للمبتدئات في التنظيف نقلت لكم موضوع روووعه

يلا قومي الحين بعد ما تقرين على طول

مو مهم ليل نهار مو شغلي

قدرتي تسهرين الى الحين خلاص ابتدي

قدرتي تقعدين الصبح لو قرأتي موضوعي الصبح

خلاص توكلي على الله والله يجعل صباحك قوه ونشاط

مالك خلق !!؟؟

انزين يلا نكذب على روحنا

قولي لنفسك اشيل اشياء بسيطه وخلاص

حطيتي ايدك بشي

يلا كملي اشوي اشوي

لا تشغلين نفسك بأمور موجوده بغرفة النوم

ما يحتاج احنا قلنا الصاله ..
يمكن بعد اشوي يدخل عليك احد وانتي بالحاله هذي ..

هاتي كيسين

كيس نخليه مهملات يمكن شي طايح يمين شمال ما تبينه

كيس ثاني نحط فيه الاغراض الي ما تخص الصاله
يمكن مشطك موجود على الطاوله بوسط الصاله

يمكن مشى بروحه وركن على جنب ما ندري

حطيه بالكيس وبعدين اقول لك وش تسوين فيه ..

خذيتي لفه

هااا اشصار بالاكياس عسى ما خلصتي وما جزااا الكيس وصرتي تحتاجين لكيس ثالث

هههههههه

ودي الاكياس المطبخ الاثنين ما عليك منهم خليهم على الطاوله بس قولي لهم لا يمشون بروحهم

عندك حضر تجول اليوم ..

يلااااااااا اشعليكم ابي اضحكم بثقل ونفس الوقت احمسكم للعمل

طيب نروح نشوف المخدات الزينه او الابجورات او التحف

في شي مو بمكانه او تبين تغيرينه ..

قرري بسرعه !!

بس لا تطبقين الحين

يعني بتعدلين الديكور قبل ما تمسحين الغبار

ما بتطلع حلوه منك

يلا اقل شي اقل شي هاتي الرشاش وفوطه نظيفه

على السريع خليك سريعه لأبعد الحدود وقفي مخك وحركي يدك

وتنفسي بعمق ..

ولا تفكرين وش باقي علي وله اكيد ما بخلص الحين والله يكون بعوني متى ؟؟

اكيد الله بعونك بس انتي استعنتي فيه سوي الي عليك الحين واستعيني بالنعمه الي عندك

ما شاء الله الصحه والعافيه ايد بدلها اثنين ورجلك شايلتك شيل ..

كملي بسرعه وكرري استغفر الله ربي واتوب اليه

صدقيني لو اكبر صاله ما بتاخذ منك ربع ساعه

خلصنا هاتي المكنسه وبلا كسل

يلا شغليها ...

والله اني اعرف ناس ما يشغلون المكنسه من الكسل انهم

يمدون الواير للكهرباااا ..

بس يلا معلش بدينا وبننتهي بسرعه بسرعه

يلا نبتدي بالستاير ..

مرريها سريع سريع خلصتي عندك ستاره ثانيه معلش كمليها لا تزعل منك

خلصتي شفتي خمس دقايق

يلا كملي معروفك ومرريها على الكنب ..

حركي الكنب وتأكدي ان كل شي نظيف تحته

وكنسي الصاله كلها وشوفيها

ايش رايك والله ما يبي له شي

ادري مو هنا المشكله

المشكله كيف نخليها دايما كذا ؟؟

كم مره تمرين على الصاله باليوم ..

عشرات المرات رايحه وجايه لعيالك صح

شفتي كوب جزاك الله خير شيلها وفكي عمرك دخيلك ما يبي له شي كذا وله كذا

رايحه جايه على المطبخ معلش ما فيها شي ولا بينقصك شي

شفتي لبس من عيالك طايح وله لعبه شيليه وخلي جنودك معاك يساعدونك

والله الطفل الي عمره سنتين يفهم قولي له وده السله

خليه يساعدك في بعضهم عندهم جنود بدل الجندي الواحد وبيساعدك

ويحبون يساعدون لكن يبي لهم تشجيع

ومع الايام صدقيني بتصير عاده عندهم

ولا تنسين تعطينهم مكافأه بنهاية الخدمه لو صفقه لو حضنه لو ايش ما يكون

اهم شي يفرح لفرحك فيه

ان احتجتي لشي وانتي بالصاله

تذكري انك تروحين تاخذينه من مكانه وتستعملينه وتردينه مكانه بالضبط

ما يحتاج تنقلين كل شي من مكانه كريم علبة الكلينكس

خلصي ورجعيه خليك دائما حركيه ونشيطه

وتذكري دائما لو انا هملته الحين كل شي بيرجع على حاله

وقطعه بتجر وراها قطعه ثانيه

وبالاخير الصاله بنسميها مخزن اكيد فاهمين علي

ملاحظه :

بعض الحريم الله يهديهم
مشغول بالها بالمشاكل الي تحصل بينها وبين زوجها
وتقول ماني مشتغله اليوم وله نفسيتها ما تساعدها
يا بنت الحلال اهمالك بيأثر سلبا على حياتك معاه اكثر واكثر
لو المشاكل مقتصره على شي معين بقصورك بالبيت بتشردينه
وبتنسين الراحه خير شر لا بالنظافه ولا بالمعامله
ركزي معاي مشاكل الزوج والبيت شي والنظافه واعمالك شي ثاني
بالعكس انتي بإنشغالك ان شاء الله بتريحين نفسيتك وتطلعين عصبيتك
بعملك بالبيت ...

صدقيني وعن خبره ان لمجرد انتهائك وقت ما تكونين عصبيه من اعمال بيتك
بتحسين ان طاقتك السلبيه كلها انتهت من جسمك وارتحتي نفسيا
عصبتي من اصغر عيالك حطي يدك بشي وخلصيه
استغلي طاقتك ومشاعرك الاااااااااا بالطبخ
رجاء ان كنتي عصبيه لا تطبخين الا لما تشغلين نفسك بشي قبله
ما نبي تحرقين عمرك وله تطلع الطبخه شينه ..

في بعضهم لا عاد بدون مشاكل تحس نفسها خدامه
يعني دائما تردد يا ربي شسواه وانا كل يوم هذا مصيري
اشتغل بالبيت وعيالي حولي يزهقوني بطلباتهم
ماني مشتغله وخلاص اضراب اليوم بتاكلون وخلاص

يعني بكره وين تبين تلاقين عمرك ببيت الجيران مثلا ؟؟

...........

ترااا هالأسئله فعلا بنات طرحوها من قبل بدون ذكر اسماء
وهذا شي نفسيا متعبهم
لكن استغلال الطاقه السلبيه بأمور مفيده لبيتك ولنفسك اولا
شي راح تتعودين عليه يوم بعد يوم
...........

انتظر منكم تكملون الصاله وبعدها نكمل باقي البيت
لكن مثل ما قلت ركزوااااااا معاي الله يعافيكم
ما راح ننتقل الا لما تتأكدين ان وانتي ماره على الصاله
ان ما يكون في شي مو بمكانه الصحيح وصدقيني
يوم بعد يوم بتفتح نفس للتنظيف بالمكنسه ومسح الغبار
لأن بعيونك راح تشوفين الصاله ما يبي لها الكثير
كل شي بمكانه لكن بتنسين ليه كل هالترتيب
وممكن ترجعين للحاله السابقه انك تبعثرين اغراض الغرف الثانيه
في الصاله عشان كذا تذكري دائما
كل شي بوقته يعني نشوف قطعه صغيره لو دبوس نرجعه او نحطه ببالنا
وقت ما نكون جالسين واول ما نبي نروح الغرفه مثلا ناخذها بطريقنا ونرجعها لمكانها الصحيح

فكره ثانيه حطي سله بالصاله
وكل شي مثل لعب او كريم او اي شي حطي فيه
وآخر الليل عاد لفي بالسله
كأنك ألس ببلاد العجائب
وحطي كل شي بمكانه وخلصتي من الفوضى وانتهينا ..


قبل ما انسى الكيسين الي بالمطبخ
وحده تنقط بالزباله كرمكم الله
والثانيه تطبقين فكرة ألس ببلاد العجائب
.................

راجعه ان شاء الله اكمل ..

ا شاء الله عليكم حبيباتي عفيه عليكم والله ..

إلي طبقوا عملية تنظيم الصاله وتنظيفها السريع بشكل يومي

لا تنسون وتذكروا دائما ان سر استمرارك بالنظافه هو النظام نظمي ورتبي اول بأول

يوم بعد يوم بتلاحظين انك تعودتي على الوضع

وحتى جسمك يتعود على النشاط وتتركين البطء بالحركه

ودائما تذكري إنك قادره على عمل البيت دام غيرك يقدر عليه

وانتي مو اقل من احد ولا انك اقل بالنظافه طلعتي من بيت نظيف

وان شاء الله تستمرين ببيتك على ما تعلمتيه ببيت أهلك

أي شي انتي مستصعبته بالبدايه فكري بينك وبين نفسك

كيف اسهل على نفسي هالشي ..

يعني مثلا مستصعبه الكوي ..

