لو كنتي مع زوجك كيف تتصرفين

السلام عليكم حبيت اخذ رأيكم بشغله طبعا تدرون ان الحريم الان ماسكين اغلب الاماكن سواء باستقبال المستشفيات او الاسواق واغلب الاماكن صار اللي يشتغلن فيها حريم وللاسف الشديد ان اغلبهم ماتتعامل زين مع المراه اللي مثلها يعني لو شافت حرمه كنها شافت عدوتها طبعا لاتجي وحده وتقول ليه تعممين انا ما اعمم لكن الاغلبيه من الموظفات النساء اخلاقهم بخشومهم وبعد ماكانوا الحريم يطالبون بتأنيث المحلات قبل كم سنه الحين اغلبهن صارو يشتكون من سوء تعامل الموظفات وان الرجال كانو خدومين وخلوقين اكثر

وين ماتروحين تلقين الحريم الموظفات منفسات ويالله ترد عليك ولا تشيلك وتحطك بعيونها كنك ضرتها

والاسوء بعضهم تتمادى مره وتبدأ تتجاوز حدودها وتتعامل معك بطريقه بايخه مثلا تبدأ تستهزأ فيك او بأسلوبك او بطريقة تفكيرك وانتي تكونين جاده مره لا مزحتي معها ولا ضحكتي ولا طيحتي ميانه انتي تعامليها بحدود عملها وهي تتمادى تبدأ ترمي عليك كلام او تتمسخر عليك هذا وانتي بحالك مجرد سألتيها هذا بكم او هذا وين او ابي الدكتور الفلاني تحسينها بس تبي تنفس عليك لمجرد انك حرمه زيها
المشكله بعضهم تتعامل بهالاساليب حتى بوجود زوجك وبمسمع منه او اخوك ! مافي اي احترام لان اللي معك رجال ولا احترام لك وانتي حالك من شأنك تتجرأ ترمي عليك كلام قدام زوجك مدري شلون تجيهم هالجرأه ومو بس انا شفت كذا وحده قدامي الاحظ مايحترمونها حتى لو زوجها او اخوها معها بالعكس بعضهم تستلعن لو كان معك رجال مدري وش يحسون فيه
ولو انك اخطيتي او طيحتي الميانه معها نقول معليش لكن تتعاملين معها بحدود عملها وهي تتجاوز هذه وش تسمينها؟


ارجع واقول مو الكل لكن الاغلبيه صراحه من الموظفات الحريم ماتعرف تحكم عقلها وقت الشغل ولاتقدر تفصل بين الشغل وشخصيتها وتتعامل معك بنديه اوتاخذها تحدي او فرض شخصيه وبالذات لو شافت معك اخوك او زوجك تزيد حالتها مدري هي تسوي شطاره او وشو بالضبط؟

وبهالحاله وش التصرف الصح معها؟ ان سكتنا قهر لان هي الباديه والمتجاوزه وان تكلمنا نخاف يتطور الموضوع لما لاتحمد عقباه واللي جرأها عليك بدون سبب اكيد بيخليها تتجرأ اكثر لو حاولتي تراددينهاوصعبه تصير هوشه خصوصا لو معك رجال لكن بنفس الوقت يوم تفكرين انتي بحالك ولا سويتي لها شي وهي تتعمد تستلعن معك واخرتها تضطرين تسكتين حفاظا على كرامتك مما لاتحمد عقباه
ولو عندك مواقف صارت لك اذكريها لنا والله يحفظكم من كل مكروه