بسم الله الرحمن الرحيم
السلام عليكم ورحمة الله وبركاتهـ
الخامات المطلوبهـ :
قماش موبليليا اللي هوا تبع الكنب متر ونص
اسفنج لشد البرواز عشان الارتفاع
عطر خمريه ان كان عوده او نوع من الزيوت الفواحه
غرا مسدس كبير
شريط ترتر لون( احمر*دهبي )حسب طلب اللوحه
هنا احتجت مترين من كل لون
وفراشات الجرابات
كريستال دهبي بلمعه
كريستال وردي للفراشه
شرايط تلاته الوان من كل لون تلات لفات او درج
( وردي / لحمي / عودي )
مقص
ابره وخيط عاديه
ولاعه عشان احرق طرف الشريطه عشان ماتتنسل ويسير تقدي تلفيها زي مارح اقولكم الان
الطريقهـ :
تابعوني ورح اشرح لكم على كل صورة كيف وصلت لهدي النتيجه
مع العلم اللوحة لها شهرين مدة شغل يدي لانها تحتاج مجهود جبار بس والله روعه يالله بسم الله نبدأ
رح اعرض لكم الاخراج اولـ عشان احمسكم تشوفوا الخطواتـ
وهدي الصورة عن قرب اكتر لشكل الكريستال كيف غريتو في داخل الفتحات تبع الشريطه وشرط اساسي بنات لازم تكون الفتحات صغيره مرااااا عشان يسير شكلها حلو فتحات الشريطه اقصد والكريستال هدا هو النوع العادي انا اخدت الجوهره اللي في بطنو ورميت الحديده الدهبي اللي تجي 12 حبه 8 ريال وهدي الصورة توضح لاتنسو تشوفوا الترتر والفراشات كيف وزعتها لانها صغيره ماتبان مرا ركزوا فيها في هدي الصوره هدي وردة الشرائط الدائريه ورح اعلمكم كيف عملتها تحت في الخطوات وفيه تحت الورده ورق مناديل السفره عشان تعطي الورده ارتفاع زي ماهوا واضح في الصورة
وهدي صورة الخامات اللي احتجنها شوفوها وانا سبق وذكرتها في اول الموضوع .
هنا طبعا اخدنا الشريطه وبدينا نقصها بمقاسات موحده مو مشكله لو زادت شويه بس مو مرا عشان لاتسير دبا وتختلف شوفوا شكلها قبل ماحرق الطرف فيها خيوط نادره وموتمام .
هنا حرقت الطرف خلاص يسير شكلها مرتب اكتر زي ماتشوفوا
وبعد كدا بدت عملية الف زي السجاير زي ماتشوفوا في الصورة انا ماقدرت اصور يدي هوا الموضوع بس لف عادي خفت يعطوني مخالفه واسير فله ههههههههههههههههههههههههههههه بس ركزوا بنات لو ماقدرتةا تسيطرو على الوضع خدوا عود اسنان لفو عليه وبعدين تخلصور منو وانا مافضل كدا بلاش تجي الفتحه كبيره بعد حرق الطرف رح تقدروا تلفوا براحتكم جربوا وحده وتشوفوا كيف وهدي الصوره
هنا نظمنا الخيط وبدأت عملية النظم كأنك تعملي عقد عادي تشوفي الطرف اللي فتحته صغيره تخليه من فوق واللي كبيره من تحت وتدخلي الابره وهدي الصور تشرح كيف ننظم والفكره ان شاء الله ماتصعب عليكم واي سؤال حاضره لعيونكم
لااحد يرد رح اكمل لكم الخطوات الله يسعدكم يارب
لااحد يرد الله يرضى عليكم بس افهمولي هدي الخطوة بروح المعهد الان وان شاء الله اول مارجع اكمل لكم في نفس الرد واعدل انتظروني :time:
عدناااااااااااااااااا يالله نتابع بسم الله .........
خلصنا من النظم نبدأ الان في موضوع تاني تشكيل الدوائر اللي هيا على شكل ورده زي اللي لونها عودي في اللوحه ركزوا معايا تزميها في يدك على شكل دائري وتمسكيها بيدك انا حطيتها في الارض عشان لااخالف الشروط واللي هيا في اليد تمسك وبقوه ولاتتركي فراغات زي الصورة شوفوها تلفيها زي الرول
وبعدا كدا تحطي الغرا وطبعا الغرا يكون من تحت مكان نظم الخيط فوق لا عشان تجي مفتوحه اكيد فهمتوا والصورة توضح لكم جايه الخطوات رح توضح الفكره اكتر
هنا شوفوا توزيع الغرا تمام الله يسعدكم عشان تعرفوا كيف لان الاغلاط رح تخرب شغلكم اللي يجنن شوفوا كيف تحطي الغرا بشكل دائري وتتبعي نفس الصفوف واضح كل شي صورتو عشان اوضح لكم.
