للى بتحب الطيور تتفضل 0000 اهلا و سهلا

اخواتى الحبيبات دى مشاركه بسيطه للى يحبوا اكل الطيور زى ما انا بحبها و لعلى افيد بيها بعض الاخوات زى ما انا استفدت من الجميع كتير جدا جزاهم الله كل خير و انا حبيت اكتب حاجه باعملها كويس و يا رب يا رب تعجبكوا 0


البط المحشى بالبصل
المقادير
- عدد واحد بطايه
- عدد من 4 الى 5 بصلات كبار حسب حجم البطايه و يفضل طبعا البصل المصرى بتاعنا
- عدد 4 ملاعق طعام سمن
- عدد واحد ملعقه كبيره ممسوحه فلفل اسود
- عدد واحد ملعقه كبيره كمون
- 4 فص حبهان
- 4 فص مستكه
- ملح + فلفل

الطريقه
- تغسل البطايه و تشطف جيدا و تترك لتصفى من الماءو تدعك من الداخل بقليل من الملح و الفلفل داخل ضلوع البطايه و تترك جانبا حتى نحضر الحشوه
الحشوه :
يفرم البصل فى ال kichen machine مع مراعاه انه ما يكونش ناعم قوى او خشن قوى يعنى تشغلى و تطفى حتى تحصلى على القوام المظبوت"بصل متخرط رفيع" و دى خطوه مهمه جدا و متبشوريش البصل بالمبشره ابدا لان دا بيدى نتيجه مش كويسه فى الحشو يعنى يا kitchen machine او تخرطيه رفيع بالسكينه 0
يفضل فرم البصل بسرعه ووضعه فى وعاء مناسب و رش الملح عليه بسرعه و رش الملح يكون حسب الذوق المطلوب و بعد ذلك نضع الكمون و رشه فلفل معقوله حوالى 3/4ملعقه كبيره ممسوحه و السمن و نقلب اذا احتاج كمون حطى شويه لان المفروض ان طعم الكمون يظهر فيها بس مش كتير علشان متبقاش مره المذاق تخلط المقادير جيدا و بكدا تكون الخلطه جاهزه للحشو 0
نحشى البط بالخلطه و تخيط من اسفل بخيط فاتح ينزع بعد السواء 0
(فى بعض الناس بتقلب البصل شويه على النر بس انا بالنسبه لى باحطه على طول و بيطلع حلو جدا و مستوى كويس )
يوضع القدر على النار و يوضع فيه حوالى ملعقه سمن او زيت و فصين مستكه و دى مهمه قوى لطعم الشوربه و ازاله الزفره ان وجدت 0
تقلب البطه على الوجهين حتى يتغير لونها قليلا و دا بيخلى الدهون تنزل شويه فبتخطلت مع المستكه فبتحلى الشوربه قوى بعد كدا نضع الماء حتى يغطي البط بقدر مناسب ثم نضع الملح و فصين حبهان وورق لورى و بواقى من خلطه الحشو ان وجد و نغطى القدر و لاتنسى غرز شوكه فى جانبى البطه بحرص حتى تساعد على سوا الحشوه 0
تسوى فى القدر العادى حوالى ساعه و تقلب و تختبر من حين لاخر و بالنسبه لى انا باعملها فى قدر الضعط و بتاخد من نصف الى ساعه لو جامده و كبيره شويه

بعد السوا ترفع من على النار و تتبل باحدى الطرق التاليه :
1)تتبل بالملح و الفلفل وعصيرالليمون و تترك حوالى ساعه ثم تقلب على النار من فوق فى طاسه بها ملعقه سمن او زيت

2)تتبل بملعقتين صوص صويا و تدخل الفرن تحت الشوايه مع مراعاة الملاحظه حتى لا تتحمر اكثر من اللازم

3) تتبل بملعقه معجون طماطم مخلوطه بملح و فلفل و عصير ليمون و 3 ملاعق شوربه من شوربه البط و يتبل بها البط و توضع ايضا تحت الشوايه مع الملاحظه 0

الارز بشوربه البط ( اساسى مع البط المحشو بالبصل )-عدد 4 اكواب ارز
-4 ملاعق سمن او مقدار من الزيت يفضل زيت ذره علشان ميبقاش دسم
-ملح
-كميه معقوله من شوربه البط كافيه لتغطيه الارز و تسويته و يفضل التى فى قاع القدر لان بيكون فيها البصل متركز
-كميه متبقيه من حشو البط ان وجدت الطريقه
- يغسل الارز و يصفى جيدا
- يوضع القدر على النار و يقلب الارز حتى يتخلص من الماء الزائد
- يوضع السمن و يقلب مع الارز فتره و دا السر ان الارز يبقى مفلفل
- تضاف بواقى حشوه البط ان وجدت
- بعد تمام التقليب نضع شوربه البط حتى تغطيه بمقدار حوالى 2 سم
- يترك على نار عاليه حتى يغلى و يتشرب الارز بالشوربه بعد كدا نوطى النار خالص حتى تمام السواء و تمتعى بلون الارز الجميل من شوربه البط و الطعم بجد خرافى
- يقدم مع البط و يؤكل به حشوه البط اللذيذه 0

البط المحشى بالفريك
المقادير
بطه + 3 كوب فريك و يقدر عاده بحسب حجم البط و للى ميعرفوش الفريك دا قمح اخضر بيكون موجود مع البقوليات و انا اطحنه ساعات طحنه بسيطه بس علشان ميبقاش خشن قوى + بصله متوسطه + ملح + فلفل+ 4 ملاعق كبيره سمن + زبيب محمص + مكسرات مقطعه و محمصه
الطريقه :
يغسل البط و يشطف جيدا و يتبل من الداخل بالملح و الفلفل حتى ننتهى من عمل حشوة الفريك
طريقه عمل الحشوه
ينقع الفريك فى ماء دافى يغير من حين لاخر لمده لا تقل عن اربع ساعات ثم يصفى جيدقبل بدء عمل الحشو ثم نبدء فى العمل بوضع طاسه واسعه عميقه و توضع السمن و البصل و قليل من الملح و يقلب جتى يذبل فقط ثم نضيف الفريك المصفى و نقلب و نضع الملح و الفلفل المناسب احبانا بعض الناس يفضلوا الفلفل صحيح و لكن بالنسبه لى اضع فلفل مطحون يقلب الفريك حتى يخرج ماؤه و لا يجب لن يترك على النار لانه بيلزق بسرعه نستمر فى التقليب حتى نحس انه اخرج اغلب الماء و بقى مفلفل كدا نضيف الزبيب و المكسرات و نطفى عليه ( يمكن الاستغناء عن الزبيب و المكسرات )
يحشى البط بالخلطه و يخيط بخيط فاتح منعا لخروج الحشو يسوى بنفس طريقه تسويه البط بالبصل و يتبل باحدى الطرق السابقه و يقدم بالهنا و الشفا

ملحوظه هامه :
1) تسرى نفس طريقه البط المحشى بالبصل على الحمام و الدجاج الكبير منه و ليس الحجم العادى او الصغير لان البصل شويه بياخد وقت حتى يستوى و السمان " اعتقد فى بعض الدول بيسموه طائر الفر " و على فكره السمان المحشى بالبصل بيكون رائع
2) تسرى طريقه البط المحشو بالفريك على البط والحمام و الدجاج الكبير و الحبش ( الديك الرومى )

و بالهنا و الشفا ان شاء الله 00000000000
و يا ريت اى اخت عندها طرق تانيه تضيفها حتى يستفيد الجميع ان شاء الله 0