للمره الثانيه حامل وبدون طلق ..مكروبه ..رحمتك ياالله

السلام عليكم ورحمة الله وبركاته
كيفكم اخواتي
والله حزينه على حالتي الحمدلله على كل حال
انا ماعندي مشاكل قبل لا احمل وكل شي سليم والحمدلله
حملت بطفلي الاول بصحه وعافيه لكن وصلت للاسبوع 42 وماجاني طلق او علامات ولاده فاضطروا يعطوني طلق صناعي .. وبعد معاناه يومين من الطلوق والالام الحمدلله فتح الرحم 8 سم.. فرحت ..
لكن الجنين ارتفع للاعلى بعد ماكان راسه بالحوض .. فاضطروا بسرعه يولدوني قيصري
يعني ذقت العذابين في وقت واحد لكن احتسبت الاجر عند رب السماوات والارض
مازلت اتساءل! ليش ماجاني طلق وهل حملي الثاني والثالث و.. وو... نفس الشي؟يعني هل الرحم سميك .. والا عشان وزني زايد ؟؟
والحين انا حامل للمره الثانيه وهذا انا انتهيت من الشهر التاسع بدون طلق او علامات ولاده !
رحت موعدي السبت اللي راح وقالت لي الدكتوره انتي خلصتي التاسع تبغين نولدك اليوم والا نعطيك فرصه ليوم السبت القادم
قلت اعطوني فرصه لعل الله يرزقني بطلق وولاده طبيعيه .. قالت السبت القادم اخر موعد لك اذا ما ولدتي راح نولدك ..
فقلت اذا الله ماكتب لي طلق طبيعي راح اطلبهم طلق صناعي مع ان تجربتي الاولى ماتشجع وخليت العمليه اخر الحلول لانها راح تكون ثاني عمليه قيصريه ومارا ح اولد طبيعي بعدها (الا بمشيئة الله)
وعلى فكره انا احس من الشهر الثامن شد في الرحم وارتخاء لكن زاد ألمها هاليومين تتوقعون يشتد الطلق والرحم عندي مفتوح ولو 1سم ؟
مع العلم اني اشتغل في البيت وامشي كثييييير والعب رياضه وماعندي شغاله وكل شي اقوم به بنفسي وتخيلوا هذا كله عندي طفل شقي الله يهديه عمره 3 س انا واياه مطارد
وعلى هذا كله ماجاني طلق او افرازات
الكل مستغرب وانا مسغربه لكن الحمدلله لله في خلقه شؤون
حبيت تشوروني ايش اسوي بنفسي والله محتاره
هل اطنش الموعد لحد مايجي طلق طبيعي والا خطر على الجنين؟؟؟؟
والا اروح لهم يعطوني طلق صناعي؟؟
ومع اني اخاف من الوصفات بس مايمنع تعطوني وصفه طبيعيه تفتح الرحم وآمنه
تكفن لاتتركوني .. باقي اقل من اسبوع على الموعد لاتخلوني في حيرتي الله يفرج همكن وغمكن افرجوها على انسانه مكروبه
لا اله الا انت سبحانك اني كنت من الظالمين
استغفرالله العظيم الذي لا اله الا هو الحي القيوم واتوب اليه