رمضان مبارك ع الجميع , وتقبل الله منا ومنكم صالح الاعمال
حوائيات زمان عنكم شلونكم ,, المهم مواضيعي مرتبطة ببعض عشان كذا بادخل بالموضوع سييده
للناس اللي يحبون المختصر :
لو أكثر من مرة يتأجل زواجك ولأسباب بسيطة هل تصبرين عليهم وتقبلين تتزوجين بأي وقت حتى لومايناسبك ولا يناسب اهلك رغم علم المعرس واهله بهالموضوع
وإلا تكنسلين الموضوع بكبره وتريحين راسك ؟
مع العلم ( إذا كنت تعديتي ال30 وماتنخطبين ) ؟
سبب السؤال بالتفصيل ( للناس اللي يحبون يقرون تفاصيل تفيدهم )
:قلت لكم من فترة طويلة إني انخطبت واخواني ماكانوا يبونه المهم تمت الخطبة والنظرة الشرعية على خير
والتحاليل والحمدلله , وهالكلام من قبل 6 شهور تقريباً أوأكثر
المهم كان ع أساس الملكة تكون بشهر 6 والزواج بشهر 10 بس رجعوا اجلوا الموضوع قالوا بشهر 8 الملكة
والزواج ب11 أو 12 بالكثير , ولما جا شهر 7 قالوا مايقدر عنده التزامات مالية ومادري وشو
خلاص بشهر 9 تتم الملكة ويتحدد الزواج وهالكلام كله امه اللي تجي تقوله يعني هو وابوه مالهم حس
المهم بشهر 8 اعتذرت عنه انه مايمديه لا بشعبان ولا برمضان خلاص بشوال
هههههههههههههههههههه المهم الموضوع كله اعتذارات
وحنا عندنا قروب واتس آب لبنات عائلتنا كلهم من ضمنهم اخته وبنات خالاته وامس بالليل سواليف البنات
فسألت بنت خالته عن زواجه اللي هو زواجنا ع اساس انه كان بشهر 10 , ردت اخته بدون ماتستحي اني وخواتي معهم وانه ماعندي خبر بالمستجدات
وقالت تو ماتحدد بس الملكة يمكن تكون بشهر 11
والزواج بشهر 2 أو 5 يعني بأسبوع الاجازة بواحد من هذيلا الشهرين
انا هنا عصبت وتنرفزت يعني تخططون وتقررون ع مزاجكم وانا واهلي كأننا جماد
والسبب اللي زعلني انه عندهم خبر اني مااقدر اتزوج بأوقات دوامات اولاً لأن خواتي كلهم خارج المدينة اللي حنا فيها
يعني مافيه بالبيت غير أنا وأبوي الله يخليه لي وهو كبير بالسن وهم بعد ساكنين بمدينة غير مدينة اهلي ,
ولا عندي ولا احد يساعدني بالتجهيز وامي متوفية الله يرحمها
يعني ابسط شي مثلا لو باروح للسوق لازم احد يجلس عند ابوي واذا رحت مستحيل اخذ اكثر من 3 ساعات
وتحضيرات الزواج يبيلها وقت , هذا غير انه مستحيل يمديني اجهز بشهر لو اني ريبورت
الانتظار صعب تحسين نفسك معلقة
والحين استخرت واتخذت قرار اني ارسله اعتذر ماابي اتزوج ورحت خذيت رقمه من جوال اخوي ,
وفعلا احس هالقرار هو الصحيح بعد وفاة امي ابي اجلس مع ابوي ماله غيري يخدمه ومابي انقل مدينة ثانية واتركه
بس مترددة خايفة من ردة فعل ابوي لو عرف اني سويت كذا , واهلي وعواقب هالفعل
بتقولون اكلم ابوي , ابوي رافض مره يكلمهم يقول عيب ومابيهم يحسبون اني بايعك عليهم
واخواني اصلا من البداية مايبونه وع قولتهم شايلين يدهم من الموضوع
آرشدوني .. ومشكورات مقدماً والله يعطيكم العافية
ولو به أخطاء سامحوني صايمة والضغط عندي واصل حددده