لو كنت مكاني تتكلمي وألا تسكتي؟؟؟

إيش رأيكم أتكلم معاه وإلا اسكت؟

حبايبي بنات حواء راح أحكي لكم حاجة مضايقاني
وأتمنى تعطوني من وقتكم شويا وتقولوا لي رأيكم

اسمحوا لي أفضفض شويا و أحكي لكم حكاية زواجي :
داك اليوم اللي أتغيرت فيه حاجات كتيرة في حياتي
خطبني قريبي وكان يدرس برا والمفروض إنو أنا أسافر معاه بعد الزواج لحد ما تنتهي دراسته لكن بسبب ظروفه المادية وظروفي الدراسية ملكنا وأجلنا الزواج لحد ما يرتب أموره وبعدها يجي ونتزوج ونسافر
(صحيح إنو الغربة صعبة لكني كنت أحب السفر والمغامرة واكتشاف الأماكن الجديدة)
لكن اللي صار إنو فيه ناس (ماراح أحددهم حتى ما أظلم حد) اقنعوا زوجي بأن سفري معاه راح يكون عقبة وممكن تتعثر دراسته وصاروا يقولوا له راح تعيش طول عمرك مغترب؟؟؟؟ حتى قطع دراسته ورجع مع إنه مابقي له غير فترة بسيطة وينتهي لكن ما أقول غير حسبي الله على اللي كان السبب

ولما رجع واشتغل حددنا موعد الزواج اللي يسمى فرحة العمر!!! ، لكن صارت حاجات تانية ما كانت في الحسبان أولها و أهمها إنو أمي خاصمتني وقاطعتني من غير سبب وكل مرة تختلق سبب للزعل وأنا حيرانة معاها مش عارفة كيف أرضيها ؟ وهذا الموضوع لوحده شاغل بالي لحد اليوم

ثانيها : إن من عوايدنا إن أهل الزوج (على الأقل أمه وأخواته) يقدموا لزوجة ابنهم هدية بمناسبة الزواج وغالبا تكون ذهب لكنهم الله يسامحهم ماقدموا لي ولا حاجة.

ثالثها: كنت أتمنى زي أي عروس أسافر سفرة عسل لكن تقديرا لظروف زوجي كانت سفرة بسيطة كم يوم ورجعنا.

رابعها : كنت متعودة في بيت أهلي إنو نسافر عمرة على الأقل مرتين في السنة لكن بعد الزواج اتغيرت الحال حتى طلبت من زوجي أروح يومين عمرة مع أخويا على حسابي لكنه رفض!!!

أنا دحين حامل ومن عوايدنا إنو الزوج يهدي زوجته هدية بعد الولادة ويسافروا وزوجي يلمح إنو ميزانيته ضعيفة!! ماراح استعجل لكن إحساسي يقول إنو ماراح يجيب لي هدية و ماراح يكون فيه سفر.

كمان أحس إنو أهله ماراح يجيبوا لي هدية

هاذي بعض الأشياء اللي حصلت وأنا أحاول إني أبين مش متضايقة لكني مش قادرة استمر إيش رأيكم : أسأل زوجي ليش أهلك ما أدوني هدية؟؟؟ بسراحة إنا مو في حاجة لهداياهم لكن الهدية دليل المحبة حتى لو كانت بسيطة.
وليه ما نسافر زي العالم والناس ما تسافر؟؟؟؟
يعني حتى لو ما عندو ممكن اتصرف وأجيب فلوس لكنه يرفض!!!

ممكن بعضكم يقرأ حكايتي ويقول إنت مكبرة الموضوع
لكن اللي يخليني أتسآئل إنو أمه لما اتزوج خاله تقول كان عندي طقم ألماس عزيز عليا أهديته لها
يعني إيش فيها لو قدموا خاتم أو حاجة بسيطة ؟؟؟؟؟؟؟؟!!!!!!!!!!!!

الله يسعدكم ردوا عليا

شاكرة لكل من تتفضل بالرد