لو كنتي مكاني وش تسوين؟

وش رايك في هالموقف ولو كنتي مكاني وش بتسوين ؟؟؟
لما رحنا لمكة طبعا مع أهل زوجي ومعانا خالته ومرت ولدها وبنتها (كبر أم زوجي )وبناتها وعيال بنتها (حملة كنا رايحين في باااص ويالله خذنا )كنا قبل نروح متفقين أنا وزوجي وأهله نسكن في شقة وخالته وبناتها في شقة كلم زوجي صاحب العمارة وحجز لنا شقة لما وصلنا نزل بعضنا للحرم يعتمر وبعضنا راح الشقةوقعد عند البزورة لحد ما يخلصوا السالفة وما فيها بعد ما خلصنا عمرة ورجعنا للشقة نرتاح .........خالته وبناتها ما استاجروا لهم مع ان معها ولدها ومرته وقعدوا عندنا طبعا احنا اللي مستاجرين وما نقدر نقول طلعوا وهي أخت أم زوجي المهم ضغطنا على أنفسنا صرت أنا وأخوات زوجي في غرفة وخالتي وأختها وبنتها في غرفة وبنات بنتها في غرفة والرجال في غرفة
استحملنا وقلنا معليش (زوجي وأخواته تضايقوا مو بس أنا )بعد كم يوم والاخالته تدور على شقة ثانية تقول هذي أجارها غالي نبغى وحده أرخص ولقت شقة ما فيها الا ثلاث غرف وحمامين واستاجرتها بدون ما تشاور الرجالة وجت للبيت وعفستنا عفس راح زوجي وولد خالته وشافوا الشقة وما أعجبتهم لأنها ما تصلح للاستهلاك الادمي فرفضوا وقالوا ندفع زود على أجار الشقة ولانطلع عصبت الحرمة وقالت كلااام يجرح واللي مو عاجبه يطلع (فشلت ولدها )على بالها بتدفع شي من جيبها بعد ما قعدت تدعي وتهين ووووووووو.....الخ وافقوا الرجال وحملنا العفش ولما وصلنا الشقةوشفنا المنظر طفشنا منها اللي راح الحرم واللي خذ عياله وطلع الشقة وسخة وغرفها صغيرة مرة وبنتكوم كلنا فيها (يجي عشرين نفر في غرفة ببزارينا)والشبابيك قريبة من الارض اللي عمره سنه يطولها وما تتقفل صراصير وحشرات وروائح الله يكرمكم
نجي للسالفة(كل هذا وما بعد بدت السالفة )أنا يوم شفت الشقة إرتعبت وخذيت عيالي وطلعت من العصر ما أبغى أرجع الشبابيك تخوف زود على القرف
لما جاء بعد العشاء أرسلت رسالة لزوجي إني ماني راجعة لها الشقة ويدور لي غرفة (لأول مرة تجيني الجرأة من تزوجت)والا راح أنام أنا وعيالي في الحرم المهم بعد مشادات كلامية بيني وبينه هو مقتنع بس العلة وش يقنعها
بعد صياح و......وافق وهو كاره خوفا من العواقب المهم رجعت للشقة آخذ أغراضي عقب ما نامت العلة لقيت أم زوجي صاحية شرحت لها موقفي وتفهمت مع انها خايفة وقالت استحملي كلها كم يوم ونرجع ودعتها وطلعت خذنا غرفة في فندق طبعا هذيك الليلة زوجي ما كلمني سوا روحه نايم ومن بكره طلع من صبح من الساعة ثمان ولما صحيت أنا والعيال ما لقيناه استنيته يحيب الفطور ما جاء دقيت عليه جاب الخبز ولما شفت عيونه انصدمت كانت حمراء مبين عليه انه كان يبكي لما سألته وين كنت قال كنت أفطر عندهم طبعا الساعه 12 وهم عادة يفطرون الساعة 8 ماحبيت أتكلم معاه (عرفت بعدين إنها مهزئته وقايله كلام يغث)وهو طالع قالي جهزي شنطتك بنرجع الديرة بعد الصلاة ؟؟؟؟؟؟؟؟
جهزت أغراضي ودق علي بعد الصلاة وقال تعالي شقتهم نتغدى قبل نمشي رحت على نياتي بودعهم والا ولد المرة ومرته بيردون معنا
ولما دخلت الغرفة اللي كانوا مجتمعين فيها استقبلتني بالكلام الجارح والسب والشتم واللي فيك ومافيك وانتي من طالعة عليه امك وش حليلها واللي ما يبي اهل زوجه وش ينبغى به وانتي فشلتي زوجك ونزلتي كلمته للارض وصغرتيه في عيون اهله وما إلى ذلك من أنواع السب...........
طبعا قعدت أصيح مدري وش أقول أنا ما طلعت لأني مابيهم صح ودي نكون لحالنا بس ما كان هذا قصدي بالعكس كنت طالعة بسبب الشقة وطبعا خالتي موجودة وسمعت كل اللي انقال بس كانت منسدحة ومغطية وجها زعلانه ما أدري مني والاعلي مع اني مخبرتها اني بطلع ما قالت ولا كلمة ما قدرت أدافع عن نفسي قعدت أصيح وبس (الغرفة مليانه واللي في الشارع حتى سمعها) فشلتني قدام أهل زوجي ومرت ولدها والحمولة طبعا ما بقى أحد في الديرة ما يعرف السالفة
هالحرمة وعائلتها أول مرة أسافر معهم ومابيني وبينهم علاااااقات لا حلوة ولا مرة بس بعد الموقف خلااااص حطيت عليها اكس
على فكرة كل سنة نروح مع أهله ونقعد معهم يعني هذي أول مرة أطلع للأسباب اللي ذكرت