للنحيفات والسمينات .. المكملات الغذائية ( تقرير )

السلام عليكم حبوبات
سمينات ونحيفات ^_^
أول شي كل عام وانتم بخير وعيدكم مبارك مقدما

ثاني شي ما راح أطول عليكم

الموضوع وما فيه إني نحيفة جدا وحاولت أسمن بشتى الطرق ما قدرت :icon33:

وبعد البحث في المواقع الأجنبية وجدت شيء عجيب غريب ( يسمن ، وينحف ) :39:
بتقولون شلون !!

بشرح لكم بشكل سريع وبسيط عن هالمكملات الغذائية
طبعا المكملات الغذائية كثيرة ممكن تكون ملتي فايتمينز او سبشل فايتامينز او وجبات بديلة أو بناء أجسام أو للعظام أو غيرها وغيرها

اللي بحثت فيها هي :

meal replacements
وجبات بديلة

weight gainers
لكسب الوزن

weight loss
لفقدان الوزن


كل ما سبق أعلاه هي منتجات مستخلصة من مواد طبيعية ومحولة إلى باودر في الغالب ، وأحيانا كبسولات أو حبوب .. وراح أتكلم هنا عن الباودر لأن هي الغالب في هاذي المنتجات ( الحبوب وجدتها في بعض منتجات زيادة الوزن )

---------------------------------------------------------------

طيب وش منه تتكون هالمنتجات الطبيعية ؟

تتكون بشكل أساسي من البروتين
ويستخلص البروتين في المنتجات الجيدة من مصل اللبن واسمه بالانجليزي
whey
وقد يستخلص من منتجات أخرى مثل البيض او غيره

الشي الثاني اللي يصير في هالمنتجات هو الفيتامينات وهاذي تختلف من منتج لآخر

الشي الثالث هو الكربوهيدرات ونسبتها تختلف من منتج لآخر

كل الثلاثة يتكونون من نفس المكونات .. وكل منتج راح يكتب لك بالضبط وش هو يحتوي عليه
من بروتين وفيتامينات وكربوهيدرات ونسبة كل شي واذا فيه اي اضافات اخرى طبعا يتم ذكرها ( مع اني ما اعتقد فيه اي اضافات ثانية )

---------------------------------------------------------------

طيب وش الفرق بينهم إذن ؟؟ وكيف يختلف عمل كل وحدة ؟؟

الفرق ببساطة هو في نسبة المكونات في كل منتج =)

يعني :

في الوجبات البديلة ( meal replacements ) راح تكون نسبة البروتين والفيتامينات عالية جدا اكثر من الكربوهيدرات اللي راح تكون موجودة بنسبة بسيطة
وتعتبر الوجبات البديلة هي المكمل الغذائي الأفضل
لأنها تعتبر وجبة بديلة فعلا
مثال انتي لازم تاكلين ثلاث وجبات في اليوم
ممكن تاكلين وجبتين والثالثة تكون وجبة بديلة

مميزاتها :
* سريعة التحضير
* قليلة الكربوهيدرات اللي تتحول لدهون .. فراح تحصلين منها ع الفيتامينات والبروتين المطلوب بدون الخوف من السمنة غير الصحية
* تنفع للي يبي يسمن واللي يبي ينحف
* اللي يبي يسمن ياخذها مع الوجبات الرئيسية .. يعني تشوفين كم كالوري تحتاجين يوميا .. ووجباتك الرئيسية كم قاعدة تعطيك كالوري .. زيدي عليها من وجبات بديلة لين توصلين للكالوريات المطلوبة
* اللي يبي ينحف ياخذها "بدل" الوجبات الرئيسية .. لكن طبعا لا يكثر منها =) .. لكنها ستحتوي على ما يحتاجه الجسم من فيتامينات وبروتين بدون ما يكون فيه نسبة كبيرة من الكربوهيدرات اللي تتحول لدهون ( طبعا الجسم يحتاج كربوهيدرات حتى للي يبي ينحف )
* اللي يبي يربي عضلات ياخذها أيضا بدل الوجبات الرئيسية + تمارين كمال الأجسام
ومن خلال ما سبق راح تلاحظين انه ما له علاقة أبدا بين أخذ أي نوع من أنواع المكملات الغذائية وظهور العضلات في الجسم طالما انتي مو قاعدة تمارسين تمارين كمال أجسام

