عيدكم مبارك يا بنات
وكل سنة وانت طيبة يا ليان و مشكورة جزاك الله خير على إفادتك
انا كنت ابغى منتو القرع السادة من غير لحمة
من فضلك تفيديني شوية كيف اختار القرع وايش مواصافاته وكيف ابشره ولا افرمه ولا ايش؟
يعني كيف اختار القرع واجهزه للحشي؟ وقد ايش كبر القرع لنفرين بس بدهم ياكلوا هدا المنتو؟

من فضلك اتذكرت كيف نسوي الهونان؟ هل هو يتسوى بالكرات؟

وجارتي زمان بخارية كانوا يسووا سمبوسة بالكرات .. تفرد عجينة طويلة وتحشيها كرات وتقليها
طبعا اذا كانت اكلة بخارية معروفة دليني على طريقة العجينة وتتبيل الكرات وكله

كلفت عليك لكنك مرجع لكل من يحتاجك عسانا ما نعدمك

السلام عليكم ورحمة الله وبركاته

اول شئ مرة شكرا على الاطراء الحلو منكم وتسلملي اياديكم وكلامكم الحلو

نجي للاسئلة


بالنسبة لمنتو القرع

يا قلبي ماما سيتا انا بالنسبة ليا اختار القرع الصغير الي يكون لونو من جوا برتقالي حلو

وقلتلك انتي حرة في اختيار خلطتك

في ناس تحب تخلطو مع اللحم المفروم

وفي ناس تخلطو مع بصل مفروم وملح وفلفل اسود

وفي ناس تسويه سادة بس قرع بدون ولا اي اضافات غير شوية ملح وفلفل اسود وتقطعيه مكعبات صغيرة جدا زي البصل

وتحشيه في العجينة وتضفريه وتحطيه في قدر المنتو لمدة بين 20 ل 25 دقيقة

اما الهونان يا عمري نفس طريقة الجوطازة

تعجني عجينة نفس عجينة اللغمن وتفرديها بسك خفيف وتدهنيها سمن وترشي عليها كراث مفروم فرم خشن وترجعي تفردي عجينة تانية وتحطيهت فوق العجينة الاولى وتحطي برضو سمن وكراث وكدا الين تسوي 3 طبقات عجين وتلفيها زي الكيك السويسرول وبعد كدا تمسكي طرف العجينة وتلفيها حلزون
ادهني قدر المنتو سمنة
وحطي كور الحلزون فيها واطبخيها على النار بنفس طرييقة المنتو بين 15 ل 20 دقيقة

شوفي يا قلبي سمبوسك الكرات دي مرة سهلة

تفرمي الكراث فرم خشن وتحطيلو بيضة وملح وفلفل اسود واختياري تحطي معاه لحم مفروم مطبوخ بالبصل بالبقدونس والكزبرة نفس طريقة اللحم المفروم حق السمبوسك العادية

المهم
تجيبي عجينة السمبوسك المثلثات ولازم تكون عجينة بالزيت زي الي يبيعوها في المخابز مو الي في السوبر ماركت وتحشيها بالحشوة الي قبل وتقليها وبس :)

الله يعطيكي العافيه مشكوره ليتك تعملي المنتو بطريقة التضفير