للي على وشك ولاده قربن جاي عجلن

السلام عليكم ورحمة الله وبركاته كيفكن ياكروشات حواء هاه اعلومكن مع الرفس والمرفوس


بدخل بالموضوع على طول مافيه وقت اخاف تجيني الولاده وانا اهذر معكن ههههههوحده عمليه ماعندها وقت اخص يالسنع

المهم ياطويلات العمر والسلامه قلت خلوني اكتب موضوع عن استعداداتك في بيتك للنفاس طبعا انا ما اقصد الاستعداد للبيبي والمستشفى لاانا قصدي هل هياتي بيتك لاستقبال الضيوف من ترتيب البيت واعادة تنظيمه هل شريتي اشياء جديده للتقديم هل غيرتي ببعض ترتيب الاثاث في بيتك استعدادا لهذا الضيف القادم

انا بالنسبه لي استفدت من عالم حواء كثير الله يسعدهن طبعا جهزت اغراض البيبي واغراض المستشفى انا باقي لي شهرين واولد فطبعا شريت قمصان الرضاعه وكلت صديقه لي بهالمهمه وهالحين قاعده ابصبص على حديقة حوشنا صايره حوسه فاليوم ارسلت عليها اعيالي قلت قشعوا الشجر اللي ماله داعي لان له اربع سنين وهو مكانك سر ايضا الخميس ان شاء الله بروح للمستودع وافرزه بالكامل ابي اشوف الجزم اللي ما نستخدمها برسلها للجمعية بعضها ملبوس لبسة واحده فقط ايضا ملابس الصيف ابشوف اعلومها اللي قصر على الجمعيه وابي اشوف الغرفه اللي راح استقبل ضيوفها ودي اعيد بعض تحفها وارتبها ايضا الحمام تكرمون اللي قريب من هالغرفه ودي اغير اكسسواراته وارتبه صح وفكرت اجهز اواني كشخه للاستقبال خاصة الفناجيل والكاسات والصياني لان القهوه والشاي والحلى والفطاير الضيوف هم يجيبونه والصياني بعد ودي اجدد

ايضا علب لادويه عندي قديمه ودي اجددها وودي اشتري لبستين لبناتي لان هم اللي راح يستقبلوا الضيوف خاصة وانهم كارفين ملابسهم كرف وولادتي على وشك الصيف يعني حتى اعيالي محتاجين لبس للصيف لان طولهم يتغير بشكل مستمر

وان شاء الله ناويه اني افرزن مراصيع المطازيز والكشنه لانه بصراحه شغالتي تتعب كثير خاصة وان الحي اللي انا فيه زيارتهم الصبح والعصر الصبح العجايز والعصر البنوتات واهلي وخواتي وحمواتي وزميلاتي فاستحي امنع عجايز الصبح استحي اردهم

فكرة ازين تمر للنفاس بس مدري زين ولا لالاني انا من النوع اللي افضل طازج اول باول

عاد يالله ياحلوين عطونا افكاركن واستعداداتكن لفترة النفاس كيف خططتن للنفاس