للي يعرفون كلية التقنيه للبنات الي بالرياض<<تفضلو عندي شوي

مساء الخيير جولي

انا ادرس بكليه التقنيه وقسمي تجميل

وراح اقولك كل اللي اعرفه عنها واذا عندك اسئله اسئلي وبجاوبك بكل اللي اعرفه ماراح ابخل عليك بي اي شي :)

شوفي موقعها في حي صلاح الدين جنب جامعه الامير سلطان بالاصح وراها :)

والاقسام اللي فيها

الاقسام للقسم الادبي : تجميل , خياطه , محاسبه

الاقسام للقسم العلمي : دعم فني , محاسبه


ومده الدراسه سنتين ونص ندرس سنتين ويكون النص تطبيق عاد على حسب قسمك

يعني المحاسبه يطبقون بالبنوك والكليات والدعم يطبقون بالكليات ,,, الخ


ونظامها مو شيين وانا كنت ادرس بكليه الاداب بس ماارتحت فيها

ونظامها من ناحيه اللبس البسي اي لون بس الكم يكون حاير والا فوق الكوع بشوي خصوصا انهم هالايام شددوا بزياده تنانير قصيره ممنوع جوالات كاميرا ممنوع

والمبنى صغيير وتراه معهد صغير مو كليه :) بس مو كئيب بالنسبه لي فماادري عن غيري

امممممم وايش كمان

وطبعا فيها مكأفاه 1000 او 950 واكييد انتي عارفه انها دبلوم مو بكالوريس ويفكرون مستقبلا يخلونها بكالوريس بس شكلهم مطولين ويفكرون بعد يفتحون اقسام ثانيه وشكلهم بعد مطولين

واذا تبي تدخليها من الترم الاول شدي حيلك وجيبي نسبه زينه لانهم انا ماقبلوني من الترم الاول حطوني احتياط وقبلوني الترم الثاني ومااخذو نسبتي مع القياس اخذوها مع التراكمي وانا كانت نسبتي 50 . 84

والله يوفقك ان شاء الله ويدخلك اللي في بالك ويسعدك فيه

واحب اقولك اذا نسبتك ماساعدتك تدخلين ومره في بالك تدخلينها ترا تقدرين تدخلين مسائي برسوم من الساعه 3 وربع الا 7 ونص ويعتمد بعد على حسب محاضرتك ورسومهم 3000 للترم ولا تقولين خلاص ادخل مسائي ترا فيه كثيير قدموا على المسائي وماانقبلوا يعني حاولي تشدي حيلك والله يوفقك يارب

بس هذا اللي ببالي اذا حبيت تستفسرين عن اي شي ثاني اسئليني وان شاء الله اقدر اجاوبك

ولو مارديت عليك فارسلي لي رساله يمكن انسى ارجع للموضوع

اذا فتحوا اقسام ثانية خبرينا
وخصوصا ادارة مكتبية

وهل فيها مقابله قبل الموافقة على الدراسة

اللي في بالي :

ولايهمك ان شاء الله ماانسى اقولك وانتي شيكي على موقعهم من فتره لفتره

وتراهم مطولين على مايفتحون اقسام جديده يعني يبيلهم كم سنه ومحددين وشي الاقسام بس اذكر منها صناعه مجوهرات

ومن ناحييه مقابله لا الحمدلله مافيه

وطريقه تقديمي قدمت عالنت يوم قبلوني طلبوا مني اجيب شهادتي وحددوا لي اليوم واذا ماجيتهم بالايام المحدده يرروح التسجيل لانو يمشون بالنسب المهم بتجيبين لهم ملفك وهم وقتها بيعلمونك وش بتجيبين ويعطونك اشعار قبول وبس

عارفه اني متعمقه بالشرح شويات بس بقولكم كل شي على شان تكونوا بالصوره :)

وحده آدميه الله يوفقك ويرزقك مشكوووووووره على مساعدتك
و***** الله ادخلها وان شاء الله نسبتي حلوه ومابخربها ياربي
مشكوره مره اخرى
تحياتي وتقديري

صباح الخير جولي

قريت رسالتك وجيت ابربر لك عن قسمي هنا :) << راعيه طويله


بسم الله نبدا

اول شي بتكلم عن المواد اللي ادرسها

طبعا تقسم الدراسه على مستويات انا قلت لك اننا ندرس سنتين ونص وبيكون تقسيمها كذا

انا قلت لك ان دراستنا سنتين ونص

فراح تكون مقسمه على اربع مستويات ونص الباقي بيكون تطبيق

وانا الحين توني باديه هالترم ومستواي الاول

ودراستنا تتضمن


المستوى الأول


مبادئ الحاسب الآلي

انجليزي

ثقافه إسلاميه عام

كيمياء

احياء

اساسيات التجميل ( تخصص ) ..


