالتي على الغداء وطوال القعده خالتي ماهي على بعضها تأكل وتنكت في نفسها مانها قادرة تقعد على الأرض قايمة قاعده خبلتنا المهم سالتها ايشبك ياخالتي قالتلي اليوم حتوصل بنتي من السفر الله يجيبها بالسلامة قلتلها طيب ايش الجديد كلنا عارفين وندعيلها ربي يوصلها بالسلامة طبعا طول ما انا هناك قاعدتلها زي الأرقوز احششلها وانكت معاها وهيا اخلاقها في خشمها وماتبغ تكلم احد و قالتلي انا في ايه وانتي في اية وبعدين دق الباب وكلنا جرينا على الباب والحمدالله وصلت بنت خالتي وجوزها وبزورتها من السفر وكمان وصلت الشغالة سبحان الله صدف موعد وصول بنت خالتي من أمريكا وشغالت خالتي من أندنوسيا في وقت واحد لكن خالتي اتصرفت تصرف كلنا استغربنا من هذا التصرف حضنت الشغالة وباستها بحرارة كاأنها ليها مية سنة ما شفاتها مع انو الشغالة ماغابت إلا شهر وبنت خالتي كانت غايبة تقريبن سنتين وبعد ماهديت خالتي ساألتها ياخالتي ليش سلمتي على شغالتك بحنان وحب وشوق ووله أكتر من بنتك قالتلي يافلانة الشغالة حتشيلني وتشيل بنتي وجوزها وبزوتها أما بنتي تبغ مين يشيلها هيا وجوزها وبنتها لانها جية من السفر يحل عليها التعب والارق وما حتساعدني وتبغ مين يساعدها أما الشغالة الله يرضي عليها شيالة البيت كلة فوق راسها ..
وإلى يومكم دا وأنا الحمدالله ولاسنة أنزل فيها ماأنسى شغالت أهلي ولا شغالت أهل جوزي تصدقوني اني الحمدالله أنا كدا اشتري راحتي ..
انا كنت مستغربة من تصرف خالتي و لكن دحين بعد مااغتربت حست بيها..
متى ارجع أن شاء الله بلدي والناس تخدمني موهنا في الغربة سرت زي الشغالة أطبخ وأغسل وأكنس بس ماأكوي لانو نشافاتهم ممتازة ماتحتاج تكوي الحوايج كوي لله الحمد ما شاء الله ولو في شي ممرمص افرده تحت مرتبة السرير وأنام علية ليلة أوليلتين ألين لما ينفرد أو احطة تحت مرتبة الكنب الين لما اخلص المسلسل المدبلج لانة طويل ولو كنت مستعجلة ألبس البنطالون وطبعاً مع السواقة ينفرد تقولي بأسوق تيريلا الأعصاب مشدودة فتفرد البطالون ..
أه أه من شكلي كنت سندريلا وأصبحت في الغربة غوريلا خوفك ما اوصل للتريلا كدا كدا ياتريلا كاسية ترانو افتكرتوها ويدي زي الشغالات أتقطعت من الشغل وشعري دائما منفوش ولوني شاحب وعيوني محمرة ودائماً مفرصعة وظهري محني وسنوني خلخلت وضروسي سوست وانحفرت وخشمي نفش ..ههههههههههههه ..
شكلي وحالي صارو يبكوا ويضحكوا والله الغربة صعبة وسيئة..
فينك ياماما تجي تشوفي بنتك الغربة ساوت وعملت فيها أية
بس من جد من جد طلعي عضلات في أزنادي سرت زي الرجال من مكانسهم الكبيرة العفشة بس تكنس البساط تقولي جديد يفتح نفسك ..
ودمت سالمين ..
اهي دنيا تغير الي مايتغير تصدقي انا سارت في مقالب كتير من يوم ما اتزوجت تقولي بااشتغل في سرك مو بيت..
يوميات مغتربة في الغربة الصعبة المرة في أمريكا الشمالية..
مع الغربةأخواتي تتعلمي على الكسل والنشاط وهذة أحدى حكاياتي مع الكسل واستخدام التكنولجيا في الطبخ..