يعني لا تخافون ما راح تطلع لكم عضلات دامكم متستتين =)

ومعلومة ثانية : العضلات تحتاج جهد كبير وفترة طويلة من التمرين قد تمتد لسنوات عشان يصير الواحد عنده عضلات

عيوبها :
* سعرها غالي جدا
* طعمها قد يكون غير محبب للبعض ( بعض أنواعها حاطين نكهات لكن الاغلبية لا )
* اللي يبي يزيد وزنه راح تزيده لكن طبعا بشكل ابطأ لأن الكربوهيدرات قليلة جدا فيها .. لكنها راح تكون مناسبة للي باقي لهم شوووي ع الوزن المثالي .. اما اللي مثل حالاتي ما تنفع لهم =(
* اللي يبي يقلل وزنه لا ياخذ منها كثير والا راح يسمن بدل ما ينحف ^_^

ملاحظات عامة عليها :
* لازم تنتبهين لنسبة البروتين اللي فيها .. لأن فيه أنواع تكون نسبة البروتين فيها عالية لأنها موجهة لرياضي كمال الأجسام
* الافضل انك تاخذين منتج مخصص للنساء ( راح ينكتب عليه إنه للنساء ) .. وغالبا تكون نسبة البروتين فيه طبيعية
* أفضل الانواع اللي يحتوي على مصل اللبن ( whey ) كمصدر رئيسي للبروتين
* انتبهي انك ما تاكلين بروتينات كثير بجانب هالوجبة البديلة عشان ما تصيرين قاعدة تاخذين بروتين زيادة
* اذا كنتي تمشين على نظام غذائي مع اخصائية استشيريها قبل لا تحوسين الدنيا ^_^
***** ملاحظة هامة جدا : لا تعتبر الوجبة البديلة بديل عن الطعام الطبيعي أبدا فانتبهي من الاعتماد عليها .. هي مثل اسمها ( مكمل ) وليست أساسية

عموما انا صرفت نظر عنها لانها غالية جدا ..

لكن حبيت احط المعلومة للي تبيها

---------------------------------------------------------------

نجي عند المكملات اللي تزيد الوزن >> لأني نحيفة ببدأ بها ^_^

مثل ما قلت لكم قبل كلهم يتكونون من نفس المكونات

لكن هنا نسبة الكربوهيدرات تكون اعلى من البروتين

طبعا الاخصائيين يحذرون من انك تاخذين مكمل غذائي لزيادة الوزن ( weight gainer ) تكون نسبة الكربوهيدرات فيه عاااااااااالية جدا .. لأن هذا أشبه بأنك تاكلين سكر عشان تسمنين
وهذا عشان يحصل المستخدم على نتيجة سريعة جدا .. لكنه طبعا غير صحي

مميزاتها :
* مناسبة للي ما يشتهون الأكل مثل حالاتي ^_^ .. لانها غالبا تكون نكهاتها حلوة ولذيذة
* فيها قيم غذائية عالية من بروتين وفيتامينات .. إلى جانب الكربوهيدرات اللي راح تخليك تحصلين على السعرات الحرارية المطلوبة يوميا عشان تسمنين
* سريعة التحضير ( تنفع للعجازات مثلي ^_^ )
* بدل ما تاكلين ست وجبات لأنك عصلا يصير تاكلين ثلاث وجبات رئيسية وثلاث وجبات من هذا المكمل وممكن تاكلين ست وجبات من المكمل : ثلاث مع الوجبة وثلاث بدون
* سعره معقول

