لو مكاني رحتي ولالا

السلام عليكم
اخو زوجي ملكته بعد يومين بياخذ بنت خالتي بالشرقيه ساكنه واحنا بالرياض
بيسافرون بكرا 
طبعا خالتي حاطه ملكة وعازمة كل خالاتي وبناتهم
وامي اعتذرت عشان صعبه سفر وخط وقالت نعوضها بالزواج
كانو سلفاتي بيجون مع ام زوجي بحكم ان خالتي مناديه خالاتي قالت ام زوجي بجيب حريم العيال ثنتين غيري
ودقت خالتي تحدد معهم يوم الملكة وقالت ام زوجي احنا راح نجي مع حريم عيالي 
قالت خالتي حياك الله بدون حريم العيال حريم العيال حياهم بالزواج 
لان الملكة بسيطة ومافيه غير خواتي 
المهم مو هنا السالفه 
السالفه زوجي 
انا كانت خالتي قايلتلي ابيك تجين ملكة بنتي انتي بنت اختي وماتعتبرين من حريم العيال 
وانا قلت ابشري وبجي وتجهزت 
المهم بعدها حسيت ان مالي خلق وخصوصا ان سلفاتي اعتبرهن مثل خواتي وكان ودي نكون كلنا سوى ومابي اكون الوحدي 
قلت الزوجي يافلان تصدق مالي خلق بالروحه
توقعت يقول لا لازم عشان امي تكوني معها وماتكون وحدها 
الا اتفاجئ يقولي 
على راحتك واذا ماتبين كيفك شي راجعلك حتى انا اشوف مالها داعي روحتك بس مااقدر اقولك خفت تزعلين
قلت من اي ناحية مالها داعي وكان ع الجوال منشغل قال مدري كذا احس مالها داعي هذي ملكة مو زواج وبالغالب الافضل تكون خاصه حتى لو خالتك قالت تعالي من باب المجامله لانك بنت اختها بس هي بالحقيقه تلاقينها ماتبي اي احد من طرف الرجل الا امه وانتي لك الحرية تبين تروحين أهلا وسهلا ماتبين براحتك بس منتي مجبوره ولك الخيار 
ودخل ينام 
انا هنا بجد بجد ترددت 
انتم وش رايكم بكل صراحه لو مكاني وش اخترتو 
تروحون ولا تخلونها مره وحده بالزواج لانها بنت خالتي بتسوي عرس بعد كم شهر كبير