لو اتصلت فيك وحده تسألك عن؟؟!!

السلام عليكم ورحمة الله وبركاته

يسعد مساءكم خواتي الغاليات .. ابي مشورتكم بمشكله تورطت بها

وانا اعتز برايكم وبالمنتدى وبكل ما فيه وضاقت بي الدنيا وحبيت اسالكم واشوف لو كنتي مكاني وبصراحه حطي نفسك فعلا مكاني وتخيلي انك انت المسؤوله..

ما راح اطول عليكم مشكلتي ياطويلات العمر تتلخص في التالي..

اهل زوجي خطبوا لولدهم قبل فتره وبعدهااعلنوا الخبر لنا(حريم الاولاد) وقالوا انهم اعطوهم البنت ووافقوا.. طيب الى هنا بتقولون وين المشكله ؟؟!!


المشكله .. انه بعد اسبوع اتصلت فيني ام البنت تسأل عن الولد وكان همها الصلاة هل هو يصلي والا لا؟؟

انا طبعا انحرجت لان بصراحه انا ما اشوفه يصلي يعني احيان يأذن المغرب وتخبرون قهوه وفلة حجاج وكلهم محد يقوم يصلي اقوم اصلي وارجع وكل واحد بمكانه .. والله ما ادري هو يصلي بعدين يعني يأخر الصلاة والا انه يجمعها والا ما يصلي !!
علم اكيد ما ادري بس ما اشوف كل الرجال اللي في البيت ولا واحد منهم اذا جت الصلاة يروح المسجد!! اللهم صلاة الجمعه وصلاة المغرب برمضان..

هو ضابط .. انا قلت للام والله ما ادري هو ضابط واول بالكليه ثم كل يوم بديره يعني ما اشوفه كثير (وهذا الصدق لكن يوم يكون موجود اشوفه)
وقلتلها والله ما احكم على صلاته قالت طيب لو نسأل المسجد اللي عندكم يعطينا خبر عنه ؟؟ قلت ما ادري يمكن ما يعرفه قلتلك انه كل يوم بديره فما اتوقع يعطيكم خبر..

وعطيتها اسم المسجد بعد طلب منها..

وبصراحه صار لي اسبوعين تقريبا من بعد ما اتصلت بي امها وانا متضايقه واحس اني غلطت بس احيان اقول لنفسي فعلا انا ما ادري هل هو يصلي والا لا واحيان اقول اقدر اقولها اللي اشوفه وهم يسألون ويتأكدون وما له داعي ضيقة الصدر اللي انا فيها ..

بس بعد هذا زواج وعمر بين اثنين واخاف تتعلق البنت برقبتي يوم الحساب وتقول انتي ما قلتيلي..

بصراحه انا ضايقه الدنيا فيني اخاف اظلم البنت بسكوتي واخاف اظلم الولد اذا حكمت عليه من الاوقات القليله اللي اشوفه فيها..

وشرايكم انتم وش اسوي.. ابي حل تكفووون :(