فكري ليش انا ما احب اكوي وليه الكوي بالنسبه لي شي متعب

هذا يعني اني اكوي بطريقه خاطئه

ان كنتي لمجرد الملل معلش وقت نوم اطفالك هاتي الطاوله

وخليها قدام التلفزيون واشغلي نفسك بالتلفزيون وما راح تحسين الا انك مخلصه كل شي

وان كان بسبب ألم بالظهر او بالرجل

حاولي تسهلي امور قعدتك او وقفتك بالطريقه الصحيحه

وان مره مره مو حابه الكوي غيري اسلوب الكوي عندك

بما معنى مثلا كوي بطريقه غير الي متعوده عليه


في بعضهم يطبقون الملابس واجهة القميص مع خلف القميص

وفي بعضهم من يدخل الزوايا بطاولة الكوايه عشان يسهل عليها الكوي

غيري عشان ما تملين من عملك بالشكل الروتيني

وبعد التغير بتفضلين طريقه على الثانيه وبتحسين اي طريقه اسهل لك

دائما جربي انك تغيرين لأن بالتغيير راح تتعلمين الاسهل من الاصعب

وتكتسبين الخبره مو بس بالكوي بكل شي خليك دائما متجدده

وغير تقليديه فهذا الشي راح يأثر ايجابا على خبراتك بالمنزل

في بعض من خبراتي والله ما اذكر اي رقم ذكرت لكم انكم تجلدون

طاولة الكوي بالقصدير عشان توفرين وقت بكوي الملابس طبقوها جزاكم الله خير

وراح توفرين الوقت لنفسك وتنتهين بسرعه من الاكوام المنتظره بسلة الكوي ..

...........

وش رايكم ندخل غرفة النوم

الغرفه الرئيسيه الي دائما المفروض نحس فيها بالراحه بعيدا

عن الفوضى وبعيدا عن تذكيرك بأعمالك ومسؤولياتك

وملجأ لك للراحه وايضا المكان الأكثر الي يحتوي على ذكرياتنا الزوجيه العاطفيه

تكلمت بتجاربي 11 عن ميز التواليت كيف ترتبينه وكيف المفروض يكون

تكوم العطور والكريمات والاوراق وغيره يخليك مو مرتاحه أبدا

وبتصير الغرفه فوضى عارمه ونفس الوقت يوحي بالاختناق

يلا هاتي فوطه ورشاشك صديقك بوقت الازمات

ان كنتي تستخدمين رشاش خاص بتلميع الاثاث تمام

وان ما كنتي تستخدمينه هاتي رشاش منظف الزجاج

وهاتي الكيسين الي تكلمنا عنه لا تنسينه

وان خصصتي بدل الكيس سله احلى واحلى معناته انك حبيتي انك

تكونين ألس ههههههاااي

طيب حبيباتي

وش نحتاج بعد ولا شي بس لو تزيدين الفوط يكون افضل ..

صكي على نفسك الباب عشان ما تشغلين نفسك بشي ثاني

ويا حلات الي تسوي شغلها وعيالها نايمين او مشغولين احسن وابرك


أفتحي الشبابيك ان كنتي بتشتغلين الصباح او الظهر وهذا شي مهم

لا تنسينه تغيير الهواء بالغرفه بشكل يومي مهم لصحة الجميع

وش رايكم نبتدي من وين ...؟؟

أكيد من السرير ان كنتي من النوع الي يخزن اغراض تحت السرير

اقول طلعي اغراضك الي تحت وبتشوفين ان في اشياء ما تبينها

ليه ؟؟!!

قبل شهر خزنتي شي وتفكيرك انك تحتاجينه يوم من الايام

لكن بعد شهر صدقيني يمكن تفكيرك بالغرض نفسه مو نفس الشي

ان كنتي منتي محتاجته ارجوك قطيه ولا بعثرته و بدل ما تخزنينه استغلي

الحيز الي بياخذه لراحة بالك وبلاش تتكوم عليه الغبار عطيه لأحد يحتاجه

وان ما كان يصلح قطيه ويكفي الي عندك من اغراض

الشقه ما تستحمل اكثر من كذا تخزين

كيف عرفتي !!!

عرفت لأن لو كانت شقتك تستحمل كان ما خليتيه تحت سريرك

لجئتي لطريقة تخزين تحت السرير لأن ما بقى عندك مكان تخزنين فيه

يعني مخزنه شي بعيد عن نظرك حتى لو احتجتيه راح تتكيسلين مليون مره

انك تطلعينه وتفكينه وتنظفينه وكاهواااااااااا يمكن سنه ما استخدمتيه

طلعي كل الاغراض وهاتي المكنسه ومرريها تحت السرير

وانتي منسدحه ههههههه

واجردي الاغراض وكوني حازمه ولا تكذبين على نفسك

وبعدها رتبيهم تحت السرير

ان كان سريرك من النوع الي تحته مفتوح

خلي الاغراض بالوسط عشان ما يبينون

ودائما غلفيهم بكيس كبير

او سفره الي تستخدم لمره واحده لكن الصقي الجوانب

عشان تحافظين عليه من الغبار

وكل الي عليك بالاسابيع القادمه انك تمررين المكنسه على الجوانب

والاغراض ممكن كل 3 شهور تمسحين عليه بفوطه نظيفه بإستخدام الرش

خلصتي يا حلوه

عاد الي ما عندها اغراض تحت السرير اكيد فرحانه لأنها ما بتطبق

طيب تعالي نعدل السرير

بدلي الشرشف يكون افضل

كل ثلاث ايام اما المفرش براحتك انتي ايش متعوده

انا ابدلهم كل ثلاث ايام مع المفرش

وفي بعض البنات بس يبدلون الشرشف وهذا شي طيب

يعطيك راحه ونظافه وقت النوم ..

عدلتي السرير كيف مخداتك زينتيهم رتبتيهم

الي عندها مخدات زينه على السرير

تعالوا اقول لكم طريقتي وقت النوم

كل واحد مننا يحتاج لمخدتين لكن مخدات الزينه

شسوي فيهم وقت النوم

اخذهم وانزلهم واحطهم على الكنب بغرفة النوم

وان كان عندك كرسي عادي اوكي حطيهم عليه

او ما عندك شي خلاص حطيهم كلهم بزاويه

ليـــــــــه؟

عشان اليوم الثاني بس تقعدين من النوع تكونين مرتاحه

كل الي عليك تعدلين السرير والمخدات كلها بمكان واحد تنقلينهم

مره واحده وخلاص ونفس الوقت عشان الصبح لما تقعدين لمجرد منظرهم المبعثر

يمين شمال راح تحسين ان شغلك شاق

ايه لا تضحكون ترااا اشياء تافهه نفس المخدات ممكن تكسر عزيمتك

يعني كل ما يكون كل شي مرتب باليوم الثاني

كل ما تكونين جاهزه لليوم الجديد وعندك طاقه لمجرد رؤية النتائج

الممتازه من اليوم السابق راح تهون عليك مهمة اليوم ..

طيب الحين راح نسوي كل شي بسرعه بسرعه ماشي يا بنات

فتحي دولاب دولاب

ثلاث خطط بوقت واحد اوكي

كيسين قدامنا والبخاخ والفوطه

يلا همتكم ...

ايه قبل ما انسى جتني رساله من وحده

ضحكتني تقول اخذ اللاب توب معي بالصاله كل يوم واسوي واطبق

كل جمله واركض اسويه واجي اشوف التطبيق الي بعده هههههههه

عاد الي عندها لاب توب خذيه معك على غرفة النوم ويلا وانا معاك ويدي بيدك

افتحي الدرج ما تبينه قطيه تبينه خلاص حطيه على جنب

الدولاب فضى يلا بختين وامسحي سريع سريع

رجعي الاغراض الي تبينهم وان كان عندك علب استغليه بنفس الوقت هاتي

وحطي فيه شغلاتك وخليه بالدولاب

كريماتك كل شغلاتك شوفي التاريخ منتهي يا خسارة الفلوس معلش قطيه

مكياجك اول بأول ما تبينه طلع ما يناسبك طلع يجيب لك حساسيه

عطيه لأحد ثاني ان كان قديم اكثر من سنه ونص يلا قطيه اكيد منتهي

كل دولاب بنفس الطريقه

وخلصي امورك بسرعه بسرعه

قدر الامكان خلي غرفة نومك للنوم والراحه بس

كتاب معلش حطيه بالدرج وخلي مكانه شمعه افضل لكم

ما نبي شغلات كثيره على الارض تحف كثيره ما يحتاج

اهم شي راحتك ...

ان كان في شي متعبك بغرفة نومك من ترتيب او نظام

شوفي دائما وش الاسهل وايش الي يريحك سويه

خلصي معاناتك منه احيانا اشياء موجوده حتى نتعثر فيها بطريقنا

بلاش فكي عمرك غيري مكانه او استغني عنه ما يحتاج كل يوم

تصبحين عليه و تمسين عليه ..

خلصتي يا حلوه هاتي المكنسه وجهزيها

بس قبلها شوفي المرايا واثاثك فيه بصمات منكم

او غبار نظفي بسرعه كلها خمس دقايق

وكلمي نفسك قولي يلا ما باقي شي واخلص وارتاح وافتك

ان كان الغبار مره مره بسيط هاتي الريشه السحريه الي خبرتكم عنها

مرريها على الاثاث

اما الزجاج ان فيها بصمات بشكل سريع

اقول لك شي طلعي من الغرفه الحين

روحي خلي لك فحم عشان يولع لأن ما بقى شي وتخلصين

وان كانت عندك فواحه خلاص ابرك لك

هاتي المكنسه واكنسي بسرعه ولا تنسين الستائر

خلصتي يلا رجعي المكنسه وسكري النوافذ

هاتي الفحم او شغلي الفواحه

ويلا خذي عطر او معطر المفارش ورشي على مفرشك وعلى ستائرك

ووجهي البخور وخلي ريحة غرفتك تهوس زوجك لما يرجع

شوفي يا قلبي الكلام الي كتبته بياخذ منك ساعه بالكثير

ان كان عندك شي مو مرتب ولانك نظمتي ادراجك

لكن لو انتي خلاص نظمتي

فصدقيني ان الي باقي عليك بس تعديل السرير

ومسح الغبار ان وجد ( حاولي انك حتى لو ما شفتي اثر للغبار مرري الريشه يوميا وما راح تتعبين ابدا من تجمعات الغبار وغيره )

وبعدها المكنسه وانتهينا ..

