لو كنتي بهذا الوضع ايش تختارين .. إستشاره

السلام عليكم ورحمه الله وبركاته

بما ان أول الحزم المشورة وانا جد محتاره وحيرت اهلي معي

لكن انا مؤمنه ان إذا صدأ الرأي أصقلته المشورة

وانتوا هنا امهات وحوامل وماراح القى احد يعطيني رايه بحكم خبره مثلكم

ماراح تخسرين شي اذا كتبتي رايك ولك دعوه مني بالحرم ان شالله

يمكن الموضوع يكون تافه لكم لكن مهم عندي

انا خلفت الحمدلله بنت و ولد والحمدلله

البنت عمرها 8 سنوات ثالث ابتدائي و الولد 5 سنوات في الروضه
وانا عمري الان 25 وزوجي 30 انا باول سنه بالجامعه وزوجي موظف بسيط ادعوله يتعين باسرع وقت :44:


مثل ماانتو شايفين عيالي كبروا وصار موضوع الطفل الجديد سيد المواضيع
سواء من العيال او من ابوهم الي يتحمس مره ثم يتردد وانا مثله

الاشياء الي تخليني اتردد

دراستي ماراح اضمن النجاح وانا عندي مولود

احس بيصير عيالي كثير وبنات جماعتنا وسلفاتي اكبر مني عندهم من واحد ولايفكرون يجيبون وانا اخاف ينتقدوني واقعد اقارن نفسي فيهم بدون مااحس لانهم يتدخلون ودايم يكلموني عن الموانع كل ماجبت طاري حمل يحسسوني كني مخلفه 9 اخوه الكبير مثلا عمره 35 وبنته 5 سنوات وتوهم يفكرون بطفل ثاني

فهم ينتقدوني الحين فما بالكم اذا جبت ثالث وانا اتحسس من قرقهم خصوصا ان تاثيرهم كبير على ام زوجي الي ماتقصر فيني


اهلي وخواتي يقولون خلصي دراستك يكفي السنين الي ضيعتيها واثنين حلوين بعد 3 سنوات تتخرجين وعمرك لسى 28 او 29 يمديك بالراحه
بس عيالي هيكونوا 11 و 8 يكبرون ويصير الفرق كبير

حالتنا الماديه محدوده
انا عندي غرف بالبيت فاضيه بدون اثاث واذا حملت مستحيل ان تتاثث قريب
علينا قرض يخلص بعد 4 سنوات والقرض كبير ياخذ 40% من الراتب يبقالنا حول 3800 فقط
البيت ايجار الي ساكنته مليان اعطال و المويه يقطع فيه ويبيلنا ندور بيت جديد والايجارات هنا
اربع غرف بالفين وبيصير ضغط اكثر

بالاضافه ان زوجي متردد
يتحمس وبعد شوي يقعد يحسب الراتب و المصاريف ويشيل هم مره

احنا رغم ان كل الظروف تقولي نأجل الموضوع

لكن احنا ودنا مايكون الفرق بين العيال اكبر من كذا
ووجود طفل صغير بالبيت شي مشتاقين له خصوصا ان بنتي مره متحمسه وتترجاني واخوها زيها وانا ودي وما ودي و زوجي بعد

حياتنا مستقره لكن
العائق المادي راح يتعبنا
اولادي اذا شافوا شي عند بنت او ولد اعمامهم يبغون مثله وغالبا يكون غالي وناخذها مداراه ولا نظطر نجمع الين ناخذلهم فما بالكم بطفل جديد اكيد هنقصر عليهم ماديا مظطرين


اهل زوجي راح يعصبون لان عليه قرض ولان ماعنده بيت ملك و لاوظيفه ثابته
ويقارنونه باخوانه حتى الي اصغر منه عنده شقه تمليك والبقيه بيوت ماشالله
فهم يبغونه يعدل وضعه المادي وبعدين يجيب عيال

وانا حاسه ان وضعنا ماراح يتعدل قريب
مو معقول انتظر 5 سنوات مثلا وضعنا يتعدل وبعدين القي نفسي الثلاثين
واجيب بنت ويصير فرق بينها وبين اختها 12 سنه او ولد بينه وبين اخوه 10 سنوات
احس تاخرت بما فيه الكفايه
وزوجي يقول نجيب الثالث وخلاص بعدها نطول

واحنا مانهتم بالفلوس قد مانهتم بوضعنا العائلي نبغى عيلتنا تكبر شويه
واحنا قنوعين جدا بحالتنا و في حياتنا بركه رغم قله الماده والحمدلله



مدري يابنات وشرايكم
انا عندي ذهب وفكرت ابيع منه عشان مصاريف المولود ويمكن ربي يسوق رزقنا بقدومه
وزوجي يقول نجمع من الان مبلغ بسيط عشان نقدر نجهزه كويس
خصوصا ان الهدايا تكون شوكلاتات غالبا ومافي هدايا فلوس او ادوات للطفل تساعدنا
فمظطرين نعتمد على انفسنا ونجمع

لاتحرموني من ارائكم تكفون محتاجه مشوره
وانا اعطيتكم وضعي بالكامل
وش المناسب برايكم