كوبونات الراقية تسجيل الدخول

محتاجه راحه

ليش احكي لكم همي!!

الأسرة والمجتمع •

السلام عليكم

مدري كيف احكي و لا من وين ابدا و لا وش اقول فيني هم جاثم على صدري يمكن عند غيري بسيط مدري!

مشكلتي اشياء كثييير ه الرابط ما بينهم امي ..ليش يا امي ليش ما تدرين عني ما تفهميني ما تسمعيني ما تحملين همي ما تزعلين على زعلي ما تنقهرين على قهري ليش انا في عيونك دايم المتهمه ليش دايم عندك الناس لا يزعلون و انا و اخواتي موب لازم .. امي ما تقبل اننا نزعل من احد او ندافع عن نفسنا..يصادفني موقف احد يجرحني او يهيني على الملأ و تشوفه ..انطم و اجي اقولها ليش يمه تسوي فيني كذا تقولي انا ما شفت شيء و الله العظيم يا بنات مو مبالغه تكون حاظره و معنا بالسالفه او موب معنا في احيان ثانيه..تقولي ما شفت و ما اشوفها سوت شيء انتاللي حاطتها في بالك ..طيب انا حاطه هذي في بالي زين زي ما قلتي مع ان من ناحيتي ما فيه شيء يجي بعد فتره يتكرر نفس الموقف معي او مع اوحده من خواتي تنكر انها انتبهت يا بنات و لم نقولها انا ما نيب مكلمتها المره الجايه او يا يمه انت طيبه و فيه ناس مستغلين هالناحيه و يجرحونا و انت تشوفين و لا تاخذين منهم موقف تقوم تهاوش تهاوش و تدعي علينا و تمسح فينا البلاط ليش ان احنا نقول عنها كذابه !

و الله شاهد ان عمرنا ما نطقناها و لا فكرنا فيها انها تكذب و تقول ما انتبهت و هي تكون انتبهت .. ما تتفاهم ابد و اي نقاش ينفتح معها من اي احد مننا تقلبه على طول زعل و تعلي صوتها بحيث ما تسمعنا اموووووووووووووووووووت الف مره كل ما صار هالشيء صرت اقابل الناس و اقول يا رب يا رب سلمنا يا رب و لا تسلط علينا من لا يرحم مو خوف من الناس خوف من المشاكل اللي تعقب رد فعل لنا يا بنات امي تدعي علينا سمعتها اختي صدفه و هي تدعي علينا بدعاوي شينه تقول انتوا وش تبون تبون كل الناس تكرهني و السبه انتوا .. تقول انا ما بيجيني المرض الا منكم هالناس اللي يصير بينا و بينهم شيء اي ردة فعل لنا على طول طيرااان للوالده يحاولون يرقعون موقفهم و هذا اللي يصير تقول حراااام ما قصدها و لا جاهله و لا غشيمه لا تواخذون عليها و حنا ليش ما ينحط لنا العذر ما نصير جهال و لا غشيمين تقول انتوا اشوفكم بعيني تحارشونهم :(

لا حول و لا قوة الا بالله العلي العظيم .. قلنا الحل نواجهم قدامها و ان ما انكروا بتشوف و يصير هذا الكلام عقب تقول انا مالي دخل لا تزعجوني :44:

اخرتها ابوي صار يفكر زي امي المشكله ان مانبيها تزعل و لا نبيها تدافع عننا و لا نبيها تهتم يا ناااااس كلمه تطيب الخاطر من ام لعيالها ترمي كل هالناس ورى ظهرك كلمة حق تنقال اي شيء بس الاهمال و الله حراااااام كل يوم عن يوم احس ان المسافه بيننا تبعد صرت اخاف اقعد معهم اخاف يقولون لي شيء يجرح..روحي من جوه تعبت كل ما فيني تعب قلبي و روحي و اعصابي و عقلي كل شيء ما فيه احد اشكي له من بعد رب العالمين غيرها انا و هي لوحدنا في البيت الباقيين متزوجيين..اول ما تنجرح من احد احس ان ودي اكسر البيبان و لا يحرق احد قلبها او يجرحها انا اابكي عندها انا و المخده سوا تروح عني او تشغل نفسها بأي شيء توصل في امي الحاله اني لم اطق عليها باب غرفتها وقت ماهي فاضيه بس ابي اقعد معها لو ساكتين تعطيني ظهرها و تقلب علي وجهها :44:


تعبت من كثر البكاء تعبت من الهم و الحزن اللي في جوفي تعبت تعبت تعبت

محتاجه بس اطلع اللي بداخلي لاي احد بها الوقت ما عندي غير رب العالمين ثم انتوا ما ابيكم تلقون لي حل ابي بس احد يفهمني يسمع صوتي لتكلمت و يحس فيني لتعبت و يحن علي ودي اجيها بهمي و تاخذه و تقطه لي في البحر و تريحني بكلمه و لا حتى باحساسها معي..

