ليش ابوي كذا؟؟

السلام عليكم اخواتي.. اتمنى انكم تكونو في أفضل حال..
انا رح اكتب موضوعي هذا للفضفضه ودعواتكم الطيبه.. واذا احد عنده نصيحه اتمنى تفيدني بها..
باختصار انا متزوجه وعندي 4 اطفال.. امي اتوفت قبل سنه.. وهي بإختصار شديد كانت(حياتي وسندي وعزوتي ودواي و ضحكتي وكل شي حلو بحياتي).. من صغرنا ماعرفنا الا حنانها.. وللاسف ابوي انسان شديد وماهمه الا مصلحته وراحته وبس.. مايمنع هذا انه مش بطال لكن تجيه اوقات ما احسه ابونا..يكون رسمي وصارم والخ..
المشكله يا اخوات في ابوي.. خلقه ضيق ومااحسه ابدا ابو.. يعني لما اشوف بنات خالاتي واقاربنا.. ابهاتهم يحتوون بناتهم ويذكرونهم من فتره لفتره وبعضهم يشوف ايش ناقص بنته ويسأل عنها..
انا ياحسره ابوي ابدا ماهو حولنا ولا كأننا بناته.. اقولكم مواقف عشان تفهمون قصدي..
يعني في اجازه رمضان طلعت لاهلي(هم بمدينه وانا بمدينه ثانيه).. اجازه كانتاسبوع فقط.. ومع هذا ماتحمل وجودي رغم ان البيت كبيييير ومافيه الا انا وهو وعيالي والشغالات.. حبسنا انا وعيالي بملحق وقال للشغالات ممنوع يطلعو فوق او يخرجو الحوش مايبغا ازعاج.. طيب اي ازعاج والبست كبييير ..ولما طفشو اولادي قلت ابغا اخرجهم نغير جو قالي السواق مشغول.. وفي الاخير اضطريت اروح بتكسي نغير جو من السجن اللي كل شي فيه ممنوع..
يعني يابنات لكم ان تتخيلو.. ماشاءالله بيت كبير.. وشغالتين.. وسواق.. وهو عايش لحاله فيه( على فكره هوقاعد يدور على زوجة)..وانا كنت متحمسه اول رمضان قلت لزوجي يحجزلي والاولاد نروح له نغيرله جو عشانه لوحده.. واخرتها قشنا قش.. ومافي الا هذا ممنوع وهذا ممنوع.. تخيلو رضيت انحبس مع اولادي بالملحق.. ولما جاب ولدي الصغير (عمره سنتين).. كوره يبغا يلعب بها.. قال للشغالات قولولها ممنوع..ومافي في الملحق التلفزيون خربان وبغينا نت قال ممنوع ينزل تحت.. يعني كل شي ممنوع ممنوع..حتى السواق مشغول ومو فاضي.. على فكره انا جايه مو مثقله عليه جايبه شغالتي معي رغم وجود شغالاته.. وعيالي خلاص ماشاءالله كبار بس هذا اصغرهم ومعاه انا وشغالتي..ومع ذلك يتأفف وكل شي ممنوع..
حتى لما اضطرينا نركب السياره السواق يقول لي مدام ممنوع نشرب فيها مويه او عصير الخ.. يعني اقسم بالله كأنه سجن ايش هذا استغفر الله.،
انا ابغا افهم ليش بعض الاباء كذا فيهم قسوه على عيالهم؟؟ والله انغبن لما اشوف البنات معززين مكرمين عند اهاليهم واحنا ابوي قلنا نروح نسليه .. يقوم يتأفف كذا..انا اللي قاهرني انه ماشاءالله البيت كبير وعنده خدم وحشم.. وانا جايبه شغالتي معي.. تخيلو حتى اكل اروح اشتري انا .. الشغالات يقولو مافي مقادير للطبخ..(هو مايحب كثرة المقاضي بس يجيب اللي يحتاجه وبس.. مايقول مثلا اقضي لو جوني اولادي او احفادي.. لا ابدا.، رغم انه مقتدر مادياً).،على فكره هو من يومه شديد لكن امي الله يرحمها كانت تمنعه اوقات وكان حنانها مغطي على قسوته بس الظاهر من بعدها اخذ راحته بزياده الله يسامحه.. وكمان هو من النوع اذا البنت اتزوجت خلاص تنقلع مالها شي عنده وزوجها هو المسؤل وكل شي.. وانا ادري بهالكلام ولاني منتظره منه شي.. بس ياخي لما نزورك عالاقل وسع صدرك وخفف من قوانينك الصارمه..
على فكره امي كانت عكسسسسسه تماما .. مكرمتنا اخر كرم ومدلعتنا اخر دلع وعازتنا ورازتنا ومو مقصره علينا شي.. الله يكرمها ويحسن أإليها جزاءً بما اكرمتنا.. وربي يعوضها بالفردوس الاعلى ياررب..
انا للاسف والله اتمنى ربي يسامحني على كلامي.. هذا ابوي ومهما كان اكيد احبه واحترمه.. لكن للاسف بديت اكره اروح له حتى لو زياره.. ومع ذلك بروح الله يهدينا ويهديه..
موضوعي هذا للفضضفضه و طامعه في دعواتكم لامي الغاليه الله يرحمها ويسكنها اعلى الجنان..