لية ياأمي وجدتي (أم ابوي ) الله يسامحكم / للمناقشة ...

السلام عليكم ورحمة الله وبركاتة ...

صباح / مساء
النور والسرور...


اليوم بفضفض عن موضوع ( القطاعة 
والجفا بين الاهل أو بالأحرى بين 
اولاد الولد واهل ابوهم ) 
*_ليه نعلم عيالنا هالصفة السيئة ؟؟؟

وكل مالها الكورة تكبر !!

لية كذا !!!

يا.......
جدتي ،، أمي ،، بنتي ،، أختي ،، بنت أختي ،، بنت أخوي ،، ولا ننسى زوجة الأبن بعد...

أيييش بتستفيدون !؟؟؟

ليه يالجدة : 
تحبين بناتك وعيالهم وتدللينهم 
(ويادهينة لاتنكتين )..
وتكرهين زوجات عيالك وعيالهم 
ولا تحبين طاريهم
فبكل تأكيد
حتى زوجات عيالك وبناتهم بسوون نفس العمل لك !!!!
««والأدهى والأمر لما تجي تفضل عيال 
ولد عن ولد ثاني ...

وأنتي ياالأم :
تعلمين بناتك وعيالك يحبون أمك وخواتك
ويعيشون مثل الغرب مع أهل أبوهم وتكرهينهم فيهم ولاتخلونهم يحتفلون معاهم ويبشرون أهل أبوهم بتفوقهم ونجاحاتهم وخطوباتهم وزواجاتهم ..

هاكم مثال:
-ايش يكون شعوركم لو بنت أخوكم ولا ولد أخوكم يخطبون ويملك ويحددون الزواج 
وجدتهم وعماتهم يعرفون السالفة من الناس
أو
-هلا أم فلان مبرووووك على ماسويتوا 
-الجدة هلا والله على ايش تباركين ؟
ــ أفا ماعندك علم بنت ولد أو ولد ولدك تملكوا وفي بيت ولدك حفلة وأنتي ماعندك علم !!!!
( مو قوية تحسونها أن الجدة آخر من يعلم )

وبعد مايتزوج ولدك زوجته بتسوي نفس ما سويتي بجدة عيالك..
(الله يمهل ولا يهمل)

وأنتي يهالأخت
ليه يكون دلالك وحبك لعيال خواتك 
وتكرهين عيال أخوانك ؟؟؟؟ 
مثلا تكرهين أخوك ولا زوجة أخوك وعيالهم  هم الضحايا وش ذنبهم بالله ؟؟!!! 

هاكم مثال : 
أن العمة تسوي حفلات نجاح وهدايا 
وألعاب لعيال وبنات اخواتها وعيال الأخ لا 
مسااكين ينااظرون فيهم 
والقلب بة غصة «« مساكين البزران 
ماينسوون الجروح ...


-وبنتي ،، بنت أخوي ،، بنت أختي-

ليه ماتقدرين تجمعين حبك وولائك وأحترامك  
لأهل أبوك وأهل أمك بدون زيادة عند أحد ونقصان عند الثاني ...
ليه تحبين جدتك أم أمك وخالاتك وبنات خالاتك
وتحبين يشاركونك  فرحتك عند التفوق ،، التخرج ،، قبول الجامعة والتخرج منها ،، الخطبة والملكة والزواج والحمل والولادة ..... 

وتخفينها على جدتك أم أبوك
 وعماتك ولابنات عماتك
وتاخذين النصائح اللي مو حلوة من أمك وأهلها وتنفذينها على أهل أبوك
مثل:
لا تعلمينهم عن تفوقك ولا خطبتك ولا ولا علشان ما يحسدونك بعينهم الحارة
(استغفر الله )
أرجوك يا بنتي ،، بنت أخوي ،، بنت أختي
بكذاالناس تقول عن أبوك مو رجال لو قاطعتي أهله وخليته أنتي وأمك يمشئ وراكم ،
الأم تحبينها وتسمعين كلامها وتحترمينها
بس تحرضك على القطاعة لا والف لا 
وهذا قبل كل شي مايجوز
والكل عارف الاحاديث عن وصل وقطع الارحام !!

وأخيرا:
زوجة الأبن
تعلمين عيالك من صغرهم على قطاعة أهل أبوهم من جدتهم وعماتهم وأعمامهم وعيالهم
تقوليله ( شوف ياولدي لاتروح لهم ولاتسلم عليهم ولاتخالطهم ولا تخالط عيالهم هذولا مايحبوننا ولايحبونك سووا فينا كذا وكذا و..... ) تعلمينه على القساوة  والجفا من صغرة ، وانتي وش جنيتي غير التربية والذنب بالاخرة ...
وللبنت ( لاتسلمين على عماتك وبناتهم 
ولاتسولفين معهم - ولا ذوق اهل ابوك يفشل 
- انتي بنت فلانة بن فلان احسن منهن كلهن لاتماشينهم انتي مو من مستواهم- اذا روحتي لهم لاتغلطين بشي وتعلمينهم 
بشي يخصنا ، وتلاقين البنت لارجعت 
من بيت اهل ابوها تصير معاها الام المحقق 
كونان ) 
* ليش ماتعيشون البساطة في الاخلاق 
والتعامل ليش ماتخلونا نضحك وننبسط 
مع اي من كان اهل ابوي ولا اهل امي 
وانتم يااهل ابوي لية ماتحبونا وتحنون علينا
وتحسسونا انا قطعة منكم وغالية عليكم ؟؟؟
عشاان امي ولا ابوي بينكم وبينهم سوء تفاهم او مشاكل ««وش ذنبنا احنا ...

أسمحووووووولي على الخربطة الزايدة
مجرد فضفضة ( ماتخص واقعي بتاتا والحمدالله ) بس اشوفها في بيئات كثيرة ...

اذا عجبتكم فضفضتي ادعولي ربي 
يشفيني ، واذا حابين تحولون الموضوع 
لمناقشات ايجابية حيااكم على العين والراس .

ودمتم سالمين ...