لو تقدم لج .... من راح تختارين ؟!!

السلام عليكم ورحمة الله وبركاته

بافتراض انج بنت عمرج 20 سنه فقط وتقدم لج كل اللي راح تقرين عنهم الحين للزواج
..
ياليت كل وحده تعطيني رايها وتقول هي راح تختار من وليش ..

الأول :

واحد عمره 23 سنه ويحبج من 8 سنوات يعني من صغره ويتمناج اليوم قبل باجر ، في دينه محافظ على الصلاه بار بوالديه ولكنه احيانا يسمع اغاني واحيانا لا ..يعني متذبذب يفكر كثير في الالتزام ولكن للان الله ما هداه للالتزام الكلي اقصد وده يصير (( مطوع )) لكن نفسه تغلبه في بعض المرات ..

مستواه التعليمي جامعي وله وظيفه محترمه وقادر انه يكون لج بيت ما شاء الله ملك بأسرع وقت ممكن
كان يكلم بنات بالتلفون بالسر طبعا يعني البنات في حياته ينعدون على الاصابع وهذا حال كل اخوانه اللي من تزوجوا الحمدلله تركوا البنات لانهم جادين في الزواج وهو مثلهم لانهم يقدرون الزواج ويخافون الله في بنات الناس لا تزوجوهم

مشكلته اهله .. هو ضعيف الشخصيه جدام اهله واهله مش كلهم موافقين على زواجه منج ولكنج عارفه لا تزوجتيه ما راح يضايقونج ولا راح يخربون حياتكم لانهم يخافون الله لكن راح تحسين بفرق بسيط في المعامله بين كل حريم اخوانه .. ولا تنسين انج راح تعيشين في بيت منفصل عنهم .. وهو عارف ان اهله غلطانين وما يقدر يقول لهم شي لانه اصغرهم لكنه يموت فيج ولا يفكر يأذيج يعني لو امه او ابوه غلطوا عليج ممكن يواسيج لكنه ماراح يتكلم جدامهم بشي



الثاني :

واحد عمره 26 سنه ، تعليمه ثانوي ، يحبج ويتمناج زوجه له ويحاول يحقق هالشي بأي طريقه
أهله يحبونح وشارينج ولا تزوجتي معزتج عندهم مالها حدود ..

اما هو انسان ما عرف الالتزام واقل شي الصلاه ما كان يحافظ عليها ، قدر الله انه يحبج وعلى كثر ما سمع او عرف عن التزامج حبج اكثر واكثر وشافج المخلص له من الماضي .
نفسه تتمنى الرجوع لله وبدا يحاول ويجتهد من نفسه .. اهتم بالصلاه وحافظ على كل اللي ما كان يحافظ عليه
لكنه يحس انه لا تزوجج تقرب من الله لانج راح توجهينه في الدين وهو يسمع منج ويدري ان انتي مستحيل تخلينه يسوي شي حرام وهالشي اللي يبيه واللي تزوجج علشانه ، يعني يبيج تعينينه على الدين وهو محتاج هالشي بقوة وبرغبه من نفسه لانه مل اللي يعيشه ويحس بتأنيب الضمير ومحتاج لاحد ياخذ على يده ويربيه على الدين من اول وجديد وتوه جديد في التوبه والله اعلم باللي كان يسويه قبل

موظف في وظيفه محترمه والدخل فيها جيد جدا وولد عايله كبيره في البلاد ..

مشكلته راح تعيشين في ملحق في بيت اهله وفي مدينه تبعد عن مدينتج ساعه اقل شي ..


