للمرة الثانية اسالكم الوظيفة بتكون خيار صح

السلام عليكم ورحمة الله وبركاته
بنات تذكروني انا اللي قبل استشرتكم أتوظف او لا والاغلبية شجعوني على الوظيفة استخرت ورحت قدمت وخلصت نص الأوراق وباقي تحاليل وكذا بس فجأة ترددت وصرت مابي اروح اكمل وصدري ضايق وبقولكم الأسباب


الوظيفة أخصائية مختبر عقد بمستشفى حكومي بعيدة عن بيتي ساعة وشوي يعني من 6:45 الصباح - 7 المغرب بكون برا البيت




زوجي شغله بالخطوط السعودية يروح 7:30 الصباح ويرجع 5:30 بالكثير




راتب الوظيفة 8300 مع البدلات وراتب زوجي حول 12 الف وبيتنا ملك الحمدلله (( ادري بتقولون وش دخلنا بس علشان تعرفون وتسهل المقارنة ) )




طبعا انا برضاي قعدت بالبيت بعد التخرج لاني حبيت الوضع وبطبعي كسولة والحين تكلمت مع زوجي اني ابي أتوظف ووافق بس قالي لازم تعرفين انه وضع الصرف بيتغير وبيصير عليك الاتي




راتب الشغالة مع انه الحين يدفعه بكل سرور




نص رسوم حضانة ولدي لان الاهتمام فيه مسؤوليتي اصلا وماراح يرضى اتركه عند الشغالة ومحد يقدر يمسكه لا أمه ولا أمي




السواق الي يوديني الدوام هذا طبيعي علي


مصروفي الشخصي وهذا الي قاهرني ماعدا فلوس مقاضي العيد مرة بالسنة


مع انه الحين كل شهرين اذا نزلنا السوق اخذ لي ملابس ويدفع عادي ويختار لي بعد والكريمات والمكياج وشحن جوالي وكلشي عليه وإذا طلعت مع صديقاتي يعطيني وهو راضي الحين ضاقت عينه يعني




والسفر النص بالنص مع اننا رايحين كروز أوروبي وتركيا ولندن قبل وكل فترة نطلع الخليج ويكند وهو يدفعها من الى تذاكر فنادق مصاريف وهو مستانس ومتشقق بعد




وقالي انتي تفكرين اني اضغط عليك علشان تتركين الوظيفة لا والله أبد واللي يرحم أبوي بس حطي نفسك مكاني انا الحين اكرف وأتحمل الضغط واقول مسكينة انا شاغلها فيني وببيتي ابسط شي اوفرلها كل الي تتمناه بس دامك الحين تطلعين وتوفرين الي تبينه لنفسك خلاص




قلتله يعني انت كنت مستخسر فيني كل ذي السنين قعد يحلف ويقسم لي انه مو كذا وانه مبسوط وراضي تحسون معاه حق بالي طالبه وانا مزودتها ؟! ولا هو فعلا وسيع وجه وبيستغلني


الحين يا بنات بحسبة بسيطة لقيت انه بعد ما ادفع للسواق والشغالة والحضانة ومصروفي بتطير حول 5 الاف والباقي 3300 لازم أتصدق منها وادلع فيها أمي وأبوي غير المجاملات والمناسبات والهدايا


طيب وين الي يقولون خذي لك قطعة ارض للزمن وين الي يقولون دلعي نفسك من وين بجمع للسفر والسوق وغيره انتو وضعكم عادي كذا ما يبقى لكم شي لانفسكم يعني معقول فوق 12 ساعة كرف بس علشان اصير باب رزق للشغالة والسواق


انا سبب قعدتي بالبيت يا بنات اني ما ابي اصير مثل نماذج الموظفات الي اشوفهم تكرررررف وبالنهاية غيرها يتهنى بحلالها وإذا كانو عيالها عيالي مو أغلى من راحتي والله بالاماااانة الوضع كذا عادي


هل انا جشعة وانانية ولا زوجي هو الي عينه ضيقة اكمل إجراءات الوظيفة ولا اصرف نظر وانطق بسريري احسن




المشرفات الله يسعدكم لا تنقلونه