كيف تحافظين على نظافة غرفتك الى اليوم الثاني

واحد سكري الباب عن اطفالك قفليه ان كانوا يقدرون يفتحون بابك

ثانيا ملابس الي تتغير على طول للسله

ثالثا ممنوع منعا باتا انك تطلعين ملابس من الغساله وهي نظيفه و

تخلينها بغرفة النوم عشان متى ما فضيتي تطبقين لااااا انسي

تطبقين اول بأول ان شاء الله وانتي واقفه مو مهم تبين انجاز مهماتك

بأسرع ما يكون خلصي اول بأول وعلى طول على الدواليب

يعني بذمتك انتي مغسله وناشره وغيره ومعطرته بكمفورت عشان يكون تحت رحمة الانتظار

لا خليك شطوره ومثل النار على طول وصدقيني لمجرد انك تدخلينهم الدواليب تحسين ان هم وانزاح

بدل ما تمرين على السله المنتظره مرات ومرات باليوم وانتي تقولين متى وأووووف ومدري وشو

فكي عمرك ترااا محد راح يجي ويسويه بدالك

لا تتعبين نفسيتك كذا وله كذا بتسوينه غصبا عليك

لأن ما في احد يساعدك غير نفسك

خلاص انهي كل شي من اوله وقولي وداعا للتعب النفسي وما راح الوم نفسي على شي ما سويته

شي ثاني حبيباتي ان الوقت الي تاخذينه بتنظيف غرفتك بشكل يومي ما راح ياخذ منك حتى نص ساعه

ترتيب سريع مسح وكنس وقفلنا وخلصنا ..

..............

ان شاء الله بكره بنتكلم عن الطامه الكبرى غرفة الاطفال واماكن تكدس الالعاب ..

وسامحوني على القصور
ا شاء الله عليكم

عاد ما نبي تشجيع وحماس بس لقراءة الموضوع

يعني التطبيق على طول لا تقولين تعبانه التعب بيروح بعد النتيجه الاخيره

والله التعب النفسي اشين من التعب الجسمي

تعبانه من بيتك ومن اشغالك الي قدامك ومتعيزه تخلصينها

لكن لو حطيتي يدك وخلصتي شوفي كيف بتحسين ان عندك

وقت فراغ كبير وراح تبدعين كيف تطلعين لج شغل من تحت الارض

يعني مثلا الي دائما تنظف بيتها وبيتها نظيف ومرتب

تأكدي انها دائما تهتم انها تطلع لها اشياء زياده

مثلا تشيل الفلاتر وتغسلهم للمكيفات

ويكون عندها بعد نظر لكل شي

لأن نفسيتها مرتاحه وقادره انها تتابع يوم بعد يوم

لكن تكدس الاعمال يخليك تاخذين الامور ببطء وملل

وكأن الوحده مننا جارينها لغرفة الاعدام

الي دائما بيتها نظيف اول بأول

تلاحظين عليها من زود وقت الفراغ الي عندها

متعدله متكشخه وريحة عطرها وااااو كأنها هي بكبرها فواحه كل ما تمر

مكان تفوح بالروائح الزينه ...

يا بخته هالريل يرجع يلاقي كل شي عال العال

ويا بخته ان يشوفج كل يوم بأحلى حله

شوفوا يا حريم احيانا الرجال يدخل البيت

ما يقول والله البيت نظيف ويعطيك العافيه

وانتي ما شاء الله ربت بيت سنعه ونفس الوقت مهتمه بنفسك

لكن تأكدي ان طبع الرجال غير عن النساء

يعني يلاحظون والله يلاحظون اشياء احنا ما نلاحظها

لكن يقتصر الكلام بنظره او معامله طيبه

وان كان دخل عليك حتى ما ابتسم بوجهك تأكدي

انك مو انتي السبب لأنه جاي من برااا البيت يعني السبب

بخارج بيتك عاد هنا يجي دورك كاس عصير بارد كفيل انه يلفت

انتباهه لك بحنانك وعطفك واهتمامك ..

ابتسمي وصكي فمك لا تقولين وين تأخرت وله اشفيك وله من هالاسئله

عاد في حريم ما شاء الله عليهم يعني تشوفه مكتأب تجي تقول له كيفك عساك بخير

يا ماما خليه يتنفس اشوي عطيه مجال عشان يستوعب انه داخل بيته الي في راحته

بيته الي لاجئ له بعد يوم عمل طويل وممل وشاق وروتيني ..

تبون الصدق انا زوجي عمله من النوع الي المفروض انه يتكلم كثير واجتماعات ومشاكل مع الموظفين ولازم هو يشوف لهم الحل السريع باللوكيشن المعين والله لو خلااا الشركه او مكتبه يجيه تلفون ولازم يشرح ويتكلم ويتكلم واحيانا حتى بالبيت يتكلم عن العمل بالتلفون وانا اصدع اقول مسكين اشلون حاله هو كل يوم على نفس الحال

فلما يرجع اعطيه مساحه انه يكون بروحه يعني لو دخل غرفة النوم اجيب له العصير وانا مبتسمه وبعدها اطلع

عاد احيانا مو دائما اكسر خاطره يقول لي تعالي قعدي اقعد لكن بسكوت وان شفته تكلم خلاص اواصل معاه

لكن ان ما نادى علي اخليه بروحه يريح اعصابه ويستوعب انه بالبيت والعمل انتهى لمجرد دخوله هنا ...

معلش كتبت قصة حياتي

لا بس خاطري تعرفون ان الزوج لما يدخل ما يكون عنده مزاج حتى لو كان عمله بشكل بسيط مهما يكون لازم نقدر تعبه وقومته وروحته لعمله بكل يوم فالمفروض اننا نهيأ له الجو المناسب ببيته ...

اول شي البيت نظيف مرتب ريحته حلوه ومبخر

شي ثاني وجبته جاهزه

شي الثالث انك تكونين مو بأحلى حله ما ابي ابالغ على الاقل كوني لابسه نظيف ومرتب حطي بلاشر وقلوس لمي شعرك ونزلي خصل خليك نعومه قدامه وتعطري وتبخري وقت ما تبخرين البيت وانتهى الموضوع

يمكن وحده من الي تقرأ كلامي تقول الا زوجي ما يستاهل دائما يعاملني كذا وله كذا او يضربني وبخيل علي ووو

خليك انتي احسن يا اختي وكل واحد يشوف مسئولياته

ان كان هو كذا بالمعامله الطيبه و تدبير امورك اول بأول راح يحس على دمه

انك انسانه سنعه ومتربيه

واحنا قلنا من البدايه
احتساب الأجر من رب العالمين بكل شي نسويه

وقت الحساب انتي كنتي تسوين الي عليك وما كنتي مقصره

والي له حق ما يضيع عند ربه ..

ونعم بالله ...

لعيون اطفالك وعيون اهلك الي ربوك واصلي بصبر واعلمي ان الدنيا فيها الحلو وفيها المر

وان الانسان ممكن يتغير بقدرة رب العالمين بالدعاء ربي يسخر لكم ازواجكم اجمعين ويصلح ما بين كل زوجين بماهو طيب ويجمعهم على طاعته ان شاء الله ..

اقرقر كثير صح ..

...........

غرفة الاطفال ..

اقصد مخزن الالعاب ...

هاتي علبه كبيره كبيره على كثر ما عندك من العاب

حطي فيه كل العابه كلبوهم بدون ما تقولين هذا يبيه وهذا ما يبيه

وحطي له عدد ثلاث لعبات وبس

هذي الطريقه للي عيالها ما يعرفون الترتيب وعنيدين انهم يلمون العابهم بعد ما ينتهون من اللعب

طيب حطي العلبه بمكان بعيد عنهم ممكن فوق الدولاب مثلا

انا كان عندي علب من الخشب الثقيل بأحجام مختلفه خذيت العلبه الكبيره

وحطيت فيها الالعاب والعلبه الي اصغر منها حطيت فيها شراشف وهكذا

حطيت العلبه الصغيره على الكبيره عشان امنعهم انهم يفتحونه

طبعا بتصير عندك مناحه يومها معلش استحملي

ولا تقولين ليه انتي سويتي كذا

لأن صدقيني الطفل يدري ان هو السبب ببعثرته وعناده

انتي لجأتي للطريقه هذي حتى طفل السنتين يدري ان السبب عدم تنظيمه

طيب صدقيني بتلاحظين انه متعلق بألعابه الثلاث لمده معينه لأن كل شي

يزيد عند حده يسبب ازمه لطفلك يبي زياده لمجرد التعود انك تقدمين له الزياده بالالعاب

لكن نقصان الشي يخلي الطفل يحس بقدر الالعاب

انا اتكلم نفسيا وهذا شي بتلاحظينه

طيب بعد تقريبا اسبوع افتحي العلبه وخليه معاك

وخلي يرجع الثلاثه للعلبه وبدلهم يختار ثلاثه من محتويات العلبه

هاااا خليك جاده معه ولا تتهاونين ابدا

ونفس العمليه بدون ميعاد شوفي تصرفاته متى ما مل من العابه

هاتي الصندوق وخليه هو الي يختارهم

وصدقيني لأن العابه بعيده عن عينه بيصير كأنه داش محل العاب ومو عارف وش يختار عشان

يحتفظ فيه لمدة اسبوع ..