عيوبها :
* فيه منتجات تجارية يصير فيها نسبة الكربوهيدرات عالية جدا عشان تسمنين بسرعة هاذي ابتعدي عنها
* ما تفيد لوحدها بدون وجبات رئيسية ( لانه ما يمكن الاعتماد عليها ) فقط .. يعني فيك فيك لازم تاكلين :44:
بس الحلو في الموضوع .. النحيفة اكيد قاعدة تاكل والا كيف عايشة :09: ؟
فلو استمرت على نفس اكلها واخذت هذا المكمل الى جانب الاكل الاعتيادي راح تزيد نسبة الكلوريات اللي قاعدة تحصل عليها يوميا وبالتالي اكيد راح تسمن ;-)

ملاحظات :
* اقرئي التعليمات والمكونات ونسبة الكربوهيدرات ( اهم شي ) ع المنتج قبل تشرينه .. وشوفي بالنسبة لعمرك ووزنك الحالي كم تحتاجين كالوري يوميا عشان توصلين للوزن المثالي .. واحسبي اكلك الرئيسي كم كالوري فيه تقريبا .. وشوفي المكمل الغذائي في الوجبة الوحدة كم فيه كالوري ؟ .. عشان تعرفين كم وجبة ثانوية من المكمل تحتاجين يوميا ؟
* اذا اخذتي وجبات ثانوية من المكمل الغذائي اقل من المطلوب ما راح تحصلين على النتيجة المطلوبة .. مثال :
انتي تحتاجين يوميا 1900 كالوري
وجباتك الرئيسية تعطيك 900 كالوري
الوجبة الوحدة في المكمل تعطيك 500 كالوري .. اذن تحتاجين وجبتين من المكمل .. ولو زدتي فإنتي قاعدة تزيدين عن المطلوب يوميا .. ممكن تزيدين وجبة وحدة لكن مو اكثر
* لازم تحسبين احتياجك من الكالوريات ليس فقط بناء على العمر والوزن الحالي والمثالي بل أيضا بناء على نشاطك اليومي .. عملك هل يتطلب الكثير من الجهد ؟ هل تمارسين رياضة معينة ؟ ... وغيرها من الانشطة
* يمكن اعتبارها مكمل غذائي يؤخذ لإنقاص الوزن في حال تم أخذه كوجبة رئيسية بديلة .. ولم تتعدى الجرعات الكالوريات المطلوبة .. لكن لا ينصح به لأن نسبة الكربوهيدرات كبيرة وهي التي تتحول لدهون .. لكن اذا بنسبة قليلة ممكن
* لا تعتمدين عليها طول عمرك >> يعني اذا وصلتي للوزن المثالي حاولي تبدين تاكلين اكل طبيعي وقللي منها مثلا تصير وجبة وحدة عشان تحصلين ع الفيتامينات اللي فيها وممكن تستبدلينها بمكملات ذات نسبة كربوهيدرات اقل

---------------------------------------------------------------

نجي عند المكملات لإنقاص الوزن وهي ( weight loss )

هي نفسها الوجبات البديلة ( meal replacements ) ويكاد يكون الاختلاف مجرد اسماء تجارية

ولغلاء أسعار الوجبات البديلة وجدت مكملات إنقاص الوزن
ويوجد منها أنواع تحتوي على نسبة بروتين عالية جدا لرياضي كمال الاجسام
لكن الفرق الوحيد
هو مصدر البروتين في كل منتج
كما ذكرت سابقا الوجبات البديلة الجيدة تحتوي على مصل اللبن كمصدر اساسي للبروتين وهو سبب ارتفاع اسعارها
اما مكملات انقاص الوزن فقد تحتوي على مصادر اخرى للبروتين .. بعضها يحتوي على مصل اللبن كمصدر للبروتين لكن قليل ونسبة المصل قليلة
لكن الأمر لا يهمنا كثيرا لأن الهدف ليس بناء العضلات ^_^

مميزاتها :
* نفس مميزات الوجبات البديلة
* طعمها أفضل من الوجبات البديلة وتأتي بنكهات لذيذة
* سعرها معقول ^_^