الثالث :

واحد عمره 23 سنه .. سمع عنج بالصدفه .. ومن كثر اللي يسمعه تمناج زوجه له .. تقدم بصورة تقليديه يتمنى موافقتج عليه لكن طبعا لو ما تمت الموافقه ما راح تكون خساره كبيره له لانه ما عرف عنج الا اللي سمعه ولكنه في نفس الوقت يتمنى القرب منج لانه يظن انج العروس المناسبه له
ملتزم او (( مطوع)) من يوم ما كان صغير تربى على الدين ، يعني البنات في حياته اخواته وبس .. عمره ما عرف بنت او كلم اي بنت ، انتي راح تكونين اول بنت في حياته واول حب
مستواه التعليمي جامعي موظف وراتبه جيد جدا وله مستقبل ان شاء الله ممتاز في الشغل
اهله طيبين وايد ومالهم شغل فيج ابدا .. حتى لو مرضتي احتمال ما يتصلون عليج .. يعني من كثر ما هم مخلينج في حالج باردين حتى في الواجبات اللي ممكن تعني لج الكثير ..
لكنهم مسالمين ومخلينج في حالج
راح تسكنين بروحج .. لكن مش في بيت لانه للحين صغير على تكوين البيت والبيت هالايام يبي له دخل عمر كامل ... يعني تصبرين معاه في الايجار كم سنه لين يفرجها الله

راح تنحرمين من اشيا كثيره ممكن تسوينها لانه يبي يسحبج معاه في الدين ويعلمج اللي ما كنتي تعرفين مثلا لا تلبسين كذا ولا تسوين كذا ، حتى طلعات مع صديقاتج مثلا ممنوع لكنه ما يمنعج من زيارتهم في البيت او الاعراس او مكان تجمع نسائي مثلا لكن مطاعم وغيره ممنوع
يعني هالمشكله الوحيده اللي ممكن تواجهج معاه الى جانب برود اهله ..


الرابع :

واحد عمره 34 سنه ، التزامه يتلخص في محافظته على الصلاة وله رغبه في تعلم الدين وبار بوالديه جدا ، منفتح بسبب طبيعه تربيته يعني فري شوي ومن حبه لج بيخليج تسوين اي شي تبينه لانه يشوفج صغيره وايد ،
ارتكب في صغره الكثير من المحرمات من شرب خمر وزنا والعياذ بالله ولكنه تاب توبه نصوحا وكره ماضيه من ست سنوات تقريبا حتى انه يستحي يرفع عينه في وجه وحده مرت من عنده ولا عاد يكلم بنات من ذيك الفتره ، يحس انه كبر وان العمر راح عليه .. كله ذكريات قديمه تعتبر تعذيب بالنسبه له ، يحبج حب مش طبيعي .. متعلق فيج بصورة مش طبيعيه لانه يشوفج الامل اللي يرد له حياته او احساسه بمعنى الحياه .. انسان انطوائي يتمناج ومستعد علشانج يضحي بكل شي ويشوفج مثل بنت صغيره له مش زوجه .. له بيت مستقل ودخل ممتاز جدا جدا واملاك كبيره تغنيج طول العمر .. من عايله كبيره معروفه

المشكله هو كثير السفر وناوي ياخذج معاه وتعيشون بالغربه على حسب ظروف عمله وين يكون
اهله احتمال ما يتقبلونج معاهم ضمن العايله لانهم كانوا يتمنونه ياخذ وحد من اهله .. وامه معتمده عليه اعتماد كبير حتى لا نامت بالمستشفى لانها مريضه تخليه يظل جنبها طول الليل واليوم ..

وهو متعلق فيج وما وده الا يتزوجج انتي ولا عليه من اهله او اي احد ثاني حتى لو ما وافقوا ومستعد يسوي المستحيل بس يتزوجج لانج تعتبرين بالنسبه له الشي الكبير. انطوائي وزواجج منه حياة بالنسبه له ورفضج اكبر خساره له في حياته


ادري طولت بس حبيت اعطيكم ايجابيات وسلبيات كل واحد بدقه وضمير علشان تحددون موقفكم ..

اتمنى اني القى اجابات صريحه اي واحد راح تختارين من بين هاذيل
وملاحظه اخيره انا ما ذكرت صلة القرابه لبعضهم والسبب لحاجه في نفسي وصلة القرابه ما تأثر في الموضوع ابدا ابدا لان الزواج عندنا عادي سواء من القريب او الغريب

والسموحه