وانسي يا اختي انك تشترين له العاب زياده

بدل الالعاب يا اختي تقفيه على قد عمره الالعاب ما راح تنفعه على

قدر ما يلهيه بالسنتين الاولى من حياته

لكن الطفل بيكون عطشان انه تهيأين قدراته الجسميه والفكريه

هاتي اقلام هاتي الوان خصصي له وقت انك تقعدين معاه تلونين

وهو يشخبط بالبدايه بيعرف كيف يمسك القلم لا تستعجلين الامور

خليك هادئه بتعلمينه الهدوء منك وخليك واثقه بيتعلم الثقه منك

وان وعدتيه بحاجه تأكدي من نفسك انك قد كلمتك

.........

خلصنا من الالعاب و فكرة التخزين المعتمده لمدة اسبوع

وكل اسبوع يتم تغيير واخذ رأي الطفل بإختيار لعبه من المخزون ولكن اشدد على

هالكلمه بـــــــــــــــحزم

ثلاثه يعني ثلاثه ما فهم بالكلام فهميه بأصابعك عشان يفهم وش يعني ثلاثه

...............

فتحي الدولاب

هاتوا كيس اسود حق الزباله كرمكم الله لأن ادري ان فيه اشياء واشياء بغرفة الاطفال تحتاج

إنك تستغنين عنه ..

شوفي الملابس اي شي صغر على عيالك خليه بكيس عشان تتبرعين فيه واجرك على الله

لا تقولين للطفل الي بجيبه بعد سنه مدري سنتين

صلي على النبي لو كانت هالطريقه صحيحه كان السوق خلااااا من الناس من زمان

طفل جديد ملابس جديده هذي معروفه

اما الاجهزه الخاصه بالطفل اقصد مثلا المشايه القعاده ممكن تخزنينهم لكن ملابس

ليه ؟؟؟

كل اشوي الموضه تختلف اشتبين فيه عطيه لأحد يحتاجه الحين وما عنده يلبس عياله وارحمي نفسك عشان الله يرحمك ويحفظك ويوسع رزقك انتي وزوجك ..


خلونا نقسم الادراج

اول درج الي يكون موقعه فوق اعلى شي بالدولاب

خصصيه لملابس الشتاء لكن تذكري ان هل القطعه هذي بتكون مناسبه له بالسنه الجايه بموسم البرد

نصيحه وقت ما تشترين ملابس الشتاء اخذيه اكبر بشوي من قياسه لأن الشتاء عامه في الخليج كلها شهرين بالكثير وبعدها توجهين القطع الى التخزين خليه يستفيد منهم بالسنه القادمه مثل الجاكيتات وغيره

كيف نخزنهم هاتي المكنسه وهاتي كيس التخزين حطي الملابس اشفطي سكري عليه

وانتهى الموضوع حطيه بالرف الاول من الاعلى عشان هذا الرف مهو عملي بالدرجه الاولى

ولما يجي وقته غيري الاماكن هاتي ملابس الشتاء تحت ورفعي ملابس الصيف وهكذا

في حبيبات لحفظ الملابس نفس الحبيبات الي تلاقونها بعلب الجزم الله يكرمكم

لا تقطينه لما تشترين حذاء جديد خلي هالكيس الي فيه الحبيبات بالكيس لتخزين ملابس اطفالك او ملابسك

بس الله يعافيك لا يوصل له عيالك وياكلونه وان كانوا كبار ويفهمون فهميهم هذا لأيش وليه بتحطينه وان يسبب كذا وكذا ...

طيب

الرف الثاني خصصيه لملابس البيت

يعني ان كان ولد دائما يلبس بيجامات او ملابس العصر بالبيت عباره عن شورت مطقم بالتي شيرت حقه

اقول لك كيف ترتبينه صفطي التي شيرت وبعدها دخلي فيه الشورت بوسطه عشان يكون رفه مرتب وكل طقم مع بعض

بالنسبه للرف الثالث خليه لملابس الطلعه نفس الشي طقمي وجهزي

خذي منه طقمين اكويهم وعلقي مكان التعليق وكل ما تستخدمين هالطقمين

جهزي طقمين غيرهم كويهم وعلقي هذا عشان وقت ما تبون تطلعون يكون ملابس عيالك للطلعه

جاهزين وما يحتاج منك الا انك تلبسينه او هو يلبسه

طبعا شوفوا ولاحظوا لو كانت الخادمه موجوده كان وجهتي كل الغسيل للكوي

لكن بهذي الطريقه راح تلاحظين انك تقدرين انك توفرين لأطفالك ملابس مرتبه بطوي مرتب ومطقم وجاهز للبس

وايضا ملابس جاهزه للخروج مو مره وحده الا حتى مرتين ..

طيب

الرف التحتي اخر شي

لأن ادري اكثر الدواليب فيها اربع رفوف هذا المعترف فيه

خليه للشراشف والبطانيات واسحبي الهواء عشان ما تاخذ منك حيز ما شي الحال

.............

راجعه ان شاء الله اكمل بالنسبه لملابس الداخليه لاطفالك وايضا تحت السرير وفوق السرير وهكذا

خصصي اوقات معينه تمرين كأنك مشرفة نظافه

يعني بعد ما نظفتي كل شي

بعدها بساعتين ثلاث خذي لفه وشوفي اشصار على الترتيب

اما النظافه افضل يكون عندك مكنسه من النوع الصغير المخصص للشحن

عملي جدا لو شفتي شي من بقايا طعام مثل فتات البسكويت تشفطيه بالمكنسه الصغيره

عشان ما تملين من مد الواير للمكنسه الكبيره

بعد الغدا تذكري انك تمرين على الغرف مره ثانيه

غرفة النوم انتي قافلته او مسكرته خلاص يعني قل مسؤليتك

باقي الصاله وغرفة الاطفال مري عليها

شوفي كل اشوي في شي صار ويحتاج انك الآن تشيلينه من على الارض

حافظي على وقتك دام تعبتي فيه خلاص باشري انك تحافظين عليه

كل هذا لليوم الي بعده عشان ما تتعبين من تكوم الاشياء و الكركبه

اطفالك خليهم جنودك لا تنسين علميهم المساعده

خصتا بغرفهم

وصار عندك ثلاث لعب ما راح تتعبين ان شاء الله بترتيبهم

خواتي الحبيبات بالنسبه لغرفة الاطفال ما افضل انك تبخرينها

في منتج عجيب من ديتول لإزالة روائح الغرف معطره بشكل بسيط وصحي

ونفس الوقت معقم للجو علبته نفس مرش الخاص المعطره للجو باللون الاخضر

هذي خليها لتعطير غرفة الاطفال احسن من الدخون

وحتى الصاله لما الاطفال جالسين لا تدخنين البيت بالعود او الدخون

لان الدخان مهما يكون مضر بالصحه مثل دخان السجائر



أمممم ان شاء الله ما نسيت شي ..

عموما اي سؤال انا حاضره قبل ما ابتدي بالمطبخ ان شاء الله

اقول ناموا عدل وريحي لأن بكره راح تشتغلين بالمطبخ وما تطلعين الا وهو منور ..

ماشي حبيباتي

تصبحون على خير ..
المطبخ حبيباتي

مركز وقوة البيت

تقضي فيه ربة البيت جزء كبير من وقتها

لكن بنقدر اننا نوفر وقت لو عملنا الآتي ...

ما عندك خدامه ومطبخك يجزي لغسالة الصحون

معلش روحي اشتري وما راح تندمين

ما اقدر اقول لكم اي غساله هي مناسبه لكم

لأن كل الغسالات تأدي اللازم ولكن ما احب ماركة ال جي

أكره هالماركه لأنها مو عمليه ولا تستحمل السنين القادمه

لازم يا ما تنظف عدل او انها بطيئه التنظيف سواء للملابس او غيرها

وحتى الثلاجات على حسب ما شفت الي اختاروهم لازم بعد سنتين او اكثر

يطلع فيه عله ...

.............

ما بنقلب الموضوع عن الاجهزه طيب ..

...........

الي بنحتاجه اليوم

1-خلطتي من تجاربي رقم واحد

الي ما تعرفه يلا تروح تدور على الموضوع وتشوف عن اي خلطه نتكلم

خلصة الكلوركس بالبخاخ ..

2- نحتاج لماء بقدر بعدين اقول لكم وش نسوي فيه

3- نحتاج لأي منتج انتي تستخدمينه لإزالة الدهون

مثل بام او داك او اي شي انتي تحبينه بس خاص للدهون

4- فوط وفوط وفوط من المربعات الي تستخدم لتنظيف المطبخ

وبس سلامتكم ما يحتاج اذكركم بالاكياس السود

................

أول شي تأكدي ان ما عندك شي بالحوض ما غسلتيه وان غسلتي مواعين الغداء وما بقى شي

خلاص ابتدي خطوه خطوه معي

لا تنسين ان هالعمل راح يكون تشطيب يعني من الجذور

عشان تكونين خلاص جاهزه لأعمالك اليوميه اوكي حبيباتي

الي نبي نسويه اننا نقسم المطبخ

نحط دولاب خاص بالشغلات والاواني المنزليه الي نستخدمها بشكل يومي

مثلا هالدولاب يحتوي على

1-مواعين بالاحجام الي تحتاجينها لتقديم الرز

لكن حطي ببالك ان هالمواعين تكون على حسب عدد افراد اسرتك

مثلا الي تقدم الرز بصحن كبير للجميع

خلاص خصصي صحنين من نفس الحجم فقط

اما الي تقدم الارز كل شخص على عدده خلاص

خصصي لكل فرد صحن

2- اواني تقديم الشوربات او الاشياء السائله مثل الصالونه او المرق نفس ما نقول له

ان كنتي تقدمينه بالشكل الي كتبته بالاعلى مره وحده خلاص خصصي اثنين

وان كنتي تقدمينه بشكل او بطريقه كل واحد يكون قدامه صحن خاص فيه خصصي لكل فرد منكم من نفس النوعيه على قدر العدد ..

