لنرتـــــقي ..

بسم الله الرحمن الرحيم


كبدايه لي بمنتداكم العزيز الذي اتمنى ان تقبلوني فيه وسطكم حابه أعرٌف بنفسي:)

فتاة مسلمة الحمدلله .. مغنربه خارج بلدها .. تحاول جاهده ان تمثل دينها ووطنها و اهلها على أكمل وجه

كبدايه حابه اتكلم بدون ترتيب منمق للكلام .. واتمنى من الجميع نتناقش .. ونتحاور .. ونتفق .. او نتعارض بكل حب واحترام .. اعتبروها أراء قد تصيب وقد تخطيء لكن ركزوا على النتيجه او الهدف بالاخير. المفروض كلنا نتفق على هالهدف الموحد.


السبب من مشاركتي بالمنتدى وانا مالي اي خبرة بأي منتدى سابقا هي عدة أمور أو ملاحظات خلوني ارتبها لكم عشوائيا :

أولا : كنساء عربيات مسلمات لاحظت انه احنا ممكن نمر من جنب بعض ما نسلم على بعض سواء نعرف بعض أو لا .. سواء بقصد أو بدون... وهالشي بكثرة للاسف سواء خارج بلدنا او داخلها مع اننا ( مسلمات ).


ثانيا : لاحظت انه ننتقد بعض كثير ونتقابل الاراء الاخرى بصدر رحب.. وممكن توصل لطولة لسان بسهوله .. و لازم ندخل الاعراق والانساب ونفاضل بينهم وتكبر الاحقاد وممكن نرجع للتاريخ بأغلاط كل شخص ونذكره فيها مع اننا ( مسلمات ).

ثالثا : اتمنى من الكل يوصل لأعلى المناصب في كل مجال بدون نق وحسد لأنه صار كثييير .. نسينا نذكر الله دوما على السنتنا .. وكل وحده صار شغلها الشاغل ومسبب الاسباب هو العين والحسد وصرنا نسمع عن الاسحار مع اننا ( مسلمات ).

رابعا : ممكن نعرف انه الجميع مستويات اجتماعيه مختلفه.. قدرات مختلفه.. حاجات متفاوته.. بس وقت نحتاج المساعده والوقفه الصادقه نلقى اشغال الدنيا نتعذر فيها مع اننا ( مسلمات ).

خامسا : في أي مجال أكيد بيكون فيه تنافس .. ممكن غبطه .. ولكن مو عارفه ليش ما يوقف ضد المرأه الا مرأه مثلها بدل ما توعيها أو تنصحها تدور على عيوبها وتحطمها مع اننا ( مسلمات ).

سادسا : الحياء... الحياء... الحياء اختفى تقريبا الا من رحم ربي .. البسوا .. وانبسطوا .. وتمتعوا بما حلله الله .. ولكن الملاحظ في كل مكان او موضع الحياء يكون مختفي من الصغير أو الكبير مع اننا ( مسلمات ).

سابعا : تبين حقوقك؟!! من حقك .. وخذيها .. وناضلي من أجلها .. بس بفكر وعقل .. أدب واحترام.. و نحط تحتها ألف خط..وتذكري اننا ( مسلمات ) .

ثامنا : مستوى التربيه للجيل الجديد .. الأم مدرسه .. حياة .. أرض خصبه .. عطاء .. ومع ان أغلب الامهات متعلمه تعليم جيد ولكن انظروا تربية الصغار الان .. وتقدير لهذه الامانه مع اننا ( مسلمات ).

هذا مايحضرني الان باختصار شديد .. اتنظر تفاعلكم .

لكم ودٌي واحترامي.