محل تاريم خشب قوي وممتاز مرررررره
على طريق الملك فهد بيكون قبل تقاطع العروبه بيجي على يمينك
والوان الجدار وش رايك كل جدار لون ويكون كل لون فااااتح مرررره
مثل غرفتي مره احب الوانها وهاديه ومريحه للاعصاب
حطي اكسسورات والعاب بسيطه وماتكون زحمه

مشكوره على رايك ماشي الحال

وعموما بمر تاريم واشوف

ولكن انا افضل التفصيل اختي لاني ابي دورررين

هلا بك

انا امر باللي تمرييييين فيه بالضبط

احوس الحين بغرفة عيالي وهم ولد وبنت

واللي توصلت له ورسيت عليه للحين
1-الارضية بلاط خشبي ,,, ادفا من السيراميك الاملس وهذا انا مجربته
واحسن من الفينيل لانه يتعرض للتمزق لو طاح عليه شي حاد او بتدفين السرير وهذا اللي صار مع اختي,,, ولو بينكب موية او عصير بيطلع لك ريحة
والفرش صح انه ادفا وآمن اذا طاح شي او هم طاحوا ,,, بس الوسخ متعب ,,, الا اذا عندك خدامة تساعدك في التنظيف والفرك


2- البوية وبما انهم ولد وبنت فاخترت لون محايد الاخضر الفسفوري بس هادي ومطفي مو فاااقع
والسقف جبس ابيض فيه حركة طفولية مثل اشعاع الشمس بيكون لونها برتقالي


3- السرير بيكون سريرين داخلين ببعض ,,,,,, افضل من الدورين وآمن
وهي مثل اللي تفتحين درج اسفل السرير لكنه كامل وعيه سليب هاي
وله صور في المنتدى ,,, انا اخذت الفكرة منه
بس للان ما ادري اذا فيه جاهز اريح واضبط من التفصيل
او بضطر افصل لهم
ولازلت محتارة باللون هل اخليه ليموني او ابيض


وهذا اللي عندي الان وممكن يفيدك

كتبت رد وطار من بنتي

بعيده بعد شوي <<<وجه مقهووووووووور

هلا حبيبتي
انا كنت اقصد لون الجدران اخضر (يعني مثلا ورق جدران اخضر او اصفر) اما الاثاث لون الخشب افضل للغرفه ويناسب اي لون فيها ..