للي شعرها كشه منكوشه تدخل واللي الزيت ماينفع معاها

السلام عليكم ورحمة الله وبركاته


مني اللي لازمها تستشور شعرها كل مره تغسله (لانه ينكش ويصير يفشل)
و
مني اللي شعرها ينكش بعد ماتزيت شعرها بالزيوت سواء كانت رخيصه او غاليه انا ماخليت زيت الا شريته واخر مره شريت زيت الجدايل من عبدالصمد القرشي شريت زيتين بست دنانير يعني بالسعودي بيوصل يمكن 80 ريال ولما ازيت شعري واغسله يصير كشه منكوشه كاعاده ويجف ويخشن شعري اكثر

لكن امس قررت اسوي شي كنت قاعده اقرا بمواضيع المنتدى وحده من البنات امدحت السمسم تحمسه وتحطه مع الزيت ----> والله ماذكر اسم البنت لكن قلت بجرب وبضيف عليه شغلات قريتها بعد

شوفو شسويت

احضرت روب وحطيت عليه خميره وخليته شوي لين ماسويت باقي الخلطه

وهي

جبت سمسم

وحمست السمسم يعني شقرته على النار حطيته بقدر وحمسته لين ماتشقر صار ذهبي اللون وخذيت السمسم المشقر وطحنته

وجبت زيت الطبخ دلال (تقدرون تستخدمون اي زيت طبخ تستخدمونه) وحطيت زيت تقريبا بفنجان ونص وحطيته بقدر وحطيت عليه السمسم المحموس بعد ماطحنته
وخليت الزيت يقلي (حتى مكونات وفايده السمسم المطحون تنطبخ مع الزيت) وخليته لين يبرد الزيت شوي

وحطيت الزيت بعد ماقلى على الروب والخميره اللي سويتهم اول شي وخلطتهم
بعدين حطيت الخليط على شعري يمكن ثلاث او اربع ساعات

والله العظيم غسلت شعري وانصدمت انه الكشه المتعوده عليها بعد الاستحمام وغسل شعري موموجوده والشعر اللي طاير فوق موموجود شكله نايم ولاول مره بحياتي مااستخدم الاستشوار ورب الكعبه يابنات مااكذب عليكم ابدا ابدا

وهذا كله ليله امس واليوم قررت اكتب لكم شصار معاي وان شاءالله تستفيدون


وامانه يابنات ادعولي الله يشفيني من الاكزيما ويحقق اللي ابيه يارب اللهم امين ويرزقني الزوج الصالح انا ومجموعتي وكل بنات المنتدى قولو امين