انا ماكنت استخدم قدر الضغط لكن الله يستر عليها أم ناصر دلتني علية لانو يسوي اللحمه بسرعة وما يصرف كهرباء فما كنت اعرف استعمله و كنت كل لما اعمل حاجة بية اناديها علشان تضغط الاكل ففي مرة من المرات كنت باأكلم صديقتي الغالية ألي عمري ما حاأنسى صداقتها الله يفتكرها بالخير وكان القدر خربان وبينازع ويقول ارحميني وصار يندر بخار كتير وصوت يفجع كان إلا الله بينفجر والله لو تشوفي ماعليا لافي البيت ولابنتي ركبت الهواء فتحت الباب بشعري وجسمي وكان بيتنا على شارع عام وكنت لابسة قميص قصير وشكلي يضحك ويفجع بس ربك ستر وما مر احد اصل لواحد شافني كان حيقطع الخلف ورجعت تاني اخدت بنتي وخرجت خارج البيت وبعدين فوقت على نفسي وانتبهت اني في الشارع رجعت البيت وسكيت النار وحطيت قدر الضغط على الموية وهجد ..
بس موقف بحياتي ما انساه وهذة من يوميات مغتربة في الغربة الصعبة المرة في أمريكا الشمالية
أيام سوري يابنات بس هذه من جد حكاياتي مع الغربة والغربة تجنن الي ماينجن بسم الله علينا المهم ادوعولي ما اجحيش وما ارجع تاني اكتب ..
تعالوا يابنات نكتب المقالب الي سارت لنا في الغربة ..
أهلا وسهلاً بالجميع..
مره يابنات كنا خارجين معزومين على العشاء عند جيراننا والمهم كان الارض تزحلق لانو الثلج نصف سايح وكنت شايلة بنتي وثلاجة قهوة أم النقطة الحمرا جايبتها معايا من السعودية وما عندي غيرها شوفو ايش سار اتزحلقتلك ديك الزحلقة على ظهري حضنت الثلاجة وسيبت بنتي من كتر ماهي التلاجة عزيزة عليا ..
وفي موقف تاني برضة بالتلاجة دية مرة من المرات نستها عند جارتي وطبعاً اختنا في اللهو ماقصرت كبت القهوة وهاتك دعك وتنظيف في الثلاجة الين لما طارت الجلدة ودخلت في خلاط الحوض وشغلت الخلاط والجلدة انقطعت وهيا ماتدريانو فيها جلدة رجعتلي الثلاجة وبعد فترة عملت القهوة وصبيتها في الثلاجة بس ماقفلت حاولت وعجزت اتصلت عليها وقالتلي ماشفت لاجلدة ولا غيرها وبعد اسبوع دقت عليا وقالتلي لاقيتها
دمتم سالمين.
شوفوا كيف حطيت نفسي في موقف محرج وبايخ ....
كان يامكان في قديم الزمان كنا عازمين في بيتنا أصحابنا أتراك علئ الفطور في رمضان وجوبالنا معاهم طرطة وكانت فيها كريمة زرقا وبيضاء كتيرة وبعد الفطور قطعتها وقدمتلهم هيا واكلنها بالعافية لكن انا جاتني حالة ضحك غريب ضحك بكركرة بصوت عالي
كركركركركركركركركركركركركركر كركركركرككرككركركركركركركرككرك رركركركرككركركركككركرككركركركر كركركركركركركرككركرككركرككرركك كركركركر
وحاول جوزي يسكتني وانا اضحك من قلبي تقولو احد بيضغضغني لكن كنت ازيد وسارت الحرمة وجوزها وولدها مستغربين تصرفي وكان كل مااحد يكالمني ااشر على الولد واضحك جوزي ما استحمل قعد يفرصع بعينة وانا ااشر على الولد واضحك
كركركركركرككركركركركرككرركرككر رككركركركركركرككركرككركرككركرك رككركرككركركركرككركركرككركركرك كككركركر
السبب انو مسكين الولد كان مركب تقويم والكريمة البيضاء والزرقاء عليها وكان شكلة يموت من الضحك ومسكين الولد احرجتة وخليتة رايح جي على الحمام يفرش أسنانة ....
ومن بعدها والولد كل لما يشوفني يتجاهلني علشان ما احرجة دائما
بس والله انا ماكان قصدي اتريق علية بس ما ااقدر اشوف شي وما اتريق واعلق علية ..
