للي يائسه من تأخر الحمل شوفي قصة حملي(الحمدلله).

بسم الله الرحمن الرحيم
السلام عليكم ورحمة الله وبركاته
كيفكم يابنات حواء عساكم طيبات اليوم موضوعي ماهو غريب عليكم بس حابه اشارككم بتجربتي الموضوع بيكون عن قصة حملي بقسمها لكم على نقاط علشان الي عجزانه تقرأ الموضوع كامل تاخذ منه الي تبيه وان شاءالله ماطول عليكم.


النقطه الأولى :
ليش فكرت في الحمل بهذي السرعه او الطريقه بالرغم من ان مالي مده متزوجه الي اقصد ليش حاطه في بالي الحمل وخايفه يكون فيني شي مع اني وقتها ماكملت سنه من العلاقه الجنسيه بس ك متزوجه لي سنه وسبع شهور تقريبا الي خلاني افكر كثر كلام الي حولي واسألتهم عن الحمل وماالحمل وغير كذا الي تزوجو بعدي كثير وخفت من المقارنات وكذا ومانكر ان لي رغبه في اني احمل


النقطه الثانيه:
ايش سويت علشان احمل والله يابنات توقعت اول ماترك العزل احمل ع طول بس بعدها انتظرت شهر شهرين ثلاث مافي قال زوجي انا باحلل واشوف حلل طلع عنده ضعف في حركة الحيوانات المنويه المهم استخدم حبوب فتره ومل منها لأنها كانت تتعب شوي المهم فكرت اني اروح انا واشوف ايش فيني ممكن يكون انا كمان عندي مشكله بعدها قلت ماراح اروح عند اي دكتوره لأني عارفه طريق افضل من طريق الدكاتره بملايين المرات حطيت خطه في بالي ومشيت عليها الخطه كانت>>...
1-قبل صلاة الفجر بساعه يوميا اقوم اصلي وادعي ربي وكنت ادعي واقول انا واثقه ياربي انك راح تستجيب لدعوتي وظني فيك ياربي جميل فحقق يا إلهي حسن ظني وكان في سجودي اكرر ربي لاتذرني فردا وانت خير الوارثين.
2-كان اول ما يأذن اصلي علشان اكسب الفتره الي بين الأذآن والإقامه في الدعاء.
3-اشتريت سبحه وكان بعد كل صلاة استغفر مئة مره مئتين الي اقدر عليه لما اجلس ع التلفزيون لما امسك الجوال وهكذا.
4-كنت احاول اقرأ سورة البقره واجزأها.
5-اشتريت بردقوش شربت منه امكن فتره بسيطه والله ماذكر كم انا وزوجي كنا نشربه ع الريق.
6-جبت كوب كبير فيه ماء وقرأت فيه آيات الحمل وبعدها حطيته في زمزميه مويه العاديه وصرت اشرب منها كل ماصحيى من النوم وكل مانقصت ازود اصلا مايحتاج ترجعين تقرأيين ع المويه الي بتضيفينها لأنها لما تختلط تصير وحده.


((والشي الي اهم من كل شي ان كل مابدأ الشك يدخل في قلبي ان ربي ماراح يحققلي امنيتي اقول لا مستحيل ربي عند حسن ظني به وفي معلومه قرأتها وحطيتها في بالي ان كل ماقربت الدعوه على الإجابه تحسين بملل لذلك كل ماحسيتي بملل وانك ماتبين تدعين ادعي بالغصب لأنه بإذن الله الفرج قريب))


النقطه الثالثه:

ترقبي للإستجابة دعوتي وبشرى الحمل كنت انتظر موعد الدوره وجات الدوره لكن ماخليت الشيطان يغلبني كنت اقول هذي اخر دوره اشوفها ودام انا دعيت ربي مستحيل ربي يخيبني المهم اليوم الثاني من الدوره بدأت اشرب البردقوش جلست الدوره 4 ايام بس والسبب مادري ليش خفت يكون من البردقوش بس كملت وشربته وفي اليوم 12 من نزول الدوره نزلت قطرة دم وهذي القطره احيان تكون دليل على ثبوت الأجنه في جدار الرحم المهم كنت اقول يارب ان هذي دلاله على حملي وكان تجيني آلآم مادري من وين وجاء موعد الدوره الثانيه وكنت انتظره بفارغ الصبر كان من المفروض 12 /12 ميلادي وماجات واقول امكن بتجي بكره لأن دورتي تتأخر كل شهر يوم وجاء بكره وماجات بعدها بدأت احس بتغير صرت اتحسس من كريم مزيل الشعر كنت احس منطقة الرحم منتفخه شوي وهكذا المهم وانتظرت بعدها قلت لزوجي جيب تحليل حللت وكان الدوره متأخره خمس او ست أيآآم حللت وبعدها حطيته ماطالعت له رحت ع طول اصلي فجر وكنت ادعي انه يطلع حمل وخلصت وجلست استغفر بعدها سميت وشفته وكان الصدمه خطييييييين زي وضوح الشمس


النقطه الرابعه:
ردة فعلي وكيف خبرت زوجي كنت مو عارفه ايش اسوي ع طول سبته ورحت صليت ركعتين شكر لله وحده بعدها رحت اصحي زوجي علشان يصلي راح يصلي حطيت على الكنبه حق الصاله التحليل مع بدله لنونو مع ظرف فيه رساله طبعا زوجي شافه ماصدق والحمدلله كان مبسوط ويوم الأحد سويت تحليل في المشفى وطلعت حامل الحمدلله والحين لي تقريبا 4 ايام في التاسع وداخله في التباشير حق سبتمبريات واكتوبريات.


وأخيرا ماكذب عليكم اذا قلت لكم ان هذا كله في مدة شهر تقريبا او أقل لأني بدأت بإسبوع قبل موعد الدوره الأولي وجاء موعد الدوره الثانيه وماجات وطلعت حامل ويعلم الله اني ماقصد بكلامي رياء ولا سمعه كل الي ابيه الي تستفيد من موضوعي تدعيلي معاها وغير كذا انا نذرت لله اذا حملت راح اكتب تجربتي في المنتدى واذا في موضوعي شي غلط اعذروني ع التقصير كنت ابي ادلعه وألونه لكن ماعندي وقت ابد واذا تبون مني شي انا حاضره واسأل الله لي ولكم التوفيق والسداد والصلاة والسلام على خير خلق الله محمد عليه افضل الصلاة واتم التسليم.