خلصنا من شغل الخلف شوفوا النتيجه لما تقبيها وفايدة الغرا الكبير عشان يخليها تمسك في بعض اكتر لاتستخدموا صغير ابدا ترا غلط مرااا غلط والان شوفوا لما قلبتها كيف وهدا الهدف انو يكون الغرا والتثبيت مكان الخيط عشان تتفتح زي ماتشوفوا.
وهدي كل شي عن تشكيل الوردات الدائريه اللي تشوفوها في الصورة اما الخط المستقيم نفس الشي تقلبي وتغري وبعد كدا تعملي اي فكره في راسك ترا التشكيل كل واحد حسب زوقوا انا هدا زوقي كل وحده لها وجهة نظرها والان
خامات الشرابات قماش واسلاك معدنية وكريستال :
ندخل على موضوع الفراشه طبعا جرابات واسلاك معدنية صغيره كدا بس يعني منظر وبهدا زينتها بالكريستال
وهدا شكلها والكرستاله الكبيره اقصد منها جسم الفراشه زي ماتشوفوا في الصوره.
البرواز خامتو:
طبعا البراواز بعد ماشتريتوا جاهز الخشب لوح خشبي ارتفاع 2سم والاطار فصلتو 130 ريال والمقاسات متر طول وعرض سبعين وبعدا كدا شديت القماش عليه ولازم الاسفنج يكون مرتفع طبقات قوق بعض لغاية ماتوصلي لاارتفاع تحبيه واللي ماتعرف شكل الاسفنج تقولي وانا تحت امركم اوريكم صورتو وتحطو طبقات قد ماتبغى الارتفاع يكون زي ماتحب بصراحه الموضوع تعبني كتير صور وشرح مرااا واسع فالبرواز شديتو بالطريقه العاديه ومن الخلف شوفو كيف سار وهدي صورتوا وطبعا غطيت الخلفيه بورق زي اكياس الشورما شوفوها واضحه
هنا دخلنا على الستاير شويه عشان القيطان :
وجبت خيط قيطان وطرقت مسمار يمين ويسار وربطت الخيط زي ماهو واضح في الصورة طبعا تكرمش لان ليا شهرين اشتغل فيها من كتر الحركه ممكن تعملي اي خلفيه المهم تغطي عيب القماش لما تشدي مع العلم لشد القماش لابد من دباسة الخشب معروفه طبعا هدي الصوره
وهدا شكل دباسة الخشب لان تبعي اعطيتها صاحبتي هدي صورتها عشان لايكون احد مايعرفها زي كدا اللي عندي قيمتها 45 ريال من مكتبة وجدان في الرصيفه لبنات مكة وكلها حديد عشان تكبس تمام وهدي الصورة.
العطر لاتنسوا الفواحه :
محتاجين عطر اي نوع كل واحد وميزانيتو وحتى الزيوت تبع الفواحه تنفع والله كل شي يجي تحت يدكم وكل ماكان اصلي كل ماطالت مدة الريحه اكتر ومسكت .
وخلصنا حبيباتي لاحظوا اليوم انا مؤدبه اليوم ماتريقت الا مره وحده <<<شاطره على الله تفوزي هههههه
ملاحظات حابه اقولها لكم :
هاللوحه كيف رح تكون فواحه بعد ماتخلصي ممن كل هدا تسكبي العطر
عليها وفي درجة الرطوبه والحرارة تفوح ريحتها الفكره تخفيف من الكهرباء لان الفواحات على كهرباء وغير كدا مو كل مكان نقدر نحط فيلو فواحه يكون فيلو فيش فهدا وغير كدا الاطفال والاسلاك لما تكون كدا في الارض ممكن تضرهم والاسلاك اللي تكون في الجدر لو كانت اللوحه من النوع اللي يطلع صوت شلال وكداالهدف والعوده بنات والله تتم ريحتها وغير منظرها الجمالي رووووووعه والشغل فيها ممتع بس محتاج صبر وتقدرو تستخدموا شرايط وارضيه اي لون والخامات كتير ممكن حتى الفرو والعصافير والشجر كل شي كل شي اكسسوار بس الاساس هوا دا وملاحظه مراا هامه البروازن لازم يكون كدا بدرجة الفخامه ومحفور عليه عشان تعطي فخامه لو لمجلس طبعا لو مكان تاني عادي كل وحده وزوقها من رأي افضل يكون مشجر لان الشرايط شور رح تكون ساده فلازم شي يكسر الصمت وهدا وجهتي نظري وتعليقاتي وكل الشكر لاستاذتي اللي علمتنا الفكره الله يسعدها يارب اتمنى الكل يستفيد ويرد عليا مايهمني افوز والله قد مو حابه اعطيكم الفكره والله واشوف ردكم
امانه اللي عندها نقد ياريت اسمعوا بجد حابه اسمع رأيكم في هدا الجهد وهل يستحق التعب .
تم بحمد الله مع خالص حبي واحترامي:
بتمنى لكم التوفيق وانتظر رأيكم بفارغ الصبر**