دمتم سالمين
...شوفو يابنات هموم الغربة ايش ساوت فية
في البداية واحب اسلم على كل الموجودين في المنتدى الي احبه واحب افضفض قلبي فية ومعليش عن الانقطاع لمدة تقريبا شهرين او اكتر والله لسبين الاول كنت مسافرة وبعدها سقطت للمرة التانية بدون سبب وهدا من الغربة وانا مرة تعبانة ونفسيتي صعبة وما اني طايقة نفسي وبااهون على نفسي بالصبر والحمدالله ربي يصبرني على ما بلاني وان شاء الايام الجاية تكون ايام خير وبركة علية وعليكم وعلى كل المسلمين المهم مشكلتني اني لما انام اشوف اشياء وبعدين من جد تتحقحق وانا بسبب دية المشكلة خصرت اعز صديقة لية والله ما اتمني الي صار بيننا ولكن وربي كل الي شفتة في المنام تحقق وكانة كان مسجل الي صار في الحقيقة في المنام والله ماني دارية المشكلة فيا ولافي الناس المشكلة دية عندي من انا صغيرة وكنت احكي كل شي لأهلي وما يصدقونو وبعد ما يصير الي بااقولة يتفاجو ...
انا ابغ اسال سوال كل المغتربين وبعيدين عن اهلهم بااحلمو فيهم..
لانى وربي بااحس فيهم انا كانو فرحانين او متضايقن اشياء كتير غريبة تصيرلي مثل عيني ترف لمدة يومين او اكتر نغزات في قلبي وينقبض قلبي والمشكلة انو المشكلة انو في الغربة دية كل سنة افقد احد من اهلي عزيز علية اول ما فقدت ستي الله يرحمها في اخر شعبان ليلة رمضان تصدقوا اني ما كلمتها من يوم ماطلعت من السعودية يعني من تلات شهور ويوم ماماتت كنت رايحة السوق مع جوزي واحنا في الطريق قلت لجوزي ابغ اكلم ستي دحين قال لي طيب لما نرجع ***** الله نكلمها ونكلم كل الي نبغ نعيد عليهم برمضان ولكن اصرت اني اكلمها دحين لاني كنت خايفة ما ارجع اكلمها تاني وكالمتني وهيا فرحانة وسالتني متى جين وكانت صوتها ممتاز ولما رجعت من السوق قالولي انها ماتت كانت الصدمة مرة كبيرة لاني من ساعة كلمتها بس ما ادري الي خالني اكلمها هو احساس المغترب ولا ربي رايد اني اسمع صوتها وهيا تسمع صوتي..
والسنة دية وفي شعبان مات سيدي الله يرحمة ..
ومن شهر امي متشحططة مابين تخصصي الرياض وتخصصي جدة لانو خالي عندة الكبد الوبائي ومافي احد يتبرعلة بالكبد وهو مابين الحيا والموت ومسكينة امي حتتبرعلة بالكبد وخالتي معاها السرطان وحالتها متاخرة وكالهم طالعتهم الامراض فجاة ومع بعض ..
وانا في هم كبير الحمل وليش انا بااسقطت وايش السبب والاحلام والغربة وليش لما اشوف ستي الله يرحمها فرحانة امي تكون فرحانة ولما تكون متضايقة امي تكون متضايقة مع العلم اني لما كنت في بلدي ما كنت احس بااحد ولا يهمني مشاكل ولا هموم احد والدنيا كل الي يهمني فيها نفسي والغربة وبس اكبر هم ما ينزح الي لما الواحد يرجع بلدة ..
بليز ابغ اعرف ايش الدوامة الي انا فيها وهل كل المغتربين كدا..وشكرا غمبجتلكم قلبكم.. مع تحيات لولاتو2002
ياريت يابنات تشجعوني على كتابة مذكراتي مع الغربة لأنو لو ماكتبت حاانفجر ويرضيكم اموت غريبة في بلد الغربة .
ياقلبي ياكوت كوت يامانت شايل وتسكت
انا في ولاية قريبة منك بس مافيها شي على قول المثل (مافي شي ببلاش إلا العمى والطراش) على قول ستي الله يرحمها .
وقدر الضغط ينباع في السوبر مار كتات الكبيرة السوبر سنتر (wallmart, target , kmart, shpko )
بس ماهي عملية خمس شهور وبعدين ارمية في الزبالة. لانو ما عندهم هنا قطع غيار صفارة ولا جلدة مو زي بلدنا والعز الي كنا فية الحمدالله..
دوري علية ان شاء الله تلاقية ..
بصراحة يفك ازمة ويختصر الوقت سلق الحمة تاخد بس نصف ساعة وتطلع مهرية أما الدجاج بس عشرة دقايق..
انا كل سنة ماشاء الله اجيب معايا قدر ضغط بس مقاسات تختلف اشتريت الكبير مرة حطيتة على بوتقازهم طعوجت العيون لانها بالكهرباء ومن بعدها ما استخدمتة قاعد في المخزن زي قلتلة ..