3-صحون تقديم السلطه من النوع الصغير على حسب عدد الاشخاص بالبيت حطيهم فوق بعض

4- صحون خاصه لتقديم مأكولات خفيفه مثل صحون الحجم المتوسط والصغير كل شخص له صحن مو شرط ان يكون هذا الصحن للشخص نفسه انا اقصد العدد فقط عشان تشيلين الزائد ولا تحوسين نفسك

طقم واحد يكفي وكفيل انه يجزي العائله بأكمله لمدة شهرين وبعدين تقدرين تشيلينه وتغيرين الطقم بطقم جديد من الي عندك وتخزنين الي استخدمتوه ... وهكذا ولكن ممنوع منعا باتا انك تخزنين اكثر من طقم بدولاب واحد ..

............



يلا اول شي هاتي كرسي صغير من النوع النزيل مره

واقعدي قدام الدولاب

ما نبي نطلع كل الاغراض مره وحده المواعين وغيره

لا نبي كل شي نسويه بتنظيم وسهوله وبلا كركبه طيب

نفتح الدولاب نطلع محتوياته

نبخ من البخاخ الي تكلمت عنه بسميه بخاخ رقم واحد

وبعدين نمسح ونعيد له الاغراض

لكن هاااااا خليك معي

جرد ثم جرد اي شي ما تبينه خلاص تقطينه او تتبرعين فيه

وكل دولاب الي معترف فيه يحتوي على رفين

هذا الرف الاول كتبنا محتوياته والي هو مخصص لليومي خليه قريب من الفرن

عشان يسهل عليك تقديم الاكل بشكل ميسر وسهل ..

الرف الي تحته خليه خاص بالصواني اليوميه الي تحتاجونه

ياربي لو كان عدد الافراد عشره ما شفت الي شفته عند البعض

يعني ما يبي له تجميع الاواني بهذا الشكل

الصواني خليه على الاقل ثلاث احجام مختلفه لأنه مو للضيوف هذا بس لأفراد العائله لا تحوسين عمرك فيهم

تبرعي بإلي ما تبينه والزين خليه للضيوف وخليه على جنب لما نوصل للدولاب الخاص بالضيوف عشان تحطينه فيه وترتبينه ..

مثل ما قلت لكم الصواني عدد ثلاثه يكفي بأحجام مختلفه ..

هذا بتحطينه وبترتبينه بالرف التحتي صح

خلاص حطي جنبه بعد دلتين الخاصين بالبيت دله للقهوه ودله للشاي

وحطي جنبه بعد عدد اثنين من الجيك الخاص الي تسوين فيه الشربت او العصاير

وبالزاويه حطي اواني حفظ بواقي الطعام الي اشكالها واحجامها مختلفه من البلاستيك

الصغير داخل المتوسط والمتوسط داخل الكبير واغطيتها فوقها وبلا كركبه

ليه قاعده اقلل لك اوانيك المستخدمه بالشكل اليومي

عشان تغصبين روحك اول ما تشوفين شي بالحوض تغسلينه وما تنتظرين لمته

لأن ما عندك بديل بالدولاب

ونفس الوقت ان الدولاب الاستخدام اليومي ما بيكون مشحون فيسهل عليك تنظيفه

بخه بختين وانتي ماسحه الدولاب ومحتويات البخاخ قادر على تعقيم الرف وازلة اصعب البقع

...............

خلصتي يلا لا تسوين شي

روحي للدولاب البعيد عن الفرن هذا مخصص للضيوف صح

اول شي ما نبي كركبه

وين بخاخك وين فوطتك

هاتي الكرسي قربيه وقعدي وريحي عمرك

ما في شي يكسر الظهر بس ترتيب وبخ ومسح

يلا الحين نفكر اشلون نوفر اطقم لضيوفنا خصتا للضيوف الي يجونا

غفله نبي نكون دائما على استعداد تام لهم

واحد طقم فناجيل القهوه خصصي عدل طقمين

يعني كل طقم فيه مثلا 6 او 12 خلاص خليه

ومعه طقم ثاني للتغير يمكن هالضيف جانا الاسبوع الي بعده تكونين انتي

عندك طقم ثاني تقدمين فيه القهوه وما يقتصر تقديمك على طقم واحد

خووو هالناس ما وراهم الا الفشار ( ما اقصد البوب كورن )

لا بس هذاك اليوم الله يهديها وحده ضحكتني تقول يا ربي هالضيفه جايتني

اكثر من مره وانا عندي خمس طقوم وكل الطقوم شافتهم اليوم بروح اشتري طقم جديد

يا بنت الحلال الناس مهي لاقيه تاكل اقول ...

الله يهدي الجميع امسكوا اياديكم طقمين حلوين يسوي اللازم والضيوف يبي لهم

وجه سمح لإستقبالهم وكلام طيب واخلاق زينه وكرم وانتهى الموضوع

طيب ..

نفس الشي لأطقم الشاي طقمين كفايه نحطهم بشكل مرتب

طقمين الفناجيل فوق بعض
وطقمين للشاي فوق بعض
الحين هذا الرف الأول صح ..
جنبهم تحطين صحون صغيره لتقديم الكعك او ... الحلى
وبعد تحطين صواني التقديم ان كان عندك من الفضه او غيره
وبعدين ترزين الدلال للقهوه والشاي
وبعدين تحطين طقم الملاعق من كل الاحجام
خلي بالك انهم مطقمين يعني كل طقم ان كنتي خسرتي كرتونته

خلاص اربطيهم بلاستيك وحطيه بعلبه كارتون او علبة لحفظ الملاعق على حسب ذوقك
ونفس الشي السكاكين ..

وأخر شي خصصي نوعين من الصحون الكبيره الي تحطين او ترتبين عليه الفواكه

ملاحظه : كل وحده تعرف عدد معازيمها الي يجونها صح
فلازم تعرفين قد ايش يكفيك من الملاعق او الفناجيل وغيره

اما الي ما يجونها كثير تخصص على قد معازيمها وبدون تخزين بنفس الدولاب

لأن هالدولاب المفروض ما تتكدس عليه الاغراض وكل ما احد يجيك

على صدفه انتي جاهزه للضيافه

اما الرف الثاني خصصيه للصحون مثل منتوا عارفين الطقوم تجي

كامله يعني صحون كبار ومتوسط وصغير حتى بعضهم معهم اكواب للشاي

وهكذا

خصصي طقمين ورزيهم بالرف الثاني كاهوا جاهز لك بأي وقت

ولا تنسين انك تمسحين الدولاب قبل ما ترتبينهم ..

صكي الدولاب هذا الي تحتاجينه وبس

واجهة الدولاب لا تنظفينه بالبخاخ الآن بعدين نسويه لما نخلص

طيب نجي الدولاب برضوا القريب من الفرن

هذا مخصص للقدور والجدور و وو الي تطبخين فيهم

طيب تخصصين الآن قدر الخاص بالرز

قدر خاص بالمرق

قدر خاص بالشوربات او تسوين فيه خلطات للصوص او غيره الي يحتاج انك

تسخنينه مثل البشاميل

العدد الي تحتاجينه فقط من البايركس

المشاخيل الي تحتاجينهم لشخل الرز

اعتقد عدد اثنين كفايه

الأواني الي تستخدميه للقلي

والاواني الي تغسلين فيه الخضار والرز

الي تجيك بلاستيك بأحجام مختلفه انا احطهم فوق بعض وحده اسوي فيها سلطه وشكلها حلو

والثاني اغسل فيه الخضار او الرز ..

طيب انتي بنفسك عارفه كم تحتاجين من القدور على حسب عدد افراد اسرتك

والباقي يا تشيلين توزعينه او تخزنينه بالطريقه الي بقول لكم عليها طيب

الحين نبخ من البخاخ رقم واحد نمسح

نرتب القدور على بعض على حسب الحجم

اما الاغطيه الخاصه فيهم نرتبهم على جنب بشكل طوالي

ياريت تباشرون تشترون لكم اشياء خاصه لتنظيم او ترتيب الاغطيه عشان

توفرين الوقت والجهد انك تحصلين الغطاء الخاص بالقدر بأسرع وقت

وانا كتبت بتجاربي ان سلة المواعين الي تترتب عليها الصحون مناسبه

انك تخلينها بالادراج وترتبين صحونك عليها بالشكل الافقي ما راح تاخذ حيز بالدولاب

ونفس الوقت كل شي بمتناول يدينك بدون كركبه

طيب خلصتي من رفوف الدولاب الخاص بالقدور وغيره

يمكن تحتاجين للرفين او رف واحد ان كنتي من النوع الي تحتاجين

للرف الواحد خصصي الرف الثاني وخلي الاولي للاواني الي تغسلين فيه الخضار والرز

او انك تحطين القدور تحت والاغطيه فوق مرتبه وهكذا ..

.............

نكمل بعدين عشان الحق على موعدي

لكن ابي تطبيق جزاكم الله خير

مافيها مشكله لو اليوم رتبتي امورك وبكره كملتي عشان ما تتعبين

ونفس الوقت خليك هاديه ولا تتعبين عمرك بالتفكير وخليك عمليه

وفكري بس انك تنظمين امورك للأيام القادمه

لما تحبين الشي الي قاعده تسوينه راح تقدرين تخلصين بأسرع

وقت انتبهي ان بتنظيمك السليم راح توفرين الجهد والوقت بالايام القادمه

لي رجعه ان شاء الله لمزيد من الطرح ..

