للمصريات..عندك وقت أو معندكيش وتريدين أن تكسبي الاجر...أدخلي

السلام عليكم :

أولا وقبل كل شئ , مش عايزة العنوان يتفهم غلط ,كل ما هنالك إن في جمعية خيرية رااااااااااااائعة والله رائعة وانا واصحابي جربناها بنفسنا و هي جمعية رسالة.

حبيت بس أقدم لنشاط الجمعية هنا يا بنات :
- بنات الجامعة اللي داخلين على الاجازة ---- تحبوا تستفيدوا من وقتكم في شيء مفيد وأجر عظيم ؟
- البنات اللي خلصوا ومشتغلوش أو اشتغلوا أو اتجوزا -------تحبوا تكسبوا أجر كل ما تستغنون عنه؟

وكوووول البنات ..احب بس اقدملكم الجمعية دي ...دي مش قايمة على التبرعات وبس لأ , لأنك ممكن ميكنشي عندك فلوس لكن عندك وقت فراغ فلية متتبرعيش بية ؟

جمعية رسالة كانت فكرة من شباب الجامعات قائمة على تطوع الشباب والشابات لمساعدة الناس بالوقت والجهد واللي يقدروا علية ..الفكرة كبرت و بقت رسالة دلوقتي اكبر الجمعيات الخيرية في مصر 24فرع للجمعية ( فيصل - المهندسين - المعادي-6 اكتوبر-مصر الجديدة-القناطر-الاسكندرية - الزقازيق-المنصورة-الفيوم – المنوفية _السويس _ نها_ ههيا بالشرقيه_ القصير (البحر الاحمر)_بيلا(الشرقيه)_الغردقه_ اسنا ( قنا )-العاشر من رمضان-الصف- بنى سويف الفشن-طنطا-المنيا بنى مزار) والعديد من الفروع والمجموعات مازالت تحت التأسيس بجميع انحاء مصر.

أنشطة الجمعية :
1- كفالة الايتام سواء بالفلوس أو بأنك تكوني اخت لأحد الايتام الصغار ومسئولة عنه معاهم وهوا هناك .
2-مساعدة المكفوفين : ودي قايمة كلها عن التطوع , بأنك تساعد على نقل المواد الدراسية للمكفوفين وكتابتها على الكمبيوتر لتحويلها إلى طريقة برايل ,, أو بالشرائط ,,أو بالقراءة لمكفوفةفي وقت معين .
3-مساعدة الاسر الفقيرة وتزويج الفتيات : ودي يا إما تبرعات أو تطوع لتوزيع المساعدات عليهم ,,آه يا بنات في ناس والله عايشة على مفيش وربنا حيسألنا عنهم.
4-مساعدة الصم والبكم : بالتطوع وبرامج التعليم.
5-مساعدة ذوي الاحتياجات الخاصة وتعليمهم.
6-مجموعات تقوية ومحو امية مجانا وطبعا دة كلة تطوع.
7-المعارض الخيرية : والتي يتم فيها عرض الملابس المستعملة التي يتبرع يها الناس بعد إعادة تأهيلها و منتجات شباب رسالة والناتج كله لدار الايتام.
8-بنك الدم
9-بنك الطعام
10-المستشفى الخيري .

وووووو أنا مكتبتش عنها إل بعد مرور أكثر من عام على اشتراكي , والله يا بنات خير كبير

ولو تشوفوا فرحة الناس اللي الشباب بيتطوعوا يساعدوهم ..حاجة تفرح و تحسسك ان لسة في خير في الدنيا .

الموقع بتاع الجمعية أهو

http://www.resala.org/

وربنا يوفقكم دايما للخير