والله يعينكم يالله ابغ اقوم اطبخ رز بالحمص الله يستر وابغ اساوي أشار جزر يالله باي
ابشري ارسالي عنوانك وجهزي الصفرة وان شاء الله يوصلكم الرز بالحمص والأشار طازة طبعاً جمبها سلطة الدقس الحار ..
ما شاء الله ظبط الرزفي قدر الضغط ورشيت على الوجة سمنة فارم علشان يكون رز ولا بعده يم يم يم يمو الاشار مهري وحامض وحادق وحار ...
بصراحة ماني قادرة استنى الين لما يجي جوزي واحط الاكل كل شوية وانا افتح القدر واكل ملقعة شكلي حا اخلص الاكل قبل ما يجي ..
يالله باي
لكل الي وقف بجمبي بقلبه أو بفعله في كربتي وغربتي
أن شاء الله ربي يفتح عليها ويفرج لها كل همومها ويديها على قد نيتها
حتقول لولي ليش كل دا اقولك الحمدالله ربك مايضيقها إلا لما يفرجها من عنده وربنا يتولنا برحمة الحمدالله نصف همومي إنزاحة وفرجها من عنده يارب أفرجها على كل المسلمين وأسعده
أسئلة لكل المغتربات مع أزواجهم
السلام عليكم..
أن شاء الله تكونو مبسوطين من كتاباتي وتكون خفيفة على قلوبكم ..
من غير لف ولا دوران بصراحة لكل المغتربات والمحرومات من بلادهم وأهلهم ومغتربات مع أزواجهم لسبب دراستهم أوأ شغالهم أو بعثتهم هذة أسالتي ويليت تجاوبني بصراحة :
لمانرجع بلدنا أن شاء هل الكل أو البعض حيقدور وفقتنا جمب أزواجنا ومساعدتهم وتهوين الدنيا عليهم ؟
يعني حيقدور أننا حرمنا نفسنا من أشياء كتير أحنا في أمس الحاجة لها ؟ ..
كيف حيكون استقبالهم لنا هل ياترى بنفس الشوق والولة ألي راح يستبقبلوها لازواجنا؟ .
هل حيقول أنوأحنا سبب في نجاح أزواجنا وتوفيهم في دراستهم بالغربة طبعاً بعد توفيق ربنا لهم؟
ولا تنسوا المثل ألي يقولوراء كل رجل عظيم إمراة)
وسلامتكم وأن شاء الله دوماً سالمين ..
صدقي يابطة أني عايشة في امريكا بس البلد الي انا فيها بلد متخلفة كلها هنود الحمر البفالو مافيها الا واحد(سامس كلاب,وال مارت,موال )اتخيلي انا في بلد التطور ولما اروح بلدي اشوف الدنيا غير في كل شي كااني كنت عايشة في صحراء ولما اقول للناس لاتحسبوها عليا سفر احسبوها قبرة ..
احنا هنا محبوسين طول الاسبوع لاخرجة ولا دخلة وان خرجتي في الويك أند وفقط يوم الجمعة قضيتي ورجعتي حتى مافي مكان للنزة او التمشية ما في احد جاها الا انصدم واسزدت الدنيا في عينة من كتر ماهي فاضية وصغيرة ..
حتى العرب الموجودين هنا ينعدوا على الاصابع العشرة والدنيا فرقتهم الظروف والدراسة والغربة
ليه كذا .. ماصدقت نسيته خليه الين ادخل الجامعه ويذكروني فيه
اكثر انسان حاقده عليه ربي رحمه بموته ولا كان شاف وش سويت فيه
حرام عليكي أنتي مجننك نيوتن دا مسكين مدق دق ونفعنا كتير مش بس في الفيزياء الله يقطعها أكرها في أمور الدنيا كلها لو تدقدقي في نظرياتة أبعادها كتيرة وبعيدة..
أما أنا أكرة باسكال هذا عالم في علم البرمجة وننظم وتحليل البيانات وهو أوائل من أخترع الحاسوب..
دراستها في البسكال ونظم وتحليل البيانات هذة المادتين كانت صعبة لانها كانت يبغالها تركيز لكن بعد مافهتها مستحيل انساها أن شاء الله.