عيوبها :
* نفس عيوب الوجبات البديلة

ملاحظات :
* لا تكثرين منها لانك لو كثرتي راح تزيدين بدل ما تنحفين ^_^
* اللي تبي تسمن ممكن تاخذها لكن تحط ببالها ان السمنة راح تكون ابطأ مما لو اخذت مكملات فيها كربوهيدرات اعلى .. لكن ممكن تاخذها بعدين لما توصل للوزن المثالي عشان تحافظ على وزنها بدون ما تسمن

---------------------------------------------------------------

ملاحظات عااااااااااااااااااااامة :
* في كلتا الحالتين ( الرغبة في السمنة ، الرغبة في النحف ) تحتاجين للرياضة ، لأن المنتجات تحتوي على بروتين ولازم تتريضين عشان ينبني هالبروتين في الجسم .. ممكن تمارسين رياضة البيلايتس رياضة سهلة وخفيفة ولطيفة وما تحتاج مكان ولا آلات ولا غيره .. وتمرن كل عضلات الجسم .. والمشي بعد زين .. اللي مو متعودة تمشي في البداية عشر دقايق بعدين تزيدها لين نص ساعة إلى 45 دقيقة يوميا كافي جدا
اللي تبي تنحف يمكن تحتاج وقت اطول في الرياضة ما ادري .. بس اتوقع لو نظامها الغذائي زين ما تحتاج اكثر من البيلايتس والمشي
* المكملات الغذائية صحية وما لها اضرار جانبية .. لكن حاولي تاخذين منتج معروف .. مو تاخذين صيني ومدري وشو بعدين تقولين ضرني :09:
* اي منتج لو هو اعشاب طبيعية تستخدمينها بطريقة خاطئة او بشكل زائد عن الحد المطلوب اكيد راح تضرك ( ما زاد عن حده انقلب الى ضده ) فانتبهي

* جميع المعلومات أعلاه هي اجتهاد شخصي جمعته من خلال بحثي في المواقع الاجنبية التالية :
( راح احط اسم الموقع بدون www في البداية وبدون com . في الاخير .. عشان ما ينحذف )

gain-weight-muscle-fast
هذا الموقع مرة حلو وفيه معلومات مفيدة وهو اللي أكد ان المنتجات أعلاه ما تطلع عضلات ولا شي إلا اذا سويتي تمارين كمال اجسام

livestrong
هذا فيه معلومات عن الفرق بين مكملات زيادة الوزن ومكملات زيادة العضلات
( قلت لكم الفرق في البروتين والكبروهيدرات والتمارين )

bodybuilding
هذا الموقع يبيع كل أنواع المكملات وعندهم شحن للسعودية .. بس صراحة الشحن مرة غالي :44:
وبعض المنتجات اللي سبق شراءها لها تقييم من قبل المستخدمين وكاتبين رايهم عنها

بس ممكن تشوفين الانواع وش هي ووش مكوناتها وكل المعلومات عن المنتج وتحاولين تدورينه هنا

بحثت عن ensure ( انشور ) ما حصلته عندهم .. ما ادري ليش :/

بس عموما اللي تلقى اي مكملات غذائية غير انشور يا ليت تدرج الاسم عشان نبحث عنه ونشوف تقييمه واراء الناس فيه

وختاما بنوتات

هاذي مجرد معلومات حصلت عليها من خلال اجتهادي الشخصي .. لا تجي وحدة بعدين تقول ضرتني
أنا ذمتي برية ^_^
اللي عجبها شي من هالحكي تبحث بنفسها وتتأكد من المعلومات وتستخير الله وتستشير قبل ما تقدم على اي خطوة
اللهم هل بلغت ؟ اللهم فاشهد


دعواتكم الله يجزاكم خير
ولا تنسون الملائكة ترد عليكم ( ولكِ مثلها ) فادعي بأحسن ما تتمنين أن تدعي لك الملائكة بمثله :27:
وإن شاء الله تكونون استفدتم لو بمعلومة بسيطة من البحث اللي طلع عيني :09:
إلهي يسعدكم جميعا في الدنيا والآخرة

في أمان الله :)