لماذا ارى الفشل متكرر بحياتي؟ والآن زواجي☹️

مرحبا للجميع ، انا حديثه عهد بالزواج وكمان حامل
... امممم بالبدايه
انا وزوجي بيننا فارق عمري ١٠ سنه .. هو انسان عاقل حنون وذكي وصاحب دين
انا بصراحه حنونه حساسه بس مو ذكيه مرات اجيب العيد بكلامي وهذا اكثر حاجه اتنرفز منها
هو ينتبه بسرعه لهالاشياء واحس ماصار زي بدايه الزواج ماليه عينه.. واحس اساس المشكله فيني
انا من قبل ما اتزوج ما اعرف الذرابه ولا اعرف امزح
مرات يقولي كلام ينتظر مني رد او تعليق اوك هذي مقدور عليها نوعا ما
بس لما يجيب لي كلمات زي مثلا "نخدمك بالافراح" انا ما اعرف ردها ابتسم يقول وراه ماتردين ..ايش ردها مو عارفه!
لما امزح معاه اجيب العيد بقوووه
ومره مزحت وليتي مامزحت المشكله بالجوال اقدر افكر قبل ما ارسلها ترددت بكتابتها قلت لا عادي
رد قالي ايش هالكلام الله يهديك انا حسيت اني اللي قلته فعلا غلط بس تنرفزت انه علق علي كذا😫 مدري حتى من كثر ما انا فشله من الكلمه مقدر اقولها هنا

اكتئبت يومها مدري احس بخنقه من القهر عاد كتبت له خلاص ماعاد نمزح ! سألني اذا زعلت قلت لا
وانا يومها احس اني مخنوقه مره وماابي اخذ وأعطي معه وهو حس علي وكان يسولف ويقول سافهتني و بس انا اتكلم !..قلت اسمعك ومتجاوبه معك
في احد المرات اول مره عند اقاربه جبت العيد وسبيت اسم وحده عزيزه على قلبه وانا كنت ناسيه اسمها
وتفشلت وقتها وعرفت انه الكلام واصله من خلاص استفزازي بتسميه المولود عليها .. قلت عادي اسم قديم واعتقد هو جاب الطاري ان اسمي قديم قلت اي اسمي مو حلو ..
اللي قاهرني كنت اقول بنفسي ماراح اخبره انه اسمي موحلو لكن بما اني جبت العيد بإسم امه
فصار لما يسألني عن رأيي بأسماء واقوله مو حلوه يقول وش يعجبك اذا اسمك مو معجبك!
عرفت اني اخطأت خطأ حياتي لما قلت ان اسمي مو معجبني كل ذا عشان ما ابي بكرا اطفالي اسميهم بأسماء خايسه ..
انا كثير معاكسه لتفكيره بقوه وخصوصا للي يعاكس الدين .. بس صرت احاول اتجنب اقول ارآئي انا مخنوقه من نفسي ما اعرف اتعامل معه ،مرات يقولي انك ماعندك سالفه دايم تجيبين كلام بدون مصدر علمي
مرات ابي افتح سوالف اي شئ واتحسف عقبها اجيب العيد لنفسي
انا ما ابي اطيح من عينه ، يعني مو فارقه اطيح من عين احد بس زوجي ما احب اطيح من عينه ..ماكنت بيوم اتوقع اني لما اتزوج رح اكون حساسه تجاه زوجي وابيه يشوفني بعينه جميله مو بس شكليا ابيه يعجب بي فكرياً .. انا محبطه من جد لأني اعتقد اذا الرجال اعجب بزوجته فكريا رح تظل حبيبه قلبه فعلا مايمل منها !
مرات حتى لما يسألني اعطي نفسي فرصه افكر فيحسبني اسفهه او يقولي تدورين رد 😫 كاشفني بكل شئ اوف ..
افكر ماعاد امزح معه من جد!!
مره يقولي فيه ناس لما شفناهم اعجبونا بس بعدها طلعوا عاديين او كلمه زي كذا فهمتها وش يقصد ..بعدها غير السالفه وقال الرؤيه الشرعيه وش المقصد منها الا الراحه .. هو مو اول مره يقول الكلمه واما يقصد فيها عدم التزامي بالدين او الخواء الروحي يعني ماعندي علم بالامور ..قلت اي نفس الوضع بالنسبه لي فيه ناس لما شفناهم من برا الله الله ومن جوا يعلم الله <<عجزت احطها بقلبي مع انه مافيه شئ بس قهرني لاينتقدني
قال من برا الله الله اجل .. قلت لا تدقني بالكلام
علموني تعبت من نفسي ، انا كنت اعاني من قله ثقتي من زمان واتعبتني واحاول اني ما ابين هالشئ بس يبان مره قالي انتِ مو واثقه من نفسك كنت اناظره كل شوي لأنه يتأفف من ريحه الكشنه وكان متنرفز ، قلت له بثقه لأني ما ابي يشوفني ضعيفه..ماني مجبره اثبت لك ثقتي بنفسي ، والآن اعاني من عدم ثقتي بعد ما احببته ولا ببدايه الزواج احاول يكون لي شخصيتي اللي مايفرض عليها شئ . ابي اكون كامله فكريا امامه ما اعرف ، لما نروح لأهله او اقاربه ويكون معي مدري كأني تحت ضغط لو جاملوني او من السوالف وكذا ما اعرف اخذ واعطي ما ابيه ينتبه لي ..
كيف اتعامل مع نفسي اولاً؟ ايش مقترحاتكم تجاهي ؟
بالمناسبه حاولت ادور كلمات ذربه ماقدر اطبقها انساها ، احسد الناس اللي عندهم سرعه بديهه اللي لسانهم دايم ينقط عسل ☹️ نفسي اكون مثلهم 💔