بس نظرية كانت في مفهوم وعمل الحاسب مثل:
لو جيتي تبغي تعملي فنجان قهوة أيش تعملي أول حاجة لازم تحليلي المطلوب يعني تقولي علشان أعمل قهوة لازم أعمل حاجات وأطبخها وبعد كدا تخرج القهوة
المدخلاتركوة قهوة ,سكر ,ماء,بن ,ملعقة,نار,فنجان)
المعالجةتضعي الركوة على النا وتضعي فيها الماء والسكر والبن وتحريكها )
المخرجات(قهوة سخنة وصبيها في الفنجان)
هذا كان تحليلة لعمل الكومبيوتر
تدخلي مدخلات وتتعالج بواسطة الحاسب وبعد ذلك تخرج لتظهر على الشاشة مخرجات.
يعني مثلاً :
(1) لو كتبتي برنامج في الإكسل أو الأكسسس أو البور بويت أو الفجيوال أو الويندز أو غيرة من برامج الحاسوب هذة تسمى المدخلات
(2)ويعمل الكمبيوتر على الأمر ألي أصدرتية لة إما بأعداد برنامج أو قيام بعمليات حسابية أو قص أو نسخ فهذة هي معالجة الحاسوب.
(3)عندما تظهر الأشياء التي أدخلتها وعالجها الحاسوب تظهر على الشاشة أو على السماعت فهذة هي المخرجات.
الله يفكرك ياسندويشتة بالشهادة فكرتني بحاجة تعلمتها ودارستها لكن بعد الغربة ضنيت أني نسيتها لكن الحمدالله لسع الذاكرة شغالة.
بصراحة ياريت الكل يشارك معنى الصداقة في الغربة؟( الجزء الأول)
السلام عليكم ..
احب اسال سؤال لكل مغتربة وبعيدة عن أهلها وعن بلدها مثلي..
1) ايش معنى الصداقة بين الصديقة أو الرفيقة في الغربة؟
2) هل الصديق وقت الضيق في الغربة؟ وممكن يكون هذة الصديقة موجودة فعلا في الغربة؟
3) هل وقفت الصديقة معك دائماً في الفرح والكره في الغربة؟ وهل وقفتها جمبك مجاملة أو شفقة أو لتمشيت مصالح وجبر خواطر؟
4) ممكن تفضفضي لصديقتك عن كل شي في حياتك سواء كانت كبيرة أو صغيرة خاصة أو عامة؟
5)ممكن تحطي خطوط حمراء ممنوع تجاوزها في حياتك الخاصة أو العامة للصديقتك؟
6)ممكن تفسحي الطريق لصديقتك في الغربة للتدخل في حياتك الخاصة والعامة؟
مشكورين وياريت الكل يجواب بإخلاص لانو اريد ان افيد واستفيد ..
وممكن تكون إجابتكم معلومة تفيد كل المغنربات أو الي حيغتربوا ..
سلام مع تحيات لولاتو2002مغتربة مغتربة مغتربة في الغربة الصعبة والمرة والقاسية..
انا خبره في الطبخ لاني من المدينة المنورة الحمدالله ما يحتاج اقولكم عن بنات المدينة في الطبخ بس الحمدالله حبيت وهويت الطبخ قبل الزواج واتدربت عند ستي لانو ماما الله يخليها ما تحب توري احد طبخها ولاتحب تعلم احد فااطريت اتعلم كل الي انا احبة من ستي بس لا تفرحو كتير لاني الطبخة الي احبها اتعلمتها ودائما اسويها بس الى ما احبها ما ابغ اتعلمها وحتى لو تعلمتها ماعمري ظبطها انا اعرف اساوي كل شي انا احبة الحمدالله لانو انتم عارفين في الغربة مافي مسلي الا المطبخ حتى لو ماتحبية لازم تتدخلى لانو اكلهم ما يتاكل انتهزو الفرصة وتتدللو قبل ما ارجع في راي ايوه ولاتنسو اني الحمدالله اعرف اتدبر في كل شي للعزايم الكبيرة واساوي كميات وافرزنها اما للعزومة او للعوزة والزنقة ي**** سلام
وفي الأخير وجدت ضالتي في الطبخ أفش غلي فيه من غربتي والحمدالله أبدعت وأبتكرت وأتفننت فيه ..
وصرت مشاء الله كل يوم أنزل طبخه في المنتدى ألين لما وصلو فوق خمسين طبخه وأتميزت بالعضوه المميزه لاطباق عالم حواء وفي الاخير مبدعه أطباق عالم حواء الحمدالله ولكن فرحه ما تمت كل صورطبخاتي ضاع:44::09:ت وان شاء الله ارجع اصور من جديد وأضيع فيها وقتي وتمر السنه ألي باقيتلي على خير وسلامه..
