ليش أنا أسمن منهم وأنا آكل أقل (تعالي اعرفي السبب)

سلا111111111م :)

والله مدري كيف أبدا ؟ أعذروني إذا جا الكلام بغير ترتيب .

أنا متابعه غير جيده لهالقسم مهو لأني ماأحتاجه ! لا .. بس لأن عندي قناعات ترسخت
من تجارب لي وتجارب للي حولي .. خلتني أكتفي لأني من جد مليييييييت

طيب نبدا

أبحط مثال لشكوى تتكرر يوميا

(((( أنا بنت سمينه جدا حاولت أخفف وزني بشتى الطرق ماقدرت

جربت الزينكال

جربت الإبر الصينيه

جربت الريجيم الكيميائي

جربت وجربت وجربت إلخ ))))

هذا مثال والمثال الأسوأ إن التجربه تنجح لكن الشكوى تتغير وتصير

((أنا بنت (كنت ) سمينه سويت ريجيم ونحفت (12) كيلو بشهر والشهر اللي بعده (8) بس عندي ترهلات شديده و(سترتش مارك) أو خطوط واضحه وتفشل))))

ومثل هالأمثله كثير كثيــــــــر

ويجي تساؤل ساذج ..\ أنا آكل أقل من فلانه ومع كذا هي نحيفه وأنا سمينه !!

والجواب ولب الموضوع (فيما يلي) .. :


لنفترض إن نوره تاكل أكثر بس نحيفه ومها تاكل أقل بس سمينه

تعالوا نشوف نموذج لأكل الثنتين في يوم

غالبا إحتياج النساء اليومي للسعرات الحراريه يتفاوت بين 1800 و2200 حسب الطول والوزن والحركه

طيب

نوره ومها يبي يفطرون وكلهم يبون ياكلون بيض

بس نوره تحبه مسلوق

ومها تحبه أومليت

نوره سلقت بيضتين مع 3 شرايح خبز توست

ومها بزعمها تخفف سوت بيضه وحده قلتها في ملعقة زيت وحطت فوقها شريحة جبن
وظنت إن خبز التميس أخف من التوست وأكلت ربع حبه

الشكل العام للفطور يوحي إن نوره أكلت أكثر بس تعالوا نحسب السعرات وتعرفون

مها + بيضتين مسلوقه (160 سعر) + 3 شرايح توست (180) = (340)

نوره+ بيضه (80)+ ملعقة زيت (120)+ شريحة جبن(70)+قطعة خبز تميس(250)=(530)

ومثل هالمثال شرحه يطول

أو تجي تقول أنا آكل بالبيت وغيري ياكل من المطاعم وأنحف مني!

فرق بين إنك تاكل هامبرجر ومعاه كم حبة بطاطس ويكون المجموع (700) سعر حراري
وبين إنك تاكل برياني مثلا وجنبه مسقعه وسلطه غرقانه مايونيز مع كم حبة سمبوسه

والناتج يطق (4000)

الخلاصه ياحبيباتي

نصيحة

لاتنحفين بسرعه تترهلين

إنحفي ببطء ووعي واتبعي نظام السعرات الحراريه بشرط ماتكون أقل من 1200 واصبري لاتستعجلين النتيجه صبرتوا سنين سمينات زيدوها سنه

صدقوني ماراح تندمون

لاتصدقين أكذوبة الأعشاب أو الكريمات أو الكلام الفاضي اللي أثره مؤقت وعاقبته سيئه

مافي زي الهدي النبوي قومي من الأكل وانتِ مكتفيه بس مو لدرجة التخمه واعرفي كم سعر حراري باللي تاكلين؟ وبكذا ترتاحين

يعني مثلا 3 قطع دجاج مقلي تعادل 9 حبات مسلوقه يااااااااااه

علبة كريمة خفق صغيره 200 مل فيها 760 سعر حراري لو اختصرتيها للنصف ووفرتي 380 أو ألغيتيها كلها كم بتكسبين؟

تدرين إنك إذا تركتِ (50) سعر حراري بس من حاجتك اليوميه تخسرين كل سنه كيلو بدون ريجيم بس خمسين وهو مايعادل تمره واحده مثلا أو نصف تفاحه

لايغرك الكم في وجبتك شوفي الكيف بطريقة اعدادك الخاطئ لها




وأخيرا أعتذر لأن الموضوع مشتت وغير مرتب وبلا إعداد مسبق

والله من وراء القصد

تحياتي القلبيه الصادقة :)