لو إنتِ في هذا الموقف كيف حيكون تصرفك؟

السلام عليكم ورحمتة الله وبركاتة

أمس جو عندي بنات خالاتي وأولاد خالاتي (الصغار)

بيتي عباره عن غرفة نوم وصاله ومطبخ صغير..وجنب المطبخ في غرفه مسميينها (غرفة الألعاب)
حقت أخوان زوجي ..
وخالتي (حماتي) الله يعطيها العافيه ماقصرت قالتلي: إذا أحتجتي الغرفه أستعمليها..
المهم الأولاد بعد مالعبو في الشارع طلعوا ودخلو الغرفه ولعبو فيها..
ويمكن نص ساعه أو أقل وجاتني بنت خالتي وقالتلي الغرفه مره معدومه..
رحت أشوف ألقى الغرفه حايسه كل الألعاب مرميه في الأرض ومساند الكنب مرميه في كل جهه
طبعاً ماسكت خاصمتهم وخليتهم يرفعوا الغرفه.. وسارت زي الفل....
وفي 4 منهم كانو يلعبو فرفيره وأعمارهم 12 سنه وأخو زوجي منهم
المهم قلت للكل لو أحد فيكم سوى شئ كلكم بتنزلو الشارع...
وأقل من 5 دقايق وبدو يتشيطنو..
المهم قتلهم كلكم على الشارع بسرعه..
أخو زوجي مارضي << من هنا تبدى المشكله!
قال: أنا بلعب فرفيره معاهم
المهم كلمه مني وكلمه منه وبرضو مو راضي ينزل
شلت الكوره اللي يلعبو فيها
هوا عصب وقلي: جيبيها!
قتله: أنزل وأنا برجعها مكانها (في الفرفيره)
ومو راضي يخرج إلا يبغاني أعطيه الكوره..وأنا مارضيت..
قال: طيب أنا أوريكِ باخذ جوالك عشان تتأدبي!!
وخرج من الغرفه ودخل بيتي بياخذ جوالي..
أخواته منعوه وطردوه..
ومارضي يخرج من باب الشقه << هوا الوحيد اللي معاند الباقيين كلهم خرجو
يبغى يخرج من غرفة الألعاب على بيتهم (في درج وسط البيت ينزل على بيت خالتي)
قتله: أدخل من باب شقتكم لا تخرج من هنا!
قال: ما أبغى هذا بيت أبويا
قتله: بيت أبوك تحت
قال: العماره كلها حق أبويا
المهم ونزل.. وأنا أتظايقت من كلامه..
وبعد مانزل بشويه أنا بكيت وحده من بنات خلاتي أنتبهتلي وقالتلي قولي لأمه وبتأدبه..
إنتِ مو أخته عشان يقلك كذا إنتِ مرة أخوه.
لكن أنا ما قلت لخالتي شئ لأني سمعت أخته تكلم أمها وتقلها باللي سواه..
وخالتي ماقصرت .. حبسته في بيتهم....
إحنا بعد صلاة العِشاء رحنا بيت جدي..
فهوا ما جاء.. إلى آخر اليل على العَشاء..
بس بصراحه أحس إنه هذا الحبس مايكفي!
وبصراحه أنا ماجبت سيره لزوجي لأني ما أبغى أسوي مشاكل بينهم..
بس مره أنقهرت من تصرفه
ودي أسوي شئ أو أقله شئ يخليه يحترمني أكثر من كذا..
بس ماني عارفه كيف..!

إنتوا إيشرايكم باللي سار؟
لو إنتو في هذا الموقف إيش بيكون تصرفكم؟؟

أنتظركم