توكلنا على الله وهو على كل شئ قدير

........

خلصنا من الأواني المنزليه للإستعامل اليومي
والاواني المنزليه لإستعماله وقت الضيافه

وايضا القدر الخاصه بالطبخ ..

..........

قبل ما ننتقل للبهارات ..

بنسوي الآتي

اكيد الجميع حاط كل اجهزته على طاولة الرخام يعني فوق الطاوله

وهذا شي أولا يسوي زحمه وقت طبخك وكمان مو شي سهل انك توفرين وقت وجهد

بتنظيفهم المستمر من الغبار او من البقع اليوميه ..

خصتا ان اكثر الاجهزه تجي لونها ابيض صح ؟؟

طيب الحين المفروض نخصص دولاب خاص بالاجهزة

مثلا جهاز العصارة الي تسوين فيه العصاير المفروض ما تطلعينه

وتخلينه على الطاوله لو كانت الخادمه موجوده كان لا باس انها تنظف يوميا وتمسح على الاجهزه

خليه بالدولاب الخاص بالاجهزه مع جهاز العجانه الخاصه بالفطاير و شوفي ايش من الاجهزه الي ما تستخدمينها

يوميا اضيفيها بالدولاب

الاشياء الي نستخدمها بشكل يومي ممكن قطاعة البصل والطماطم
وكمان التوستر الخاص بالبريد
وغلاية الماء للشاي ووو

شوفي الدولاب المناسب ونظفيه بالطريقه نفسها بخه ومسح وبعدها

رتبي الاجهزه داخلها ..

وكل ما تحتاجين لشي ما اعتقد ان يصعب عليك انك تطلعينه من الدولاب

تستخدمينه تنظفينه وبعدها ترجعينه مكانه

ولا ان يكون عندك على الرخام لمدة اسبوع او اسبوعين بدون استخدام وياخذ حيز

ووقت بالتنظيف والمسح عليه بدون فائده ..

طيب بالنسبه لفوق الطاولات ممكن تضيفين الرول الخاص ( النشاف ) او الكلينكس
ممكن تجيبين اصيص او فازه فيها نبات بيتي يضفي جو حلو وديكور جميل لمطبخك

ممكن انك تزينين الطاولات بالمفرش الخاص الي شكله مربعات من الخوص او من النوع الجاينيز

العازل للحراره ..

وحطي الاكسسوارات الخاصه فيك بالمطبخ على شكل فواكه او خضروات او حاملات الملاعق الكبيره

على ذوقك زيني مطبخك بإلي يريحك ولكن فكري دائما ان ما تسوين زحمه عشان التنظيف اليومي يكون سهل عليك

وش فايده حلاوة المطبخ بديكوره والاكسسوارات وهو مبقع ومدهن و ومليان غبار

فخليك عمليه بالتزين ..

طيب بالنسبه للادراج السحاب

بمطبخك ..

خلي واحد للملاعق الخاصه وقت طبخك والسكاكين والملاعق للاكل وفتاحة العلب والمقص وهكذا

وخلي واحد للسفره ولأكياس السود ولأكياس السندويشات وكمان القصدير

وخلي واحد للملاعق الخاصه لتقطيع الكعك والحلى وكمان الخاصه بالقطاعات بأشكالها ..

.......

وقبل ما ترتبين خليك واعيه انك تحتاجين لكل شي عدد واحد

يعني ليه نجمع عدد ثلاث ملاعق الكبار لتقديم الرز

وتسوين زحمه على نفسك بالدروج

نفس ما خصصتي القدور على حسب اكلاتك الي تسوينها

خصصي الملاعق للاكلات الي بتشيلين فيها على صحون التقديم

وهكذا ..

بعض هذي الملاعق تجي مع حاملة الملاعق مثلا ست طقوم كل واحد لشي معين

وهكذا سهل وممكن تحطينه على طاولة المطبخ لسهولة استخدامه بكل مره ..

.............

بتكتشفين وقت تنظيمك ان عندك اشياء كثيره

تذكري انك ما تشترين اكثر دام عندك بالبيت امسكي ايدك وخلي

القرش الابيض لليوم الاسود

وبسك مواعين وملاعق ..

بالنسبه للدواليب المعلقه بالجدار

فهذي خاصه لثلاث اشياء

واحد للبهارات
اثنين للكاسات والاكواب
ثلاثه للكاسات الخاصه بالعصاير للضيوف

افضل ان يكون عندك من كل نوع طقم 12 كاس
اعتقد يكفي ان يكون عندك ثلاثه اطقم للضيوف من الكاسات

........

الأخت الغاليه الي سئلتني عن البهارات

صح كلامك يا عزيزتي خليها قريب من الفرن
لكن لا تخلينها ظاهره للعيان عشان الغبار والبقع
وكمان مهي حلوه منك تطلعين البهارات للناس ممكن يدخلون مطبخك و...

حتى لو كانت بعلب حلوه وعلى حامله خاصه

ما افضل انها تكون طالعه ابدا

الا الملح والفلفل الاسود الخاص وقت تقديم الاكل على طاولة الطعام او السفره تخلينها على الطاوله عشان يسهل على الجميع ايجاده

وممكن تحطين علب الخاصه المزينه للكوفي او الشاي او السكر على الطاوله لسهولة استخدامه

بالنسبه لدولاب البهارات

هاتي فلين او خشب بمقاس دولابك وبنص العرض يعني الطول مطابق والعرض نصه

لو يكون عندك الفلين الخاص بالفواكه افضل عشان تقدرين تقصينه براحتك

خليه داخل الدولاب و صفي عليه بهاراتك العلب الكبار

اما البهارات الي بالعلب الصغار خليهم بالصف التحتي

وبهكذا بفضل الفلين الي عندك راح يرفع لك الاغراض الموجوده وراء البهارات المعلبه الصغيره

وبكذا تقدرين تشوفين كل محتويات الدولاب من البهارات والخلطات الخاصه فيك وقت الطبخ

بدون تحريكهم والبحث عنهم ..

..............

دلاب الخاص بالكاسات

خلي على الطاوله حامله لأكواب الاطفال عشان يسهل عليهم

الوصول له وقت ما يبون استخدامه لشرب الماء او العصير

اما الدولاب المعلق بالحائط خصصيه لكاسات الماء والعصاير فقط لافراد الاسره على حسب العدد

ونفس الشي الاكواب ..

وهكذا برضوا تسوين لدولاب الكاسات للضيوف

ولا تنسين تنظيف الدولاب قبل صف الكاسات فيه ..

ممكن تعملين نفس الطريقه الي قلت لكم عليها بالنسبه للفلين لدولاب الكاسات

ان كنتي تتعبين بالبحث عن الكاسات ..

..........

الحين نجي للدولاب الي تحت المجلى

هالدولاب لا تحطين فيه شي الا المنظفات او الصابون فقط لا غير

وقطع الاسفنج وكمان ممكن تشترين السفر او اكياس القمامه وتخزنينهم تحت المجلى

وما افضل انك تخزنين اكل تحت هالدولاب بالذات اول شي لانك منتي متأكده هل ممكن

يوم من الايام يصير عندك سيلان من الانبوب الخاص بالمجلى او لا

وثانيا يكثر فيه البكتيريا بهذا الجزء بالذات وممكن يطلع لك حشره او بق

فأنتي مو متأكده من هالشي فخلي هالدولاب خاص بتخزين الصابون والاكياس فقط

بالنسبه لأكياس السوبرماركت او المقاضي

انا شريت حافظة النشاف من البلاستك بدل ما احط فيه النشاف يعني علبة مناديل

احط فيه الاكياس ارصهم فوق بعض ووقت ما احتاج لواحد اطلعه كأني اطلع نشاف من العلبه

سهله وعمليه ومرتبه بنفس الوقت ..

........
ساء الخ

طيب نكمل تنظيف المطبخ ..

بعد ما رتبنا امورنا كلها نبي ننظف كل شي من فوق الى تحت مو بالعكس ..

طيب حبيباتي ..

توكلنا على الله

هاتي القدر الي فيه الماء

وخليه على النار يغلي وسكري المراوح

وسكري الابواب والنوافذ

وطلعي من المطبخ

لكن تأكدي ان القدر فيه ماء كفايه ان يغلي ويتكون البخار على جدران المطبخ

جهزي السلم او الكرسي او الطاوله عشان تركبين عليه

وتنظفين الجدران وجهزي الفوط وبخاخ بام مزيل الدهون وبخاخ رقم واحد

يلا اطلعي من المطبخ وقفلي الباب وراك عشان عيالك ما يفتحون الباب من بعدك

روحي اشربي عصير وارتاحي اشوي

واخذي نسبه من السكر عشان تزيد نشاطك

للمهمه الجايه ...