المستوى الثاني

عربي
محاسبه مبيعات
انجليزي عام ،

التخصص معمل دراسة التسريح والقص

المستوى الثالث

التخصص صبغ وتمليس وتجعيد وعنايه بالأظافر واليدين والقدمين.

المستوى الرابع

التخصص مكيــــاج




المستوى الخامس

تطبيق خارج المعهد


والتطبيق انا منهبله الحين ودي اعرف وين نطبق ولا ادري وين لان تونا مابعد خرجوا ولادفعه

وتعد دفعتي الدفعه الثالثه اللي تدرس التجميل يعني ان شاء الله انتي اذا معزمه تدرسينه وقبولك راح تكوني الدفعه الرابعه



ومن ناحيه تعامل المدربات مره حليوات ويساعدون وتحسين دراستك كانك بمدرسه يعني مره حليوات


وايش كمان امممممممممم

صح قبل ماتدخلي القسم استخييري

واحب اقولك ان اذا دخلتي تجميل استعدي نفسياً لكلام الناس

اللي بيقولك وش مدخلك الحمدلله خلصت الاقسام واللي يقول احد يدرس تجمييل !!! واللي يتمسخر عليك

واللي يقول اجلسي بالبيت احسن واللي يقول احد يدرس دبلوووم وماخفي اعظم :)


يعني اذا كنتي من النوع اللي مايتحمل هالكلام لاتدخلينه لانك بتتعبين نفسياً


فاذا كنتي مره تبين التقنيه ومن النوع اللي مايتحمل حكي الناس وبدامك علمي

تقدرين تدخلين دعم فني والا محاسبه

<< عارفه انك بتقولين ليش تهبط عزيمتي بس ماابيك تنصدمين من الواقع زيي


لاني كنت طايره من الفرحه يوم قبلوني بس صدمني المحيط اللي حولي بكلامهم وطنازتهم وحيكيهم اللي يسد النفس

ومااكذب عليك انو بالبدايه تعبت نفسيتي من كلامهم :(

بس الحين ابي اثبت نفسي عندهم واخليهم يتحسفون على كل كلمه قالوها << شر

واذا تبين تعرفين وش راح تستفيدي من شهادتك اذا خلصتي

اول شي راح تستفيدي منها انتي شخصياً

وممكن اذا تحبي تشتغلي بمشاغل او لحسابك << بس انا ماراح اسوي كذا لان مجتمعي مايرضى بالشي هذا

وكمان تقدر تفتحي مشغل لك والمعهد يعطي يسلف قروض للمتخرجين اللي عندهم مشاريع << فكرت فيها بس عارفه نفسي مو وجه مشاريع

ووممكن تشدي حيلك وتصيري معيده بالكليه << وهذي امنيتي ويارب تتحقق من غيير شر

واذا بغيتي تشتغلي بمراكز اكوني مدربه تجمييل زي حقت الدوراات

وبس هذا اللي في بالي الحين عندك اي سؤال انا حاضره سواء بالقسم هذا او غيره راح اجاوبك بكل اللي ارعفه

واهم شي دي حيلك وجيبي النسبه السنعه واستخيري

وصح اذا جاء وقت القبول لاتخلين لا كليه ولا جامعه ولا معهد الا قدمتي عليه

حتى لو مافكرتي تدخلينه قدمي ماعليك والله ماتدرين ايش يصير بعدين

عندك صديقاتي الحين ياعمري عليهم داخلين كليات ومره تعبانه نفسياتهم يبون يبطلون ويتمنون من قلب انهم قدموا عالمعاهد مع انك لو سألتهم قبل اذا يبون يدخلونها بيقلون لا مانبيها بس شفتي كيف الظروف ووبعضهم يفكر يقدم عليها السنه الجايه ويترك كليته

وانا كنت ادرس بكليه الاداب تاريخ درست 3 شهور ماارتحت فيها بس غاصبه نفسي غصب يعني ادرس ولا اجلس بالبيت والحمدلله قبلوني التقنيه الترم الثاني على طول سحبت ملفي ومع اني ماكنت مفكره ولا واحد بالمليون انهم بيقبلوني بس رحمه من ربي الحمدلله ياربي على كل حال

يعني ماتدرين وش يصير قدمي على كل شي شين زييين قدمي وبعدين تكون الفرض قدامك انتي اختاري اللي تحسينك تحبيينه وترتاحين فيه



واحب اقولك اخييراً ترا المعهد مو وااااو يجنن ومدري كيف اخاف تأمليين وتنصدميين لا هو حلييو خصوصا للي جربوا شي ماحبوه بيحللونه بقلب

وبس اذا عندك اي استفسار لايردك الا لسانك انا بالخدمه :)