آنا أول ما تزوجت قلت لن أشارك بشيء بس طلع كله كلام فقط
الآن أنا أصرف أكثر منه و على كل شيء ( الجمعية، ألعاب الأطفال ، الهدايا ، كسوة الخدم ، ملابسي و مكياجي و كل الأشياء الخاصة فيني ، ملابس الأطفال ، ........ كل شيء تقريبا )
و هو يصرف على الأشياء الأساسية فقط ....... أقصد مكونات الأكل الأساسي و قسط السيارة و راتب الخادمة
و في النهاية أجد ان هذه الأشياء الصغيرة التي أشتريها هي التي تطير المعاش فلا يتبقى منه شيء لي.
آنا دائما اقول لن أشارك لأنني تعبت بس قلبي ما يطاوعني
اجد نفسي في النهاية كل شيء أنا أشتريه حتى احيانا يكون راتب الخادمة علي

معليش انا داخله عرض بينكم لاني مش موظفه.....بس انا عندي مصدر للدخل
انا اشوف ان من حق المرأه ان زوجها يصرف عليها وهو ملزوم بكل شي بس اذا حبت المرأه تساعده عن طيب خاطر هالشي طبعا زين لان الحياه تعاون
انا عن نفسي زوجي يعطيني مصروف اول كل شهر والحمدلله ان عندي دخل كبير من مصدر ثاني واحيانا زوجي تقصر معاه الفلوس فساعده من غير مايدري يعني تنقص اشياء في البيت انا اقوم اشتريها او ملابس العيال واغراضهم الخاصه بنفسي اشتريها

سبرانو:أشكرلك تفاعلك معي دايما
أم غفوري:الله يهديك اذا هذي خرابيط وشو الثقيل؟؟؟؟؟؟؟؟؟؟
الواحة:كلنا قلنا مثلك في البداية وعقب نقلبت الايه
أم عبودي..أم ميثة..مهى..الدبدوبة أم علاوي..كويتية صغيره..رماية :اشكرلكم تفاعلكم........
أنازوجي يوديني الجمعية أول كل شهر ناخذ كل أغراض البيت وباقي الشهر التناتيف علي
واخدامة والسايق واجار البيت عليه.....وسلامتكم

الموضوع ممتع وشيق..
أنا عن نفسي.. أستلم منه مصروف شهري لي ولعيالي وما أتنازل عنه أبداً..
صحيح أكيد إذا احتجت زيادة عليه أصرف شوي من راتبي.. لكن معظم راتبي أوفره لأن متأكدة إن زوجي من النوع اللي ما يوفر ولا ريال.. ولو ما وفرت أنا راح نبقى طول العمر بدون بيت ملك..
وغالباً لما أحتاج أشياء وأطلب منه يجيبها أتركه يشتريها بنفسه.. صحيح يكسر خاطري.. لكن أستحي أعطيه ولا ودي نتعود على هذا الشيء.. :26:
وهو -الحق لله - شهم جداً في هذه النواحي.. :24: ولا مرة قال لي اشتري من فلوسك أو وين راتبك.. أبداً..ولا أتخيل إنه ممكن يقولها.. و ولا مرة قصّر علي أو على عياله لأي سبب.. بغض النظر عندما كنت موظفة أو قبل أن أتوظف.. حتى أن زميلاتي في العمل يستغربن أنه هو من يدفع فاتورة جوالي..
الشيء الوحيد اللي اتفقنا عليه هو إني أدفع راتب الشغالة لأني أنا اللي طالبت فيها لما توظفت.. وأنا راضية جداً بهذا الوضع ولله الحمد..


وأنا أستغرب من بعض النساء الموظفات..
والله إني أعرف وحدة صديقتي، إنها يوم تزوجت اكتشفت إنه مديون ويسدد بالأقساط فأعطته بطاقة الصراف الخاصة بها وصار يسحب راتبها كله شهرياً !!! تخيلووووا.. ! كل هذا لأنها سمحت له في البداية لما كانت عروس ومستحية وتبي تساعده.. لكن الآن بعد مرور ثلاث سنوات صارت المسألة بايخة جداً.. فسمح لها تأخذ نصف الراتب!!
هذا أنا اعتبره ضعف وسلبية من المرأة اللي سمحته بهالشيء.. واللي ساكتة على هالوضع..

وفي المقابل أعرف وحده زوجها حالته ضعيفة جداً وهي ما شاء الله راتبها قوي جداً وما عليها.. ومع هذا تطالبه حتى بأبسط المطالب وترفض شراء هدية له إلا من ماله هو.. (صدقوني أعرفها)..

المفروض لا إفراط ولا تفريط.. وقوامة الرجل نابعة من صرفه على المرأة وهذا حق من حقوقها التي كفلها لها الإسلام ولله الحمد فعليها ألا تتنازل عن ذلك أبداً.. لأنها إذا تنازلت ستبدأ المشاكل وتقل هيبة الرجل وقدره في عينها.. كما ستشعر بالظلم منه لأنه لا يصرف عليها فتقل المودة بينهما.. واسألوا كل من تصرف على نفسها عن هذا الشعور.

اساعده بالمعقول
عشان ما يتعود
انتي تصرفين وهو يسافر ولا تصرفين وهو يتزوج
ويالله رقعيها