بعد عشر دقايق او ربع ساعه

افتحي الباب ودخلي وسكريه وراك

طفي على النار ويلا ابتدي مهمتك

قلنا من فوق الى تحت

بخي على الجدران من بخاخ رقم واحد وامسحي بالفوطه على طول

راح تلاحظين ان ما راح تحتاجين للدعك

اما اماكن القريبه من الفرن واعدادك للطعام فيه بقع من الزيت الجاف على الجدران

بخي من بام مزيل الدهون وامسحي بالفوط

طبعا وانتي فوق لا تنسين انك تنظفين اللمبه او الليت ( الاناره بفوطه نظيفه من غير اضافات )

عشان لو كان عليه غبار او تراكمات ينظف و ينور لك المطبخ

مسحتي كل الجدران خلاص شوفي فوق الدواليب يا ساتر في بعضهم يخزنون فوق دواليب المطبخ والله فكره شينه وتحسين المطبخ مبهدل من فوق ويأثر على منظره ونفسيتك وقت الطبخ احيانا الوحده ما تحب تطبخ بسبب شكل المطبخ ازيحي كل شي من مكانه وبدل انك تخزنين الاغراض فوق الدولاب خلصي نفسك منهم بالطريقه الصحيحه الي تعجبك لكن من غير تخزينهم بدون فائده يا انك تستعملينهم او انك تعطينهم لأحد او ان كان عندك مخزن فهو مكانه الطبيعي هناك بكارتون نظيف ومقفل بالشريط اللاصق مع كتابة محتويات العلبه

نظفي اعلى الدواليب ببام افضل من بخاخ رقم واحد لأن اكثر التراكمات تصير فوق الدواليب من قلي الزيت وغيره

طيب خلصتي يلا هاتي القصدير وافرشي اعلى الدولاب عشان النور ينعكس بكل مكان بمطبخك ولا تتعبين بالايام القادمه من تنظيف اعلى الدواليب وكل الي عليك انك تشيلينه وتغيرينه ان شاء الله بالشهر او الشهرين مره واحده على حسب استخدامك المطبخ خلصتي يا حلوه

يلا روحي شيلي مروحة الشفط نزليها وحطيها بالحوض وبخي عليها من بام

بس لا تمسحين خليها اشوي الين آخر شي تنتهين من المطبخ وبعدين تجينها الا وهي

خلاص جاهزه للتنظيف ومفعول بام عمل عمايله

هاتي السلم بالوسط وهالله هالله بالمروحه

بخي من بام لو كان عليه تراكمات نفس الزيت وبعدها بخي بالرقم واحد وبس امسحي يسهل عليك التنظيف من غير دعك

خلصنا انزلي هاتي البخاخ رقم واحد مع فوطه نظيفه بخي ابواب الدواليب كلها وامسحي بسرعه بسرعه وفكي عمرك ..

انتهينا ..

طيب الآن نجي للمهمه الثانيه ..

حركي الفرن نظفي تحته بخي من بام بالزوايا الي فيها التراكمات الدهنيه وامسحي بفوطه

رجعي الفرن .. انا ما قلت لك شيليه انا قلت لك دفيه لاحظي عشان ما يصير عليك ضغط وان كان الفرن ما يتحرك اطلبي مساعدة زوجك عشان يحرك الفرن ..

نجي للثلاجه نفس العمليه حركيها نظفي تحتها ورجعيها ..

وهكذا مع كل جهاز تبريد او غيره عندك بالمطبخ

خلصنا ما بقى شي بالنسبه للفرن الكل يعرف كيف ينظفه ويقصدره بالقصدير

والثلاجه نفس الشي ياريت تنظفونه فقط بماء مخلوط ببكربونات الصوديوم فقط

ما يصلح تنظفينه مع اي مواد كيماويه من الداخل عشان ما يأثر على حفظ المأكولات الي فيها

اما الابواب الخارجيه استخدمي بخاخ رقم واحد عشان يلمع وينظف ويعقم

طيب نجي لمروحة الشفط يلا ادعكيها خفيف وراح تلاحظين ان الترسبات تختفي بسرعه

لأنك خليتيها فتره وفوقها بام بدون ما تغسلينه

نشفيه بفوطه نظيفه ويلا ركبيها وخليك حلوه وكملي شغلك عشان ما يبقى شي ما سويتيه

الحين كل الي عليك رخام الطاولات ورخام الارضيه

هاتي بخاخ واحد لرخام الطاولات بخي وامسحي ورجعي كل شي مكانه

اما الارضيه حبيباتي اول شي اكنسي بالمكنسه

بعدها هاتي داك ممزوج بالماء وحطيه بدلو الخاص بالتنظيف

انا عندي هذي المساحه اخذوا التقليد نفس الاصلي بالضبط لا تخسرون عليه واتم هالمساحه عندك لمدة شهور ويمكن اكثر من ثمان شهور ما يحتاج انك تغيرينها سعرها ما يتعدى 25 ريال او 20 ريال


من اسهل الممسحات الي مرت علي بالتنظيف واكثرها تنظيفا

http://tbn0.google.com/images?q=tbn:...image_id%3D254


أما هذي فأكرها كره جامد ما اطيق استخدامها

http://tbn0.google.com/images?q=tbn:...ichlen_mop.jpg

يلا ابدي اخذي الممسحه الي ما عندها نفس الشي

تروح تفتح دولاب زوجها اقرب فنيله ما يبيها او ضيقه عليه

اقصد الفنايل البيض الي يلبسونها تحت الثوب

طيب اخذيه واخرميه على شكل دائره

حطيه بالممسحه العاديه الي تمسحين الماء فيه مو الي صورهم فوق

اقصد الخاص بالحمام دخلي الخرم الي سويناه من اعلى الممسحه

الين ما تنزلين الفنيله تحت وبعدين اكفسيه على وراس ويلا صبي ماء وامسحي فيه

بس باشري انك تدورين على الممسحه الصوره الاوليه لان صدقوني انها مريحه بشكل خيالي

خلو وحده خاصه للصاله والغرف للسيراميك

ووحده للمطبخ والبلكونه او الحوش وهكذا ..

مسحتي خلصتي يلا مع هالممسحه ما يحتاج حتى تنشيفها

لكن تأكدي انك تعصرينها من المقبض الخاص كل مره عشان يشفط لك عدل مدل السيراميك

خلصنا يلا اطلعي وشوفي مطبخك كيف صار منور وريحته حلوه ..

وكل الفضل لله ثم لك ..

......

راجعه اقول لك بعض الاشياء الي تسهل عليك

عملك اليومي بالمطبخ لتوفير الوقت ..
حبيباتي راح نتكلم عن تنظيف الحمامات كرمكم الله واحسن اليكم

توكلنا على الله وهو على كل شئ قدير

..........

المقادير اقصد الي تحتاجينه ههههه

1-مستر مصل
2-كلوركس
3-صابون غسيل الملابس بمقدار ملعقتين او ثلاث بالكثير
4-اي منتج تحبينه لشطف سيراميك الحمام بعد الانتهاء من تنظيفه
5-قفازات
6-دلو خاص بتنظيف الحمام


بام مزيل البقع للحمام ابتعدي عنه ما عجبني ما انصحكم فيه

بصراحه ولا شي قدام مستر مصل لتنظيف بقع البانيو وكمان ملمع ممتاز

فأنصحكم بمستر مصل اختي الغاليه اسيرة قلبه حطت صورته وبصراحه

على طول قلت راح اجربه وفعلا ما استغنيت عنه ابدا سعره ما يتعدى العشر ريال

يجي ببخاخ لونه برتقالي وعليه رجل يعرض عضلاته

وكمان نحتاج لبيوض كلوركس

وانصحكم بصابون الخاص بالملابس بدل الصابون الخاص بالحمامات

بصراحه شي لا يعلى عليه من نظافه ولمعان وريحه طيبه

ما احب استخدم اي منتج اخر للحمامات الا الصابون الغسيل

طيب الكلوركس راح نحطه بالمرافق الخاصه طبعا مهما تهتمين فيه بشكل يومي

المرافق الخاصه يتغير لونه اقصد اسفل المقاعد الي تحتوي على ماء

طيب قبل ما نبتدي التنظيف صبي نص كوب من المبيض بالمقعده وسكري

غطاء المقعده وانتبهي ان محد يستخدم الحمام بهذا الوقت

http://tbn0.google.com/images?q=tbn:...ges/toilet.bmp

بعد نص ساعه نزلي السيفون وخلي الماء يتغير


http://tbn0.google.com/images?q=tbn:...d/yun_4271.jpg

الآن المطلوب منك رشي مستر مصل على البانيو وخليه واشغلي نفسك

بالحوض الخاص لغسل الايدي

اخذي دلو وحطي فيه ماء والصابون فقط


http://tbn0.google.com/images?q=tbn:...egumbinkie.jpg

البسي قفازاتك وكوني جاهزه يلا ما يبي له شي

افركي الحوض ولأفضل نتيجه هاتي السلك المعدني الليفه

بس مو الي يتغير لونه ويصدي لا انا اقصد النوع الي ما يصدي الي تجي على شكل دوائر

هذي انا استخدمها سنين وبنين وما عمري استخدمة غيرها تعطيني نظافه ولمعان بشكل مو طبيعي

ولا يتعب بالفرك يعني سريعه بإزالة الاوساخ والترسبات وغيرها

طيب افركي الحوض وقاعدته وخلصي كل شي وبعدها اشفطيه بالماء

ويلا ارجعي للبانيو بنفس السلك المعدني ما يحتاج اضافة شي من الدلو يكفي مستر مصل وراح تلاحظين ان ما يحتاج لفرك زياده بسبب مستر مصل سواااا اللازم

أما الليفه لا تخافين ما راح يخدش لك البانيو ابدا جدا لطيف على المرافق الخاصه بالحمامات

طيب خلصتي اشفطيه بالماء

الحين نرجع للمقعده اخذي الليفه من مقدار المتواجد من الصابون بالدلو

نظفي المقعده وراح تلاحظين ان اسفل المقعده اختفى الترسبات الي كان موجوده

بفعل المبيض بس خلي بالك ان ما تحتاجين اعادة هالتجربه الا لما تحتاجينها

يعني كل ما تشوفين ان اللون بدى يتغير حطي كلوركس وخلاص راح يزيل لك اللون الغامق

بالقاع وايضا يقتل البكتيريا

واخذي العصا الخاص بتنظيف احواض المقاعد و نظفي على السريع انتهيتي

اشفطيه ونزلي السيفون للمره الثانيه

الحين الباقي عليك انك تنظفين سلة المهملات

افضل ان السله تكون من النوع البلاستك عشان يسهل غسله بكل مره

اغسلي السله من نفس الصابون الي بالدلو

وبعدها خليه على جنب عشان ينشب خليه بالبانيو مثلا

هاتي بخاخ رقم واحد معلش نسيت اضيفه فوق

رشي على الرفوف الخاصه بالشامبوهات والاكسسوارات وامسحي بفوطه نظيفه

ورتبي اغراضك

ما انصحكم بالرفوف الخشب بالحمام خصتا مع رش الماء ممكن يسبب فطريات او يطلع

منه الحشرات ممكن البلاستك او الزجاج افضل نوع للحمام

بعد ما تنتهين من الرفوف ..

