السلام عليكم ورحمة الله وبركاته
حبيباتي الي تحب الاكل البخاري وما تعرف تسويه تطلب طلبها وانا اكتبلها الوصفة والطريقة والصور لو تبغى
المهم انا دحين مو في جدة بعد اسبوع بكون هناك ان شاءالله وبخلي ستي و بابا يشتغلو وانا اصور واكتب المقادير والطريقة انا افهملو واعرفلو بس يبغالو صبر
وانا دحين انستقبل الطلبات عشان اعرف بايش ابدأ
وراح اكتبلكم بعض اسماء الاكل البخاري وتعريفها لان اسمائها صعبة وغير مفهومة
طبعا المعروف عند الجميع ان الاكل البخاري هوا
رز بخاري <<<<< ودا معروف اكيد
مــــنـــــتـــــو <<<<<< ودا كمان معروف وللي ما يعرفو هو عبارة عن عجينة محشية بلحمة مفرومة ويستوي عن طريق البخار والقدر تبعو يكون ادوار وفيه ثقوب ان شاءالله بس اوصل جدة اوريكم صورة القدر
فرموزة <<<<<<< ودا كمان معروف وهوا عبارة عن برضو عجينة محشية بلحمة وتعتمد على كمية البصل الكبيرة والكمون ويستوي في التور الفخاري مثل فكرة التميس
اليغمش <<<<<< يختلف اليغمش عن الفرموزة وهوا ان اليغمش يستوي في الفرن عادي وعادة يكون ناشف لكن الفرموزة بالفحم او بالتنور
الســمــســو <<<<< وهي عبارة عن عجينة هشة مثل عجينة البف باستري محشية لحمة مفروممة
اللغمن <<<<<< هذي الاكل دمااااااار شئ مو طبيعي والي يدوقها او الي يعرفها فاهمني
وهي عبارة عن عجين مثل الاسباغيتي باليد يتعجن وينفرد وفيه منو جاهز وناشف وعليه مرقة حمرا فيها لحم وخضار في بعض البخارية يحطو خضار كثير زي الملفوف والفاصوليا والفول النابت والبدنجان الاسود والبطاطس زي خضار المرقوق وفي بعضهم الي هما احنا نكتفي بالكرنب والفاصوليا الز واخف وعشان المرقة تكون خفيفة
الجوطازة <<<<< هذي بالنسبة للبخارية بديل الخبز يستعملوه للتغميس وهوا عبارة عن عجين يشكل بطريقة معينة زي الكور ويستوي بالبخار نفس طريقة المنتو بس مرة لذيذ يغمسو بيه ادامات اللحم او الخضار
الخوشن <<<<<< زي المنتو بس قبل لا يحطوه في قدر البخار يقلوه الين يصير لونو ذهبي يحطوه في قدر البخار
التشوشبرا <<<<< هذا معروف اعتقد عبارة عن شوربة حمرا تكون فيها قطع صغيرة من العجين محشية باللحم
الجواوا <<<<<<< وهادي برضها شربة بس تكون فيها قطع العجين كبيرة وتكون الشربة ثخينة نسبيا
الهونان <<<<<<< نفس الجوطازة بس تختلف في المقادير
اللاظة <<<< صلصة حااااااارة نااااار مولعة مثل الصلصة الحارة الي في المطعم الصيني بس تكون ناشفة وتقدري تحتفظي بيها لفترة طويلة
تقريبا هذا هو الاكل البخاري واكيد في شئ ناسيتو بس اتزكرو اكتبلكم هوا
يلا وروني طلباتكم وانا اصور خطوة خطوة
وللي ما يعرف الاكل البخاري هوا عبارة عن عجين اغلبه يستوي يا بالبخار وهوا الاساس او بالسلق
واتمنى الاقي اقبال عشان اتحمس :42: