للمتزوجات ساعدوني رجاء 💔

مساء الخير ،،
بالبداية ادعو الله لي ولكن ان يتقبل منكم الصيام والقيام وسائر الأعمال وانه يفرح قلوبنا كلنا بزوال هالأزمة
بصراحة انا ما اعرف كيف ابدأ هذي اول مره اشارك منتدى بمشكلة خاصة لي تعبت من كثر التفكير ومن كثر الحزن ومن كثر مانهزت ثقتي بنفسي بسبب اللي امر فيه
انا عروس جديدة يمكن لي تسع شهور من تزوجت وببداية زواجي كان فيه كثير مشاكل بسبب سوء فهم بينا او اختلاف افكار او بسبب مواقف من الاهل صارت بوقت الملكة او ظنون خاطئه المهم انه اذا عصب يبدأ يجرح بالكلام ويستخدم عبارات قاسية جداً واهانات وبعد مااعاتبه يقول عادي مابين الزوج والزوجة حساسية مع انه بعض كلامه جارح ومهين جدا وانا ابكي واعاتب واسامح
ماراح اتكلم عن كثير تفاصيل لكن خلال هالاشهر صارت تباعد كثير بيني وبينه بدل مانقرب وصار بارد وصار كلامه اقسى وصار اهماله صريح صار الوضع مع انه وقت حجر المفروض نتقرب اكثر لكن صار تباعد من يقوم من النوم لحد ماينام وهو يلعب مع اصحابه بلاستيشن ومطنشني مليت اشحذه خلينا نسولف خلينا نقعد سوا نشوف شي اي شي كل شوي يقول ايه ايه طيب او مايرد هذي سبب مشكلتي من بداية الزواج وكل ماعاتبته زاد الوضع لدرجة انه كان يطلع من البيت بسبب هالعتاب المشكلة الفاظه الان صارت اقوى واهماله عاطفيا لي اكبر وكل شوي انتي صوتك عالي او مافيك انوثه او دلعك سامج وصرت اغير بنفسي عشان مايقول هالكلام الجارح مع انه والله هو اللي كان يعصبني ويستفزني او يمدح الممثلات بالتلفزيون جسمها او شخصيتها او دلعها حلو وانا اعصب اقول بدل ماتمدحهم امدح زوجتك المهم ان بعد موقف اليوم انكسر قلبي ماعاد اعرف شسوي عزت علي نفسي بليز دلوني انا مالي خبره ولااعرف وش اسوي انا قررت انه مهما كان بارد ومهمل اكون انا رومانسية ومعطائه عشان اعوده على هالشي واحببه فيني ونبدأ حياه حلوة بغض المظر عن البدايه الشيئه ابتسم بوجهه اسئله دايم وش يبي احاول المسه او احضنه بحنيه لكن القاه مطنش ويلعب مع اني دايم اللي ابادر بكل شي بالضحك بالسوالف بالحضن واقول بنفسي ماعليه تحملي بيتعود عليك وعلى هالجو وبيحبك ويصير يبادر اليوم عذرا على هالكلام بس مالقيت غيركم استشيره جيت اعطيه بوسه وهو كان يراسل صاحبه عشان اللعبه قام دف راسي بيده وقال وخري انا هنا انكسر قلبي وحسيت ان قدري عنده ولا شي وانه مل مني وانه مايشوفني شي كبير او شي هو يسعى له بدل مايقول انا مقصر معاها عاطفيا اقل شي احترم عاطفتها او توددها لي يقوم يدف راسي يقول وخري حتى هو حس انه اخطا من نظرته حس انه غلط انه دف راسي بس مافكر يعتذر ولا شي قال ايوه زي هاه وش بغيتي او كملي ولف على طول يكمل كتابه يعني بس تصريف لحركته والا هو ماطق خبر يبغى يكمل مع ربعه انا انجرحت وتفشلت وحشيت ان وضعي فعلا غلط وماعاد يحتمل حسيت بأني ولا شي بعينه لمتى هالاسلوب صرت احس اني قاطه نفسي لشخص مايهتم لي قمت نظفت المطبخ ورحت لغرفتي ضايقه فيني الدنيا وهو ولا همه مكمل مع ربعه نفسي احس باحساس ان زوجي حابني راغب فيني معجب هو يبادر ويبذل لي مو انا
لاتقولون ازعلي روحي لبيت اهلك لاني انا ابغى هذا الزواج والاستقرار ولا ابي ازعل واروح وهو عارف هالشي اني مره ابغى هذا الزواج
امانه خبروني وش اسوي انا تحطمت ثقتي بنفسي واحس بهم طول الوقت فوق هذا ماعاد بيني وبينه تواصل كبير ابدا لازم انا اشحذ او احن عشان القى شي حلو بينا تعبت والله انا مو موظفه ولا عندي احد من اهلي بمنطقتي ولا صديقات لاني كنت بمنطقة وصرت بعد الزواج بمنطقة ثانيه
واسفه عالإطالة 💔