ما باقي عليك الا السيراميك

كل ما بقى من الدلو صبيه على السيراميك

ما يحتاج تنزلين وتدعكين الارض

هاتي البروش او المخمه

http://tbn0.google.com/images?q=tbn:...94694319,3.jpg

ادعكي به السيراميك

وكل الزوايا من والى وان كان فيك حيل وشده على الشغل يومها

خلاص املي دلو كبير بالصابون والماء واخذي المخمه الي حطيت لك صورته

وافركي فيه الجدار وبعدها اشفطيه مع السيراميك مره واحده بالماء الين ما يزول كل الصابون

بعدها ..

هاتي المساحه الي مدحته لكم وحطيت صورته سابقا

وجهزيها للإستخدام النهائي

هاتي معطر السيراميك انا احب داك بعطره الاصلي من غير زهور وغيره

اخلطه مع ماء واصبه على السيراميك

وبعدها امسح السيراميك بالممسحه

الين ما اشوف اللمعه والنظافه وكمان جفاف السيراميك يبعث الراحه لإستخدامه بكل مره

آخر خطوه اسويها

اني اجيب فوطه نظيفه

ابخ عليها من مستر مصل والمع فيها الصنابير المياه

http://tbn0.google.com/images?q=tbn:...s/16101-00.jpg

سواء للحوض او البانيو ..

وبكذا انتهينا من الحمام ونظافته

ان كان الحمام من النوع الي ما يستخدم ولا يحتاج لغسيله بشكل يومي

عليك فقط تنظيف المرافق على الاقل بشكل يومي ببخاخ رقم واحد

يعني رشي على الحوض ورشي على المرافق بدون غسل السيراميك

وبعدها اشفطيه بالماء وبكذا راح يتم لك الحمام نظيف ومعقم ..

إن شاء الله ما نسيت شي ..

واي استفسار انا حاضره لكم ..

يب هذا الموضوع كان تشطيب للبيت تقدرين تسوينه

كل شهر مره واحده او كل شهرين على حسب امكانياتك الجسديه

لكن التنظيف اليومي

واحد الصاله تكلمنا عنه ما ياخذ من وقتك نص ساعه

صدقوني لأن السر عرفتيه وحفظتيه بالتأكيد

النظام يبعث الراحه والترتيب اول بأول يزيد من نشاطك

كل الي باقي عليك بالنص الساعه اليوميه المخصصه للصاله

انك تنظفين الغبار بشكل يومي ولو بالريشه معلش يوم كذا ويوم بمنظف الخاص بالتلميع

وبعدها تكنسين او تمسحين السيراميك

نص ساعه للصاله

اما المطبخ الله يسلمكم

وانتي قاعده تطبخين اشغلي نفسك بتنظيف الحوض

واشغلي نفسك بتنظيم الادراج ومسح السيراميك او رخام الطاولات

يعني كل وحده تحتاج مثلا ساعه الين ما تخلص طبخ فأشغلي نفسك

مره بالثلاجه مره بالسيراميك وهكذا وصدقيني هالساعه تقدرين بدل وقفتك على الطبخه

يعني مثال اشوف الحريم الين ما تحمر البصل او تقلي الدجاجه واقفه جامده عند الفرن

حركي نفسك واستغلي الوقت يا اختي روحي تعالي على الطبخه و تذكري ان الوقت الي تقضينها بالطبخ

ممكن تستغلينه بأكثر من شغله الحمدلله كل وحده تقدر انها تركز على شيئين وثلاث بعد

ليه لأن احنا الحريم الله خلقنا كذا واعيات ومسؤلات ان شاء الله عن واجباتنا

لو ما كنا كذا كان ما انتبهنا على عيالنا وبنفس الوقت واحنا مشغولات بأعمال المنزل

يعني خليك عمليه وشوفي ايش يحتاج مطبخك اليوم وسويه

ان شاء الله كل يوم دولاب تنظفينه لو يحتاج او مبقع

ويوم تنظفين الشباك ويوم تنظفين الثلاجه ويوم تغسلين سلة الاواني

ويوم تنظفين سلة المهملات بالصابون وتنشفينه

والله اني اطبخ وانا اخلص كل شي بالمطبخ من والى والحمدلله ما اطلع الا وهو ينور من النظافه

وما ياخذ لي ساعه الا وانا مخلصه طبخ ومخلصه التنظيف

وتذكري تغسلين وقت الطبخ اي شي تستخدمينه اول بأول يعني تذكري ان الاطباق الي عندك

مثل ما جهزناهم بالدواليب على قدر حاجتك وان ما غسلتيهم راح تحتاجين لأكثر وهذا راح يدفعك للإهتمام بغسيلهم سريعا ..

حاولي انك تشغلين الغساله وفطل ما تخلصين طبخك يكون دفعة الملابس جاهزه للنشر وهكذا ...

وهذي ساعه من وقتك للمطبخ

أما غرفة النوم ما بياخذ منك الا ربع ساعه

لأنك اكيد مهتمه بمنظر غرفتك بما اني قلت لك انها للراحه ومقفله عن اطفالك

فكلي الي عليك تهويتها بشكل يومي

ومسح الغبار يوم بالريشه ويوم بالمنظف

تعديل السرير وترتيب التسريحه اول بأول

والادراج نفس ما علمتكم كل ما تحتاجين لشي خليك

عمليه ترجعينه مكانه وخلي مخك كمبيوتر يعني كل شي له مكانه الخاص

عشان وقت ما تحتاجين لشي تتذكرين وين هالشي

يعني مثلا عندك مقص بغرفة النوم

يوم تحطينه بهذا الدرج واليوم الثاني تحطينه بالدرج الي تحته

طيب يا اختي جاك يوم تحتاجينه بقووووه وما عندك

وقت ما راح تقدرين تركزين راح تفتحين الادراج سريعا وتلخبطين الدنيا

وتكذبين على نفسك تقولين بعد اشوي برتب

يا بنت الحلال حطيه بمكان خاص لا تغيرينه

اولا لا تضيعين وقتك وقت ما تحتااجينه

ثانيا لا تبهدلين الاغراض وتحوسين الدنيا على مقص ..

هذا مجرد مثال ...

عشان كذا ترتيبك اول بأول و وضع كل شي بمكان مخصص

راح يوفر لك الراحه ونفس الوقت غرفتك دائما منظمه

ربع ساعه لا غير

اما الحمام ممكن ياخذ منك ثلث ساعه لو اكبر حمام هههه

اما الحمام الصغير كلها عشر دقايق على السريع

خصتا الحمام الصغير الي ما فيه بانيو

اما حمامات المجالس ما فيها الا المرافق السريعه الخاصه

..........

ســـــــــــؤال خاص لربات المنازل

لو كنتي طبقتي هالشي اول بأول من تشطيب وجرد وتنظيم ثم التنظيف

وبالفتره الصباحيه سويتي اللازم

نص ساعه للصاله

ساعه كامله للطبخ وتنظيفه السريع بشكل يومي

ربع ساعه لغرفة النوم

ثلث ساعه للحمام خلينا نقول ساعه لو كان عندك حمامين

ونص ساعه لغرفة الاطفال مع مساعدة جنودك الصغار راح تختصرين وتعلمينهم النظام بنفس الوقت ..

أما المجلس يا بنت الحلال نظفيه بالاسبوع مره واحده من أثر الغبار

وبعدها سكري وقفليه عن اطفالك وخليه للضيوف فقط لا غير

اي غرفه ما تحتاجينها قفليه ونظفيه اسبوعيا مسح و كنس فقط

خلونا نرجع للسؤال ..

لـــــــــيه ما عندك وقت ؟؟؟

هذا السؤال كنت اسئله لنفسي بعد سفر الخادمه

وكل الاجوبه الي حصلت عليها من خبرتي كتبتها لك

بعد تنظيم ساعتي الموقته


عرفت ان المفروض اني اخلص كل شي من تنظيف بالفتره الصباحيه مثلا

اما العصر يبقى عندي مثلا كوي او طوي الملابس او سقي الزرع

اشياء بسيطه فقط لا غير واحيانا اجلس على النت محتاره كيف اقضي وقت فراغي

فأقوم اطلع لي عمل من تحت الارض ..

عرفت ان البيت كله ما يبي مني الا ثلاث ساعات فقط


وباقي الوقت لأطفالي و كل شي اول بأول يتيح لي الفرصه بشكل اطول

اني اهتم بهواياتي واهتم بتسريحة شعري وعطري وفستاني واخيرا جاهزه لزوجي ..

...........

وأخيرا انتهيت من الموضوع وان شاء الله

وفقت بالطرح ...

وحاضره لإستفساراتكم ..

والله يقويكم ويسدد خطاكم ..

اللهم آمين

تـــرانيم10/07/2008 10:19 PM