لما لزمت هالأمور لقيت كل دعواتي تستجاب ؟

اولا السلام عليكم
اخباركم ياحوائيات
يارب تكونو كلم بخير وهنا من الله
يمكن مو هنا مكان موضوعي المناسب بس ودي الكل يشوفه ويطبقه وباذن الله ربي يستجيب دعواتنا ويفرج همومنا جميعا
ودي اليوم اقلكم بعض الامور اللي بإذن الله تكون سبب في استجابة الدعوة واكيد تعرفونها بس سبحان الله الواحد احيان يغفل عنها
انا الحمدالله بفضل ربي علي كثير ادعي وتستجاب ولله الحمد لدرجة احيان ادعي بدون مااكلم زوجي اقول يارب نسافر للمكان الفلاني واتفاجأ الاقيه يقول هاه وش رايكم نروح لهاالمكان؟؟ ( طبعا نفس المكان اللي دعيته ) والله اني استحي من ربي لانه يستجيبلي وانا والله مقصرة كثير بحق ربي الله يغفرلي بس..
يللا ندخل بالموضوع ادري طولت عليكم ودكم تفقعون وجهي الحين ..طيب نبدأ:
اولا وقبل كل شي احسني الظن بالله وحطي ببالك ان ربي بيحققلك هالشي لأن الله مايعجزه شي سبحانه واذا ماراح تحسني الظن بربي وهو يعلم اللي بقلبك كيف تبين دعائك يستجيب وانتي يائسة من استجابة دعوتك !!
حاولو تكثرون من دعاء ( اللهم ارزقني حسن الظن بك ..وصدق الاعتماد عليك ) والله ويشهدالله من لزمت الدعاء هذا ارتحت راحة عجيبة غريبة قبل كنت دوم محبطة ولا احسن ظني بربي الله يسامحني.. واذا صارتلي مشكلة احس ابواب الدنيا مقفلة بوجهي لاني ماكنت احسن ظني بربي ومن يوم لزمت هذا الدعا والله اني مهما كبرت مشاكلي سبحان الله الاقي عندي ثقة بربي عجيبة ولا اعطي الموضوع اكبر من حجمه لاني متوكله على ربي اللي بيفرج همي في غمضة عين او اقل لانه القادر سبحانه
ثانيا استغلي اوقات الاجابة ترى باقولها من الحين راح يجيك الشيطان ويلعب عليك بكذا خطة عشان تبطلي تدعين راح تنشغلي او يحسسك بضيقة ولاتستغلي وقت الاجابة انتي ذنوبك كثيرة ولايستجابلك و...الخ من هالخطط الفاشلة لكن انتي لاتطاوعيه خلك قوية وقولي انقلع انت وخططك التافهه ربي بيستجيبلي وانا واثقه فيه
اكيد كلكم تعرفون اوقات اجابة الدعوة بس انا راح اركز على وقت واحد لاني مواظبه عليه من كم سنة ويشهد الله وجدت راحة وسعادة بتقولون وش ؟؟ اقلكم بين الاذان والاقامة حاولو اول مايقول المؤذن الله اكبر رددو معاه الله اكبر الله اكبر رددو الاذان وراه.. بكل اذان في الصلوات الخمس حتى لو انتي مشغولة حاولي ترددي بنفسك وبعد ماتنتهي من ترديد الآذان قولي اللهم رب هذه الدعوات التامات والصلاة القائمة ...الخ الدعاء المعروف وبعدها قولي رضيت بالله ربا وبالاسلام دينا وبمحمد عليه السلام نبيا ورسوله استشعري كل كلمة تردديها قسم بالله سعااادة ي بنات سعاااادة.. وبعدها افرشي سجادتك وياريت تكوني ع وضوء من قبل اجلسي واستقبلي القبلة هنا ارفع يديك للرب للقادر للي مايعجزه شي سبحانه للي لو ارضيتيه سيدهشك بعطاءه ستبكي عينيك من النعيم اللي بتلاقيه في حياتك والتوفيق لدرجة انك راح تخجلين من ربي وتقولي يارب هل فعلا استحق كل هذا النعيم ! نعم لو وثقتي بالله وارضيتي الله راح تتقلبي في النعم اقسم بذلك ..
هنا الامر الثالث: لابد من مدح الله والثناء عليه سبحانه لا تنسون هالامر ضروري بالله لو احتجتي شخص بامر معين ومساعدة ( ولله المثل الاعلى سبحانه ) بتجين للشخص تقولي سويلي الشي الفلاني بسررعة والا تبدين بكلام طيب وتظهرين حبك له طيب كيف تبين ربي يستجيبلك بدون مانتادب معه ونثني عليه سبحانه
طيب واخر امر :حاولو بقد م تقدرون الابتعاد عن المعاصي هي سبب في عدم استجابة الدعاء لاتقولي مااقدر لاتقدري اتركي الذنب من اجل الله راح يعوضك بامور جميلة جدا لم تتوقعيها وشي مهم لايضحك عليك الشيطان ويقلك تبتي والحين رجعتي ويقلك استمري عالذنب انتي م تستحين تتوبي وترجعي كل شوي خلك مذنبه كذا افضل ..انا اقلك لا كل مااذنبتي استغفري وتوبي ترى ربي بيفرح بتوبتك حتى لو كانت هذي التوبه الف توبة من ذنب ترجعي فيه ..لكن هه احذرك مو تقولي باتوب عشان بس ربي يستجيب وارجع للذنب لا..لا ابدا مو كذا ..اتتبهي الله يعلم مافي الصدور ولاتمكرين لان الله خير الماكرين انتي لما تتوبي كوني صادقة انك ما تعودين للذنب لكن لو غفلتي او ضحك عليك الشيطان بلحظة ضعف منك لاتيئسين ماعليه ارجعي توبي من جديد وطبعا باقي الفرائض الكل اكيد يعرفها الصلاة في وقتها صيام الفريضة ..الخ من الامور الواجبة علينا والابتعاد عن الكبائر وخاصة الغيبة حاولي بقد م تقدري تبعدي عن الغيبة وخاصة لوسمعتي ناس يحشون في احد حاولي تدافعي عن هالشخص بغيبته غير البعد عن الكذب والاغاني و...الخ من المعاصي اللي كثرت بهالزمن انا مااقلك خلك مرة لان هالامور تحتاج مجاهدة للنفس ومجاهدة النفس من اصعب الامور لكن لو علقتي قلبك بربي صدقيني والله يصير الابتعاد عن المعاصي امر هين وبسيط واخيييرا رطبو السنتكم بذكر ربي واستغفرو كثير وقومو الليل وصلو عالنبي صدقووووني قسم بالله بتشوفو العجب من ربٍ كريم سبحانه
سامحوووني عالإطالة لأني زودتها حبتين..بس ابيلكم الفائدة والله ولاتنسوني من صالح دعواتكم يسعدكم ربي جميعاااا احوووبكم ❤