رب العالمين يفرج لي و لكم همنا يا رب و ياجرنا الاجر الكثيير عليه
5
795

يلزم عليك تسجيل الدخول أولًا لكتابة تعليق.

تسجيل دخول

bnt 511 roq
bnt 511 roq •
اللهم امين الله يفرج همك

وحنا معك يا حبيبتي صحيح اننا مانشوف بعض بس نحس في بعض

حبيبتي لاتزعلين من امك احس ان تصرفها غصب عنها صدقيني هي ماتقصد الي تسويه

والله ان تصرفاتها قريبة من امي واكيد مافيه وحده ترضى على امها لو شعره بس وش نسوي

ادعيلها اشكي همك للي فوقنا ويشوفنا هو اولى بالشكو

ماعليك حبيبتي فضفضي واشكي لنا بس برضو ادعي ربك ماراح يخليك ولا تفقدين الامل الله يفرجها ان شاء الله
الشبلية
الشبلية •
حبيبتي مهما سوت امك تأكدي انها تحبك وتحب اخواتك وانا اقدر احلف لك بعد لان مستحيل ام تكره عيالها ..
صحيح تصرفاتها تدل عكس هالشيء بس لازم تدارونها وتحولون تحتوونها اذا هي ماعرفت تحتويكم وتبينولها حبكم وانكم ماتستغنون عنها ابد
والله يصلح حالكم قادر ياكررررررررريم
البسكويته
البسكويته •
هلا حبيبتي
الله يعطيك العافية على موضوعك
يمكن هي قصدها لو جارتكم بلموضوع وقالت صحيح فلان غلط عليكم تكبر القصة عندكم فتحاول تتجاهل عشان تتجاهلون وتاخذها من قاصرها
بس والدتك بطبيعتها مسالمة مع الناس يمكن؟؟
تفاءلي بالخير
تفاءلي بالخير •
وسعي صدرك:33:

أنا أمي كانت كذا..أو بالأحرى حنا البنات كنا نشوفها كذا :$

ويوم كبرنا وعقلنا اكتشفنا أن أمي قمة الأخلاق و مافيه أحد في العائلة إلا يحبها لأنها (تبارك الله ما شاء الله) ما قد غلطت على أحد بالكلام أو بالفعل مع أنه يجيها حاجات وشويات..لكنها ملكة بأخلاقها و أحس اللي يغلط معها حتى لو حس انه انتصر لنفسه إلا ما يتفشل بعدين و يستصغر نفسه

الحين وأنا أقرا قصتك , تذكرت أشياء كثيرة..كنا نروح نقول لأمي الناس يتجرأون علينا عشانك ما تاخذين حقنا,شوفي أولاد وبنات ...ما أحد يتجرأ يقولهم شي!!!ومضت الأيام..ما أكتمك كننا مره متأثرين وحنا صغار ومقهورين بقوة:angry:....لكن الحين الحمد لله..اللي بيحاول يغلط نرد بأدب أو ما نرد,,بس محسوبتك ما تقدر تكتم شي في قلبها!!حامي حامي:024: لكن الحمد لله ما يقعد في قلبي شي..ودايم أقول لأمي يا حظك ما شاء الله تبارك الله وشلون انت كذا!!أنا ما أقدر!!

يعني باختصار..اللي يغلط عليك عامليه بأدب , اذا بتقدرين تردين أو خليه يستصغر نفسه بهدوئك.. وبتكبرين في عين أمك أنك وحده ما تحب المشاكل..

ووحده في المنتدى شفت لها كلمه حلوه " أأعلمه الأدب, أم أتعلم منه عدم الأدب" أو كما قالت خخخ

وهذي أمك.....حبيها ولا تخلين أحد يفرق بينكم
وش تسوى الدنيا بدونها

الله يخليها لك ويرزقك برها

والله يخلي لنا و لكل مسلم والداينا ويرزقنا برهما