لله ما اخذ وله ما اعطى

السلام
زوجي فقد اخو حرمته الكبيرة يوم الثلاثاء بالليل
عمره ٥٦ سنة مرض قبل سنة بتليف الكبد ماعرفت كثير عن صحته ولا عن مرضه الا قبل يومين من وفاته قالي زوجي انه حالته خطيرة وراح مع اخته للمستشفى هذا كان انسان خدوم جدا شايل البيت كله على كتفه وعاش مع اخته ٢٢ سنة كانو مثل السمن على العسل ونشهد الله انه كان رمز الطيبة والاخلاق العالية
انا يوم دريت انه تعبان اتصلت عليها وردت وواسيتها
بس زوجي راح من صبح الثلاثاء وقالي زوج اختي مخطر جدا وصار يبكي يقولي دخل العناية المشددة الحين
انا والله زعلت عليه هو صح انسان نذل زوجي معي بس يبقى حنون فيه خير وطيب
اذكر يوم توفى ابوي قام معانا ماترك امي ابدا وماتركني
وانا قاعدة بالبيت اتصل كل ساعة عليهم ويقولي ان شاء الله خير
بعدين اتصل فيني الساعة ١١ بالليل قالي زوج اختي توفى الحين
قلت حق امي قالت بلبس عباتي وجايين انا واختك وخذتني بيت اهل زوجي عزينا وقعدنا معهم للصبح
الين رجع زوجي ومعاه اخته من المستشفى
انا والله زعلت عليه اسمعهم يقولون متى ندفنه الفجر ولا ننتظر الظهر والثاني يدق لمكتب اكرام الموتى يالله قد ايش البني ادم ضعيف
هو يبكي على اخته ويواسيها يقولها لاتخافين انا هنا ما اتركك واخوانك موجودين وابوكي مارح تنضامي انتي وعيالك
مابعمري شفته يبكي كذا عليه حتى الكل يبكون من قلبهم وانا بعد
يقولي والله لما شفته ميت مدري ايش صابني انا لي اخذته من المستشفى ووديته للمغتسل وانا لي نزلته بالقبر احترق قلبي عليه قد ايش عانى بمرضه وانا كنت معه
ويبكي يقول الله يرحمك يابوفلان كان يقولي قبل مايتوفى بكم ساعة والله انك اصيل يافلان وقفتك هذي معانا ما انساها بس عادي روح ريح يمكن عندك دوام
قلت يلعن ام الدوام ورحت معاه كنت عارف انه ميت هالليلة هذي الدكتور خذني على مكتبه وكلمني انه وضعه خطير جدا واحتمال كبير مايتحمل اكثر وانا شفت اخواني المتوفيين بالحلم الصباح قاعدين معاه ويضحكون دخلت شفته عيونه بالسماء قاعد منتظر ملك الموت انا قلت له تاكل جوعانقالي لا خلاص ما ابغى شي كان يحتضر وبعدها لف وجهه لليمين وطلع زبد من فمه ومات حاولو ينقذونه بس خلاص حانت ساعته
والله انا زعلت على اخته ترملت وترك لها ٤ بنات وولدين وهو كان عامود البيت
انا قاعدة مع اخته على طول حتى ابو زوجي مواسي بنته يقولها لاتخافي انا هنا معاكي قلت لها وش تبغين اكثر من كذا ابوكي معاكي انا والله يوم توفى ابوي مالقيت احد يطبطب علي بعد حزني وجود ابوكي وامك يهون عليكي وهذا مصيرنا
وابو زوجي بكى كثير عليه لانه ليه لانه هذا الرجال تربى بينهم كان يتيم وكان ولد عم ابو زوجي
كانت ام زوجي ترعاه لما كان صغير وتربى بينهم ويوم كبر زوجوه بنتهم الكبيرة
بس المسكينة حزينة جدا اليوم تتصل على زوجي وتقوله ثوبه وغترته كل جمعة اكويهم واحط عليهم بخور قبل مايروح الصلاة الحين مطلعتهم وقاعدة ابكي وهو صار يبكي عالجوال راح عندها يواسيها وللحين مارجع قاعد معهم
والله حزنت عليه كثير وبكيت من قلبي على اخته الله يكون معهم بمصابهم ويمسح على قلبهم